Leh giăm mkrah thŭn dưi bi klă, bruă mkra kdrêč 3 mâo boh taih giăm 50 km, dôk hlăm hdră rŭ mjing êlan dơ̆ng pral Ƀuôn Ama Thuôt – Khánh Hoà, dưi mâo leh klei mlih klă sĭt. Pô duh bi liê bi tŭ ư hŏng dŭm kdriêk, ƀuôn prŏng ti čar Dak Lak kơ dŭm anôk bi mkŏ leh anăn êlan mđuĕ êa, ngă bruă pơ̆ng gơ̆ng leh anăn ba jao lăn ala, bi leh klei hưn mdah bi klă klei hmăi hŏng wăl hdĭp mda čiăng hưn mdah leh anăn bi klă. Hluê si Phạm Đông Thanh, Khua kiă kriê sa hlăm dŭm knơ̆ng bruă dŭ mdiăng prŏng ti čar Dak Lak, mnuih ƀuôn sang leh anăn knơ̆ng bruă hlăm čar mâo klei hmăng hmưi êlan dơ̆ng pral anei dưi rŭ mjing djŏ hdră kčah. Phạm Đông Thanh đăo knang, leh dưi ba yua, êlan dơ̆ng pral anei srăng đru mnơ̆ng dhơ̆ng dưi dŭ mdiăng hmar hĭn, mâo boh tŭ dưn hĭn. “Tơdah mâo êlan dơ̆ng pral nao truh ti Khánh Hòa, drei srăng dưi bi hrŏ mmông dŭ mdiăng mnơ̆ng dhơ̆ng mơ̆ng 4 mmông, 5 mmông jing 2 mmông. Mmông dŭ mdiăng hrŏ lu, ênoh prăk bi liê mkra êdeh êdâo ƀiă mơh. Tal 2, hŏng sa hnơ̆ng mnơ̆ng dhơ̆ng, ƀiădah drei knŏng duh bi liê kơ êdeh êdâo dŭ mdiăng đuč. Sơnăn srăng dưi bi hrŏ ƀiă prăk bi liê, bi hrŏ prăk dŭ mdiăng, mâo wăt prăk mkra bi jăk, prăk mlan.

Êngao kơ bruă dŭ mdiăng mnơ̆ng dhơ̆ng, hluê si Lê Văn Long, khua bruă sang čư êa kdriêk Krông Bông, čar Dak Lak, êlan dơ̆ng pral Ƀuôn Ama Thuôt – Khánh Hoà leh anăn Ngŏ Duôr Čư̆ Prŏng mkŏ Dak Lak hŏng Lâm Đồng, lŏ dưi ruh mgaih dŭm klei dleh kpăk êlâo anei, đru kơ kdriêk mâo klei kdlưn hĭn hlăm bruă lŏ hma leh anăn bruă hiu čhưn ênguê. Lê Văn Long đăo knang, hŏng tur knơ̆ng jing krĭng phŭn bruă krŭ kdơ̆ng, dŭm ƀuôn êlan boh hŏng knhuah dhar kreh, mâo duôr Čư̆ Yang Sin k’drưh k’ăm, wăl hdĭp siam sĭn, leh êlan prŏng dưi pŏk, Krông Bông srăng đĭ ktang hŏng bruă hiu čhưn ênguê: “Hŏng tlâo bĭt êlan mkŏ ti akŏ kdriêk, krah kdriêk leh anăn knhal jih kdriêk, Krông Bông srăng dưi bi lar dŭm boh tŭ bruă hiu čhưn ênguê yang ƀuôn, klei hiu čhưn ênguê yua ai, hiu čhưn ênguê wăl mnơ̆ng hdĭp… Êlan dơ̆ng pral Ƀuôn Ama Thuôt – Khánh Hoà leh anăn êlan Ngŏ Duôr Čư Prŏng srăng jing klei găl čiăng kơ Krông Bông hluê ngă hdră mđĭ kyar bruă hiu čhưn ênguê msĕ si hdră mtrŭn mơ̆ng bruă Đảng kdriêk mâo leh”.

Ăt msĕ hŏng čar Dak Lak, čar Lâm Đồng ăt dôk mtrŭt mđĭ bruă mprăp êmiêt kơ bruă rŭ mjing êlan dơ̆ng pral Tân Phú-Bảo Lộc leh anăn Bảo Lộc-Liên Khương, hŏng kluôm ênoh prăk duh bi liê êbeh 28 êbâo êklai prăk. Leh dưi rŭ mjing êlan dơ̆ng pral anei, čar Lâm Đồng srăng dưi mkŏ hŏng dŭm anôk bruă duh mkra prŏng ti krĭng Ngŏ Dhŭng. Hluê anăn dưi hluh dŭm klei găl kơ djam mtam, mnga, bruă hiu čhưn ênguê leh anăn mnơ̆ng gŭ lăn Alumin. Trần Văn Hiệp, khua bruă sang čư êa čar Lâm Đồng brei thâo, čar mâo leh hdră ngăn prăk leh anăn hdră ngă bruă, dôk gĭr ti hnơ̆ng lu hĭn čiăng dưi bi leh hdră anei, hluê ngă tŭ jing klei hmăng hmưi kdlưn hĭn hlăm bruă duh mkra ala ƀuôn hlăm alŭ wăl: “Êlan dơ̆ng pral tơdah dưi ba yua hnưm jing ti knhal jih thŭn 2025, tơdah sui hĭn jing ti mlan 6/2026. Kâo mñă klă, êlan dơ̆ng pral anei srăng bi klă klei đĭ kyar mgi dih ti čar Lâm Đồng, bi mlih kluôm klei jing čar Lâm Đồng”.

Hlăm dŭm hdră mkra êlan dơ̆ng pral dưi rŭ mjing ti krĭng Lăn Dăp Kngư êlâo kơ thŭn 2030, êlan dơ̆ng pral Pleiku-Quy Nhơn mâo ênoh duh bi liê lu hĭn, truh kơ 56 êbâo êklai prăk. Hluê si Nguyễn Hữu Quế, Khua kiă kriê knơ̆ng bruă Hdră êlan leh anăn duh bi liê čar Gia Lai, êlan dơ̆ng pral anei yuôm bhăn êdi hŏng čar, ƀiădah srăng mâo klei lông dlăng prŏng hlăm bruă iêo mkrum ngăn prăk. Kyuanăn, mbĭt hŏng klei gĭr iêo mthưr duh bi liê, čar Gia Lai dôk ksiêm duah, bi mbŏ dŭm anôk bi mkŏ leh anăn dŭm anôk bruă tuh tia ktuê êlan dơ̆ng pral, leh dưi mkŏ mjing, êlan dơ̆ng pral srăng dưi bi lar jih hnơ̆ng boh tŭ dưn: “Mkŏ mjing hdră čuăl mkă mđĭ kyar bruă duh mkra ala ƀuôn truh ti thŭn 2030, tă hdră truh ti thŭn 2050, hmei lŏ mbŏ 3 wăl, wăl anôk bruă tuh tia ktuê êlan dơ̆ng mrô 19 truh ti kdrŭn ksĭ Quy Nhơn. Leh anăn phung duh bi liê ăt srăng kăp drông ti anôk êlan dơ̆ng pral găn nao. Kyuanăn diñu mkŏ mjing hdră ti Đăk Đoa mâo mơh, Mang Yang mâo mơh leh anăn wăt Đăk Pơ ăt mâo mơh. Ktuê êlan dơ̆ng anăn, mâo lu anôk bruă tuh tia mâo phung duh bi liê uêñ mĭn. Tal 3, hmei srăng lŏ dơ̆ng bi leh bruă mka êlan klông, čiăng mkŏ hŏng dŭm krĭng ba čhĭ boh mnga bruă lŏ hma.

Hluê si hdră mtrŭn mrô 23, hruê 06/10/2022 mơ̆ng Phŭn bruă kđi čar, krĭng Lăn Dăp Kngư ară anei jing anôk bruă duh mkra awăt hĭn hlăm kluôm ala. Bruă bi liê êbeh 180 êbâo êklai prăk čiăng hluê ngă dŭm hdră prŏng hlăm êlan klông tinei jing mkŏ mjing bruă mkŏ mkra kjăp ktang čiăng kơ krĭng Lăn Dăp Kngư bi lar dŭm klei găl hlăm bruă pui kmlă, mnơ̆ng gŭ lăn, boh mnga bruă lŏ hma, bruă hiu chưn ênguê… mđing truh kơ bruă duh mkra mtah, đĭ kyar kjăp ti thŭn 2030, jing anôk bruă duh mkra đĭ kyar hlăm kluôm ala ti thŭn 2045.