Hruê mơak “Ktưn hưn hđeh hriăm hră, sinh viên Dak Lak” mkŏ mjing lu  bruă msĕ si mjuăt ktang asei mlei “Phung êdam êra suaih pral”, hdră “Mjĕ mjuk dhar kreh Việt Nam – India”, Klei bi lông blŭ mgăl “Ktưn hưn Việt Nam”, Klei kƀĭn trông “Mđĭ hnơ̆ng tŭ jăk hdră sinh viên 5 jăk”, Klei bi lông “Ênhiang mmuñ phung mda asei”, dŭm hdră hŏng “Sinh viên 5 jăk”, “Hđeh hriăm hră 3 jăk”, “Hđeh hriăm hră 3 mjuăt bi hriăm” lehanăn hdră bi hdơr 75 thŭn Hruê knhuah phung hđeh hriăm hră, sinh viên lehanăn Êpul hgŭm sinh viên Việt Nam.

        Klei êdah êdi mơ̆ng knăm anei jing hdră sinh viên ñŭ kma hŏng tar rŏng lăn, bi mjĕ mjuk dhar kreh Việt Nam – India. Phung sinh viên dưi bi trông, hưn mthâo kơ dhar kreh, knăm mơak lehanăn dŭm anôk hiu čhưn ênguê jăk siam ti Dak Lak lehanăn India, mjĕ mjuk hŏng sinh viên India dôk hriăm ti Sang hră bruă mdrao mgŭn Ƀuôn Ama Thuôt. Sinh Viên Lê Quốc Tuấn, Adŭ hriăm thơ̆ng kơ bruă Duh mkra mnia mblei, Sang hră gưl prŏng Lăn dap kngư brei thâo:

“Anei jing gưl tal êlâo kâo dưi nao hgŭm mjĕ mjuk hŏng ƀĭng găp ala tač êngao msĕ snei. Kâo jing sa čô amâo đei jhŏng ôh ƀiădah leh nao hgŭm hlăm hdră anei kâo ƀuh ƀĭng găp mơ̆ng India jĕ giăm, mhač êdi. Mâo klei găl nao hgŭm hlăm hdră ñŭ kma hŏng ala tač êngao msĕ snei kâo ƀuh jăk êdi, kyua pô dưi mđĭ klei thâo săng, klei thâo blŭ klei ala tač êngao, jhŏng hĭn, dưi bi mjĕ, bi mguôp hŏng lu ƀĭng găp hĭn mơh.

Ƀri gưl anei, bruă Đoàn čar Dak Lak hưn mthâo mkŏ mjing Êpul hgŭm sinh viên 5 jăk gưl čar, bi mni “Hđeh hriăm hră 3 jăk”, “Sinh viên 5 jăk” dŭm gưl hlăm thŭn 2023 – 2024, jao prăk đru hriăm hră “Tuč mngač klei čang hmăng – phung êdam êra Dak Lak”, mđup brei prăk đru hriăm hră kơ phung sinh viên Lao dôk hriăm ti Dak Lak. Amai Phan Thị Trinh, Kơiăng khua bruă Đoàn čar Dak Lak brei thâo, dŭm hdră kñăm mjing tač hlăp jăk kơ phung hđeh hriăm hră, sinh viên, krŭ wĭt ai tiê bi hgŭm mguôp, klei đua klam mơ̆ng phung hđeh.

“Sa tač hlăp jăk kơ phung hđeh nao hgŭm, mjĕ mjuk, mjuăt bi hriăm, ñŭ kma hŏng ƀĭng găp mơ̆ng India lehanăn Lao. Anôk kriê dlăng bruă Đoàn čar ăt mâo dŭm bruă čiăng hrăm mbĭt hŏng phung hđeh 3 jăk, sinh viên 5 jăk, hđeh 3 mjuăt bi hriăm, mguôp hŏng dŭm hnơ̆ng čuăn čiăng kơ phung hđeh dưi mđĭ ai ktang klei suaih pral lehanăn nao hgŭm hŏng êpul bruă đoàn hlăm wưng ti anăp.

Êlâo anăn, bruă Đoàn čar Dak Lak, Êpul hgŭm phung êdam êra Việt Nam čar lehanăn Êpul hgŭm Sinh viên Việt Nam čar mkŏ mjing leh Hdră “Bi tuôm lehanăn bi mni kơ phung sinh viên mnuih djuê ƀiă êdah êdi” čar Dak Lak tal 6.

Hlăm dŭm thŭn êgao, hdră mtrŭn mđĭ kyar bruă duh mkra, dhar kreh ti alŭ wăl krĭng taih kbưi, krĭng mnuih djuê ƀiă mơ̆ng čar Dak Lak mâo leh dŭm boh tŭ jăk siam. Mbĭt hŏng phung êdam êra kluôm ala, phung êdam êra čar Dak Lak lŏ dơ̆ng mñă klă bruă klam, amâo mdei tui hriăm, mjuăt bi hriăm, gĭr ktưn kpưn đĭ hlăm klei hdĭp. Ƀrư̆ hruê ƀrư̆ mâo lu phung êdam êra mnuih djuê ana ƀiă mâo klei thâo, dưn yua klei kreh knhâo ngă bruă kơ Ala čar, kơ ƀuôn sang.

Ti knăm anei, phung sinh viên dưi nao hlăm dŭm bruă msĕ si: Čuh brui mngưi ti Pŏk mdhă bi hdơr kơ phung lĭng kahan Nam Tiến lehanăn dưm kwang mnga ti Knưng bi hdơr Awa Hô; hdră “Tui ksiêm dhar kreh”, Klei kƀĭn trông “Bi trông kơ knhuah dhar kreh siam mơ̆ng sinh viên Dak Lak hlăm hdră ñŭ kma lehanăn đĭ kyar”, bi trông “Bi hgŭm sinh viên hŏng phung mă bruă mnia mblei, anôk bruă duh mkra”. Mơ̆ng anăn, đru kơ phung sinh viên thâo săng klă hĭn kơ boh yuôm dhar kreh alŭ wăl, jhŏng bi trông, mlih mrâo, đru mguôp klei blŭ hlăm hdră dhar kreh, ala ƀuôn, đru mguôp hlăm hdră mđĭ kyar mơ̆ng čar. Sinh viên H Uyên Byă, Sang hră gưl prŏng  Sư phạm Ƀuôn prŏng Hồ Chí Minh brei thâo:

       “Dŭm hdră bruă hruê anei đru kơ adei thâo săng hĭn kơ boh tŭ yuôn dhar kreh ti anôk pô kkiêng. Klei anei ngă kơ kâo hĭn mơh lŏ čiăng wĭt ti ƀuôn sang pô lehanăn mđĭ kyar kâo pô čiăng đru kơ ƀuôn sang đĭ kyar hĭn, hruê anei kâo mơak êdi kyua kâo jing sa hlăm dŭm čô sinh viên mnuih djuê ƀiă dưi bi mni.

       Ƀri gưl anei, Êpul hgŭm sinh viên Việt Nam čar Dak Lak bi mni leh kơ 50 čô sinh viên mnuih djuê ƀiă êdah êdi hlăm thŭn hriăm 2023 – 2024. Mkŏ mjing hdră hưn mthâo Êpul hgŭm jiă knhuah dhar kreh sinh viên Dak Lak. Êpul hgŭm dưi mkŏ mjing kñăm mjing tač hlăp jăk, đru kơ phung êdam êra mâo klei găl tui ksiêm, kriê pioh kjăp boh tŭ yuôm dhar kreh đưm mơ̆ng djuê ana pô./.