Jing đảng viên mda asei ti anôk bruă Đảng alŭ Dă Nghit, să lat, kdriêk Lạc Dương, čar Lâm Đồng, ayŏng Čil Ha Sip, mnuih K’Ho dưi hmar hyuă kjăp hdră mtrŭbn mrô 34 mơ̆ng êpul khua bruă Đảng čar Lâm Đồng, bi lar ai tiê bruă klam, mbruă, jhŏng mĭn, jhŏng ngă kyua boh tŭ dưn kơ yang ƀuôn. Êngao kơ bruă bi leh dŭm bruă klam dưi jap ti anôk bruă sang čư̆ êa să, Čil Ha Sip lo hur har čoh bruă ngă hma, dưn yua klei bi hmô pla mjing hơĭt kjăp leh anăn mtrŭt mjhar mnuih ƀuôn sang hlăm alŭ wăl hluê ngă. Ară anei să Lat dưi mkŏ mjing leh êpul hgŭm bruă mkra mjing kphê doh hŏng dŭm pluh gŏ sang ƀĭng ngă lŏ hma jing mnuih djuê ƀiă nao hgŭm.

 “Leh dưi hyuă kjăp asăp mtrŭn mrô 34 kơ dŭm bruă đảng viên čiăng ngă, dŭm klei čiăng ñĕ hmei dưn yua leh hlăm klei hdĭp pô. Bi hmô čiăng kơ grăp čô hlăm gŏ sang leh anăn phung riêng gah hluê ngă mbĭt”.

          Ăt msĕ hŏng Čil Ha Sip, phung đảng viên hlăm anôk bruă đảng Păng Tiêng, să Lat ăt thâo săng klă kơ bruă klam ba anăp mơ̆ng đảng viên hlăm bruă hluê ngă asăp mtrŭn mrô 34 mơ̆ng Êpul khua bruă Đảng čar Lâm Đồng. Hluê si Rơ Ông K’Thiên, khua bruă Đảng alŭ Păng Tiêng, êngao kơ 4 klei srăng ñĕ mâo: ñĕ kơ klei ngă soh, mă ƀơ̆ng kơ pô, mplĕ kơ pô mkăn, huĭ đua klam, nĕ kơ klei mă bruă khă bi mâo, amâo mâo ba wĭt boh tŭ dưn….phung đảng viên hlăm anôk bruă bi lar 3 mta klei srăng ngă anăn jing: blŭ nao mbĭt hŏng mă, ngă djŏ kyua boh tŭ mbĭt, mă hŏng jih ai tiê, mlih mrâo, ba wĭt boh tŭ dưn hĭn, hnơ̆ng jăk hĭn. Rơ Ông K’Thiên lač:

“Bruă Đảng să ba mdah leh asăp mtrŭn mrô 34 mơ̆ng bruă Đảng čar truh hŏng grăp čô đảng viên leh anăn grăp anôk bruă đảng alŭ ƀuôn. Mơ̆ng anăn, dưi hluê ngă kluôm êlam asăp mtrŭn anei hlăm dŭm mmông kƀĭn bruă Đảng alŭ ƀuôn, wăt hlăm dŭm mmông kƀĭn mơ̆ng êpul êya. Mơ̆ng anăn, phung đảng viên leh anăn mnuih ƀuôn sang hlăm alŭ ƀuôn mâo klei sa ai hlăm dŭm mta phŭn mơ̆ng asăp mtrŭn leh anăn hur har hluê ngă, klei hdĭp mnuih ƀuôn sang mâo klei mlih, mâo klei bi mguôp hĭn”.

Să Lat, kdriêk Lạc Dương mâo êbeh 70% jing mnuih djuê ƀiă, hdĭp mda hŏng bruă lŏ hma pla djam mtam leh anăn kphê. Khădah hmăi mơ̆ng klei dleh dlan mbĭt mơ̆ng lăn čar, ƀiădah bruă duh mkra ala ƀuôn mơ̆ng alŭ wăl dưi rơ̆ng kơ klei đĭ kyar. Hlăm anăn, hnư hrui wĭt kah knar grăp čô mâo giăm 50 êklăk prăk hlăm sa thŭn, đĭ 5 êklăk prăk mkă hŏng akŏ thŭn 2024, hnơ̆ng gŏ sang ƀun ăt hrŏ adôk 2,6%, hdră mkŏ mkra krĭng ƀuôn sang mrâo bna wĭt boh tŭ dưn hŏng 17/19 hnơ̆ng čuăn dưi bi leh.

Hluê si Lơ Mu Ha John, k’iăng khua bruă Đảng să Lat, kdriêk Lạc Dương, čar Lâm Đồng, boh tŭ anei anei mâo klei đru mguôp yuôm bhăn mơ̆ng bruă hmao hluê ngă leh anăn bi lar Asăp mtrŭn mrô 34 hlăm phung đảng viên leh anăn dŭm gưl mnuih ƀuôn sang.

 “Leh asăp mtrŭn mrô 34 dưi hluê ngă kluôm, jih jang phung knuă druh, đảng viên leh anăn mnuih ƀuôn sang bi sa ai, bi hluê ngă jăk dŭm mta bruă čiăng ngă, čiăng ñĕ đuê̆. Hluê anăn, mnuih ƀuôn sang lŏ đăo knang hĭn hlăm dŭm hdră êlan mơ̆ng Đảng leh anăn knŭk kna.”

Mbĭt hŏng asăp mtrŭn mrô 34, Êpul khua bruă Đảng čar Lâm Đồng ăt lŏ dơ̆ng hluê ngă klei bi klă mtô 21, hruê 25/10/2021 mơ̆ng êpul khua bruă Đảng gưl dlông kơ bruiă mtrŭt mđĭ hluê ngă gru mngač Hồ Chí Minh leh anăn bruă klam bi hmô mơ̆ng phung knuă druh, đảng viên, tal êlâo jing phung ba anăp. Mơ̆ng anăn mkŏ mjing klei mlih hrăm mbĭt, klă sĭt kơ klei thâo săng leh anăn hdră ngă bruă mơ̆ng dŭm gưl bruă Đảng, bruă sang čư̆ êa, knuă druh, đảng viên hlăm bruă hluê ngă djŏ hdră bhiăn mơ̆ng Đảng, knŭk kna, mkŏ mjing boh kdrŭt mrâo mtrŭt mđĭ klei hdĭp hlăm dŭm ƀuôn êlan, bruă duh mkra ala ƀuôn mơ̆ng alŭ wăl đĭ kyar.