Gŏ sang Hoàng Trung Thành mâo 8 sào lăn kphê pluă mbĭt hŏng ana boh durian ti krah alŭ Tân Sơn, să Ea Yông. Alŭ hma anei mkrah mtam djŏ hŏng anôk arăng čiăng rŭ mkra êlan dơ̆ng pral mơ̆ng Khánh Hòa – Ƀuôn Ama Thuôt găn djŏ. Ñu yăl dliê, leh hmư̆ lăn hma ñu djŏ êbeh 4 sao lăn pioh mkra êlan dơ̆ng snăn diñu ăt mprăp mơh ai tiê, kyuadah anei jing hdră êlan mơ̆ng knŭk kna. Leh mâo êlan dơ̆ng anei srăng đru mđĭ kyar jăk kơ bruă duh mkra amâo mâo djŏ knŏng kơ kdriêk Krông Pač đuič ôh, ƀiădah jih kluôm čar Daklak tơl hnơ̆ng jing jih krĭng lăn Dap Kngư mâo klei tŭ dưn. Krah thŭn 2022, knuă druh ngă bruă mkă lăn hriê pơ̆ng leh gơ̆ng knăl, truh ti wưng Tết Nguyên đán 2023 leh êgao snăn lŏ hriê bi mkă, bi ksiêm lehanăn ngă hră mơar kơ bruă ruh mgaih anôk ala. Hoàng Trung Thành lač:

“Phung knuă druh hriê bi mkă leh, lehanăn mâo klei hưn hŏng phung ƀuôn sang, hmei atăt diñu truh kơ anôk lăn hmei tuôm hŏng klei knŭk kna hrui mă, diñu bi dhiang klei mkă pơ̆ng gơ̆ng mơ̆ng akŏ hlŏng kơ knhal tuič, yap kyâo pioh čiu hnô mgi dih. Dŭm tĭng tĭng bi mguôp hlăm bruă mkă, ksiêm mbĭt hŏng gŏ sang hmei ƀuh ăt klă djŏ mơh”.

 Ti alŭ Tân Sơn să Ea Yông, gŏ sang Lê Đình Thiên ăt mâo truh 4 sào lăn pla kphê mbĭt hŏng tiu, dôk hlăm ênoh knŭk kna hrui mă truh 1/4 ênhă lăn. Thiên brei thâo, hdră êlan mơ̆ng Đảng lehanăn knŭk kna snăn gŏ sang hmei si thâo lŏ hngah. Knŏng ñu hmăng hmưi jih jang bruă čiu hnô anôk ala srăng dưi ngă hŏng klei klă mngač, amâo mâo ba klei jhat kơ phung ƀuôn sang ôh. Lê Đình Thiên lač:

“Sitôhmô hlăm alŭ mâo lu anôk ară anei jing mơ̆ng 500 – 600 êklăk prăk/sào, anăn jing war digơ̆ mâo lu boh durian, lu anôk knŏng kphê, tiu ênoh ƀiă hĭn mơ̆ng 300 – 400 êklăk prăk/sào. Êlan dơ̆ng pral mâo klei čiu hnô bi năng lač dah ăt dleh mơh, ƀiădah phung ƀuôn sang hmăng hmưi khă bi djŏ hŏng ênoh kơ êngao, dah kgŭ hĭn knŏng bi mlih mơ̆ng 70 – 80% snăn kơh phung ƀuôn sang tŭ ư”.

Să Ea Yông, huyện Krông Pač mâo 193 čuê lăn mơ̆ng 107 gŏ êsei lehanăn dŭm anôk bruă klei đăo djŏ hŏng anôk srăng mkra êlan dơ̆ng pral Khánh Hòa – Ƀuôn Ama Thuôt. Hŏng ênhă jih jang hrui mă jing 250.672 m2. Nguyễn Phụng Minh – Khua să brei thâo ară anei mâo leh 192/193 leh mâo mkă ênŭm, bruă lŏ bi ksiêm mâo ngă păt čiăng jih leh, êpul ksiêm mkă ăt hlăk dôk ngă hră mơar ba jao kơ anôk bruă kiă kriê lăn ala kdriêk Krông Pač bi leh hdră čiu hnô:

 “Hmei jao jih jang hră mơar djŏ tuôm kơ anôk bruă kiă kriê lăn ala kdriêk. Mơ̆ng anăn, mâo hdră mkă tĭng klei kơ ngăn prăk, lehanăn bi leh hră mơar lŏ jao kơ să hưn bi êdah sa blư̆ dơ̆ng, iêo jih jang phung ƀuôn sang bi mkă tĭng. Tơdah hlei gŏ sang ka tŭ ư ôh, lŏ dơ̆ng ngă gưl tal 2. Leh ruĕ klei mkŏ mjing tal 2 phung ƀuôn sang kăn tŭ ư rei snăn mkŏ mjing gưl tal 3 hlŏng bi leh lehanăn iêo phung ƀuôn sang nao mă prăk čiu hnô”.

 Bruă mkra êlan dơ̆ng pral Khánh Hòa - Ƀuôn Ama Thuôt mâo boh taih giăm 118 km, găn hlăm 4 kdriêk čar Daklak mâo: Krông Pač, Krông Bông, Ea Kar lehanăn M’Drak lehanăn wăl krah Ninh Hòa, čar Khánh Hòa. Hlăm anăn hjăn kdriêk Krông Pač hŏng boh taih êbeh 33 km, găn hlăm 8 să mâo: Hòa Đông, Ea Knuêč, Ea Yông, Ea Kêñ, Hòa Tiến, Tân Tiến, Ea Ui và Vụ Bổn. Hŏng ênoh jih jang lăn hrui mă êbeh 200 ha lehanăn hlăm brô 200 ha jing wăl êngao pioh kơ anôk mkra êlan, snăn djŏ hŏng êbeh 1.000 gŏ sang lehanăn dŭm êpul bruă.

 Ngô Thị Minh Trinh – K’iăng khua knơ̆ng bruă sang čư̆ êa kdriêk Krông Pač, mnuih dôk hlăm Êpul gơ̆ng bruă čiu hnô, kơ klei ruh mgaih anôk ala kdriêk hưn, truh ti wưng anei, kdriêk mâo bi leh truh giăm 2.000 hră mơar čih bi hmô, djăp leh 98% ênhă lăn čiăng ruh mgaih anôk ala mkŏ mjing čih dăp truh 157/208 gŏ êsei djŏ hlăm bruă brei mbĕ đuĕ kơ anôk mkăn, mkăp truh 16,5 ha ngă 3 mkŏ mkra anôk dôk mrâo ti dŭm să Tân Tiến, Vụ Bổn lehanăn Ea Knuêč. Tui si Ngô Thị Minh Trinh, čiăng đăm lĕ ôh hlăm klei mtŭk mtŭl mơ̆ng bruă čiu hnô msĕ si lu anôk bruă rŭ mkra hŏng ênoh êbâo êklai prăk ti Daklak hlăk dôk găn, kdriêk ngă hĕ bruă knuă hŏng klei ƀhĭ klĭ, kpă mngač, rơ̆ng klei tŭ dưn kơ phung ƀuôn sang.

“Hmei mâo leh klei kuôl kă hŏng êpul bruă kăp kčĕ, mkŏ mjing klei mkă tĭng nao ksiêm hlăm grăp čuê lăn mtam, amâo mâo knŏng mtrưm tui si alŭ wăl amâodah sa să ôh, lehanăn ruăt bi kruak ênoh yơh. Hŏng klei mă bruă ƀhĭ klĭ snăn, kâo mĭn năng ai phung ƀuôn sang srăng tŭ ư, kyuadah jing djŏ. Drei amâo mâo ngă kyua klei anei klei adih ôh, jih jang mnuih bi ngă bruă hŏng klei ênuah čiăng ba wĭt klei tŭ dưn kơ phung ƀuôn sang, lehanăn kơ knŭk kna, lehanăn bi ngă bruă hŏng ai tiê tui si hdră bhiăn knŭk kna yơh”.

Hŏng klei mjêč pral, hlăm klei kpă ênuah dôk ngă bruă tĭng tla klei čiu hnô kơ phung ƀuôn sang ti dŭm kdrêč lăn ruh mgaih anôk ala amâo mâo djŏ knŏng ti kdriêk Krông Pač, čang hmăng jih jang bruă mkra êlan dơ̆ng anei srăng dưi ngă mkra djŏ hŏng hrue kčah êlâo kơ hrue 30/6 kơ anăp. Êlan dơ̆ng pral Ƀuôn Ama Thuôt– Khánh Hòa mkŏ hŏng krĭng krah Lăn Dap Kngư - Dhŭng Kwar krah, mkŏ “dliê” hŏng “êa ksĭ” srăng dưi ngă mkra djŏ wưng kčah, mjing klei găl kơ bruă mđĭ kyar klei duh mkra, hiu čhưn ênguê, iêo jak klei duh bi liê, pioh kơ bruă dŭ mdiăng mnơ̆ng dhơ̆ng, hŏng klei êđăp ênang./.