Hlăm klei hriăm mjuăt ala čar mkŏ mjing mơ̆ng hruê 21/8 truh hruê 1/9 ti 8 čar ti Kwar Krah- Lăn Dap Kngư ƀuh 280 klei kƀah hlăm bruă hgăm klei hâo hưn, hlăm anăn mâo 202 klei hmăi kjham, lu hĭn dua blư̆ mkă hŏng klei thâo ƀuh hlăm gưl hriăm mjuăt thŭn 2022.

Klei anei brei ƀuh, dŭm gưl arăng ngă jhat hlăm êlan internet ƀrư̆ hruê ƀrư̆ lu, hnơ̆ng ngă mnêč leh anăn dleh ktuê dlăng đĭ lu. Phung mă bruă răng mgang klei êđăp ênang hlăm êlan internet brei mâo klei thâo leh anăn hdră mnêč dưi hriăm mbŏ. Klei hriăm mjuăt jing sa hlăm dŭm hdră msir tŭ dưn hlăm bruă mđĭ klei thâo kơ êpul rơ̆ng bruă klam êđăp ênang hlăm internet leh anăn msir mgaih klei anei.  Klei hriăm mjuăt rơ̆ng êđăp ênang klei hâo hưn Kwar Krah- Lăn Dap Kngư thŭn 2023 mkŏ mjing hlăm 5 hruê.  Phung nao hlăm klei hriăm jing bruă hâo hưn dôk ngă bruă ti Dak Lak.