Hlăm wưng êgao, Dhar bruă mặt trận Việt Nam dŭm gưl hluê ngă leh jăk hdră ksiêm dlăng lehanăn tăng mgăl hlăm yang ƀuôn. Lu mta phŭn ksiêm dlăng mơ̆ng Dhar bruă mặt trận Việt Nam ba wĭt leh boh tŭ dưn jăk đru kơ dŭm anôk bruă mâo klei dưi ruh mtlaih dŭm klei dleh dlan, gun kpăk, ba mdah klei bhiăn, hdră mtrŭn, djŏ hŏng klei čang hmăng, răng mgang klei tŭ dưi djŏ hdră bhiăn kơ mnuih ƀuôn sang.

Să Minh Khai, kdriêk Hoài Đức, ƀuôn prŏng Hà Nội... Kluôm ênhă lăn hrui mă čiăng mkra êlan dar 4 – krĭng ƀuôn prŏng phŭn truh 5,7 ha mơ̆ng 143 gŏ sang. Anei jing să tal êlâo ti kdriêk Hoài Đức ba akŏ hlăm hdră mtrŭt mjhar mnuih ƀuôn sang msir mghaih anôk ala kơ bruă mkra êlan dar 4. Truh ară anei, 100% ênoh mnuih ƀuôn sang tŭ mă leh prăk čiu hnô lăn, ba jao lăn kơ hdră mă bruă lehanăn dưi ƀuh leh dŭm kdrêč êlan tal êlâo mơ̆ng Hdră anei dưi mkra kjăp hŏng bêtông. Đỗ Thị Tuyết, Khua Anôk bruă mặt trận alŭ Minh Hòa 3, să Minh Khai brei thâo:

"Khua ƀuôn lehanăn Anôk bruă mặt trận ngă bruă jih ai tiê kơh dưi mâo snăn. Anôk bruă mặt trận nao mtrŭt mjhar mnuih ƀuôn sang ăt mđing uêñ mơh, huĭdah mâo klei dleh dlan. Ƀiădah čiăng hluê ngă mta kñăm ala čar snăn jih jang gŏ sang hlăm alŭ gĭr hlue ngă yơh.

Hluê ngă hdră “Mnuih ƀuôn sang thâo, ƀuôn sang bi trông, ƀuôn sang ngă, ƀuôn sang ksiêm dlăng, ƀuôn sang dưn yua”, hlăm wưng êgao, Dhar bruă mặt trận Việt Nam gĭt gai leh 31 êpul nao ksiêm dlăng; Dhar bruă mặt trận dŭm gưl gĭt gai, bi hgŭm ksiêm dlăng 231 êbâo boh klei. Hdră tăng mgăl hlăm yang ƀuôn đru mđĭ lar klei ngă phŭn mil pô mơ̆ng mnuih ƀuôn sang hlăm hdră nao hgŭm mđĭ kyar bruă duh mkra – ala ƀuôn. Khă snăn, boh sĭt ti lu anôk mâo dŭm klei mnuih ƀuôn sang ƀuh, lehanăn thâo ƀiădah amâo čiăng lač, amâo jhŏng blŭ mgăl. Kơiăng nai prŏng, nai prĭn Vũ Văn Phúc – Kơiăng khua Êpul hgŭm kreh knhâo dŭm anôk bruă Đảng gưl dlông mtă:

“Boh sĭt kreh lač: Mnuih ƀuôn sang nao bi rŭ mdơ̆ng, ƀrư̆ mkra Đảng, đru mguôp hlăm hdră ksiêm dlăng phung knuă druh đảng viên ƀiădah ka mâo sa klei bhiăn čiăng mđĭ lar bruă klam ksiêm dlăng mơ̆ng Anôk bruă mặt trận, dŭm êpul bruă kđi čar ala ƀuôn lehanăn mnuih ƀuôn sang. Kyua anăn, brei mđĭ lar hĭn bruă klam mơ̆ng mnuih ƀuôn sang hlăm hdră mkă tĭng, ksiêm dlăng phung knuă druh hluê ngă bruă pô, knuă druh đảng viên klă sĭt jing gru mngač, ksiêm dlăng knuă druh đảng viên mjuăt bi hriăm knhuah hdĭp, knhuah mă bruă”.

Čiăng bruă ksiêm dlăng, tăng mgăl mơ̆ng Anôk bruă mặt trận amâo lŏ jing klei bi êdah mang brei kčah mtrŭn klei bhiăn klă klơ̆ng čiăng mnuih ƀuôn sang dưi mkăp djăp ênŭm, pral lehanăn klă klei hâo hưn. Ksiêm dlăng, tăng mgăl mơ̆ng mnuih ƀuôn sang brei hluê ngă klă mngač, mđĭ lar kluôm bruă klam mơ̆ng mnuih ƀuôn sang hlăm bruă ksiêm dlăng phung knuă druh, đảng viên ti anôk mă bruă lehanăn anôk dôk. Brei tŭ mă, msir mghaih jih klei blŭ, klei ksiêm dlăng, tăng mgăl hlăm ala ƀuôn mơ̆ng Anôk bruă mặt trận Việt Nam. Nguyễn Quỳnh Liên, Khua Anôk bruă ngă phŭn mil pô, ksiêm dlăng lehanăn tăng mgăl hlăm yang ƀuôn, Dhar bruă mặt trận čar kwar Việt Nam brei thâo:

"Hmei srăng ksiêm dlăng bruă čih mkra sa klei bhiăn rơ̆ng bruă hluê ngă dŭm klei ba mdah mơ̆ng Anôk bruă mặt trận leh klei ksiêm dlăng, tăng mgăl. Mơ̆ng klei bhiăn anei srăng hnưm mtrŭn klei bhiăn mâo kčah mtrŭn ti Mta 14 hlăm Klei kčah mtrŭn mrô 69 lehanăn dŭm hdră msir ba mdah hlăm Asăp mtrŭn mrô 22 mơ̆ng Anôk kriê dlăng bruă Đảng, čiăng rơ̆ng dŭm anôk bruă brei mâo klei đua klam hlăm bruă hluê ngă klei ba mdah mơ̆ng anôk bruă Mặt trận"

Hdră ksiêm dlăng, tăng mgăl mơ̆ng Anôk bruă mặt trận brei jưh knang hlăm mnuih ƀuôn sang, mđĭ lar klei nao hgŭm, đru mguôp mơ̆ng mnuih ƀuôn sang. Brei mâo klei bhiăn čiăng mnuih ƀuôn sang hluê ngă bruă ksiêm dlăng, tăng mgăl. Mđĭ lar bruă ksiêm dlăng hlăm mnuih ƀuôn sang jing hluê ngă kjăp klei mĭn mơ̆ng Khua gĭt gai Hồ Chí Minh "Mnuih ƀuôn sang jing phŭn”, kñăm mkŏ mjing, mđĭ ai mnuih ƀuôn sang nao hgŭm hlăm bruă ksiêm dlăng êpul bruă đảng, đảng viên đru kơ hdră ksiêm dlăng ba wĭt boh tŭ dưn klă sĭt./.