Nai Đào Thị Huyền, nai mtô hđeh Sang hră gưl sa Êa Trul, să Êa Trul, kdriêk Krông Bông êbeh 24 thŭn siă suôr hŏng bruă ngă nai mtô, ñu brei thâo, mă bruă ti alŭ wăl dleh dlan, 75% ênoh hđeh jing mnuih djuê ƀiă kyua anăn grăp thŭn snăn s’aĭ, truh akŏ thŭn hriăm, phung nai mtô ti sang hră lŏ ksiêm dlăng anăn hđeh lehanăn nao truh grăp sang mtrŭt mjhar digơ̆ nao sang hră “Hlăm wưng nao sang hră, phung hđeh kreh mdei mơh kyua gŏ sang dleh dlan, amĭ amao nao mă bruă kbưi amâo mâo pô kriê dlăng phung adei, djŏ mmông diñu mdei sang hră, snăn phung nai kreh nao truh ti grăp sang mtrŭt mjhar phung hđeh gĭr nao sang hră m’ar. Hlăm hdră nao mtô bi hriăm, pô ăt mtrŭt mjhar phung adei gĭr nao sang hră, snăn pô ƀuh diñu kriăng mơh nao sang hră”

Nguyễn Văn Tiến, Khua sang hră gưl sa Êa Trul, să Êa Trul, kdriêk Krông Bông brei thâo, thŭn hriăm anei, sang hră mâo giăm 650 čô hđeh. Sang hră gĭr 100% phung hđeh nao hriăm djăp ênŭm. Čiăng dưi mâo mta kñăm kčah mtrŭn, êngao bruă čih mkra hdră kčah, mkŏ mjing klei bi kƀĭn nai kiă adŭ, bi hgŭm hŏng bruă sang čư̆ êa alŭ wăl, êpul mtrŭt mjhar phung hđeh nao adŭ hriăm, sang hră lŏ iêu mthưr phung mâo ai tiê kmah đru phung hđeh mâo klei hdĭp dleh dlan čiăng phung hđeh mâo klei găl h’ĭt ai tiê nao sang hră. Nguyễn Văn Tiến brei thâo: “ Sang hră bi hgŭm hŏng bruă sang čư̆ êa alŭ wăl, dŭm êpul mâo ai tiê kmah đru 50 hdruôm hră dlăng adŭ 4, 500 blah čhum ao. Hŏng Knơ̆ng bruă Sang hră m’ar mtô bi hriăm lehanăn Anôk bruă hdruôm hră, kdrăp mnơ̆ng Dak Lak đru kơ 10 čô hđeh adŭ 1 hdruôm hră dlăng. Mbĭt anăn, sang hră bi hgŭm hŏng Êpul amĭ ama hđeh ti sang hră blei leh 500 hdruôm hră čih lehanăn giê čih mprăp mơ̆ng akŏ thŭn hriăm mtam čiăng kơ kơ phung hđeh ka mâo hdruôm hră čih, hră dlăng dưi mâo mtam hlăm hriăm mrâo 2023-2024”

Hluê Huỳnh Viết Trung, khua Adŭ bruă sang hră m’ar mtô bi hriăm kdriêk Krông Bông, truh kơ ară anei, păt čiăng jih sang hră mprăp leh kơ thŭn hriăm mrâo. Anôk bruă nah gŭ, êpul nai mtô mâo rơ̆ng kjăp, djăp ênŭm, mkăp djŏ hŏng klei čiăng mơ̆ng hdră mtô bi hriăm mrâo. Phung hđeh dŭm gưl ti alŭ wăl nao sang hră djăp ênŭm. Khă snăn, čiăng kơ phung hđeh kriăng nao sang hră, Adŭ bruă sang hră m’ar mtô bi hriăm kdriêk Krông Bông ba mdah leh hră m’ar gĭt gai dŭm boh sang hră bi hgŭm kjăp hŏng anôk bruă đảng, bruă sang čư̆ êa alŭ wăl mtô mblang kơ amĭ ama hđeh mđing dlăng hĭn, mjing klei găl kơ anak aneh nao sang hră. Huỳnh Viết Trung brei thâo: “Mtrŭt mjhar phung hđeh nao sang hră ti dŭm krĭng dleh dlan dưi rơ̆ng kjăp, mâo ƀiă phung hđeh alah nao hmei bi hgŭm leh hŏng bruă sang čư̆ êa alŭ wăl, dŭm sang hră čiăng mđing gĭt gai, msir mghaih. Hluê hdră kčah, hruê 15/8 srăng muưh ruê̆ klei ngă hră m’ar hđeh mŭt hriăm, khă snăn hmei ăt bi kdung lehanăn truh kơ hruê 5/9 hlei phung hđeh ka nao sang hră hmei ăt mtrŭt mjhar brei digơ̆ nao kñăm rơ̆ng phung hđeh nao sang hră djăp ênŭm”.

Hŏng dŭm klei gĭr mơ̆ng Adŭ bruă sang hră m’ar mtô bi hriăm kdriêk Krông Bông, čar Dak Lak hlăm hdră mtrŭt mjhar phung hđeh nao sang hră mơ̆ng akŏ thŭn hriăm mrâo srăng jing klei bi knăl jăk kơ sa thŭn hriăm mrâo ba wĭt lu klei tŭ dưn./.