
Sang khua mduôn Kra Jăn Ha Xuyên ti wăl krah alŭ Đa Tế, să Đă Mrông, kdriêk Dam Rông yan anei hmư̆ ênai hluăt mrai ƀơ̆ng hla. 75 thŭn, ƀiădah ñu ăt nao ti hma kriê dlăng ana boh kroh, pĕ hla rông hluăt mrai.
Ƀiă mnuih bi mĭn khua mduôn mâo kơhưm ti alŭ Đa Tế ară anei, tuôm jing sa čô Fullro kmeh gơ̆ng. 50 thŭn êlâo, hlăk mrâo 25 thŭn, ñu tuôm mâo êpul bruă bi kdơ̆ng anei mđĭ grat jing “Trung tá” leh anăn jing “Khua kahan krĭng 4 gưl dlông”, “Khua čar Langbiang”.

Khădah snăn, leh giăm 12 thŭn hdĭp hlăm dliê kpal, ñu čŏng wĭt hŏng êpul êya. Klei thâo pap mơ̆ng bruă sang čư̆ êa alŭ wăl leh anăn kiê kngan mnuih ƀuôn sang khăp hơiêng, đru leh kơ Kra Jăn Ha Xuyêng lŏ mkŏ mjing sa klei hdĭp, lŏ mă kơhưm pô.
“12 thŭn kbưi hŏng mô̆, anak, hruê anei tinei hruê mgi ti adih, atăt klei hdĭp hlăm klei rai luč. Snăn kâo pô wĭt yơh. Hlăk anăn huĭ kơ arăng mă nao bi hriăm, dôk hlăm sang mnă, kâo huĭ snăk. Ƀiădah leh wĭt kơ ƀuôn sang, tal êlâo ti kahan ksiêm čar Lâm Đồng, hlăk anăn khua jing Vũ Linh. Dôk tinăn snăn huă mnăm jăk snăk, amâo nao hriăm mjuăt ôh, kăn arăng ngă jhat rei. Mă bruă jing mkăp boh klei, bi leh bruă klam snăn Lâm Đồng ba wĭt kơ alŭ wăl Lạc Dương. Hlăk anăn ăt mâo sa hră mơar mơ̆ng kahan ksiêm jing brei dăp bruă mă kơ ayŏng Ha Xuyên. Leh anăn ngă Khua bruă mặt trận să Dă Mrông, leh anăn dưi ngă khua kriê dlăng bruă knơ̆ng kdơ̆ng êa, klam bruă knơ̆ng kdơ̆ng êa mơ̆ng alŭ wăl”.

Amâo djŏ knŏng hjăn Ha Xuyên, lu mnuih tuôm hlue leh Fuklro leh wĭt kơ sang mâo bruă sang čư̆ êa alŭ wăl ti Lâm Đồng mjing klei găl mkra mjing, hơĭt klei hdĭp mda. Hlue si Liêng Hót Ha Hai – K’iăng Khua Knơ̆ng bruă sang čư̆ êa kdriêk Dam Rông, diñu dưi dưn hdră êlan đru ba ala ƀuôn msĕ si gŏ êsei ƀun, čan prăk, đru ana mjeh, mnơ̆ng rông, mdơ̆ng sang mơ̆ng dŭm hdră kñăm ala čar. Mơ̆ng phung tuôm dôk ti êngao ala ƀuôn, ară anei diñu jing leh phung kmeh gơ̆ng bi hgŭm, đru lăm lui klei bhiăn kthŭl mluk leh anăn mđĭ bruă mkra mjing:
“Êlâo dih, wưng anăn diñu čhuai êlan ngă soh snăn, leh wĭt hŏng klei hdĭp aguah tlam, hŏng êpul êya snăn diñu ăt hdĭp msĕ si mnuih ƀuôn sang mkăn. Tơdah digơ̆ jing phung hlăm gŏ êsei ƀun snăn diñu ăt dưi dưn hdră êlan kơ gŏ êsei ƀun. Diñu ăt mâo mđing uêñ, ăt mâo đru, prăk mkra mjing, blei ana mjeh, mnơ̆ng rông. Leh anăn mjing klei găl kơ diñu mkra sang dôk hlue si Hdră kñăm ala čar, Hdră kñăm lăm lui sang tĭ, ƀrôč mơ̆ng knŭk kna. Hlăm ênoh anăn, mâo đa đa jing mnuih mâo kơhưm, mâo asăp blŭ hlăm êpul êya, jing mnuih ƀuôn sang jăk, bi hmô hlăm bruă lăm lui klei kthŭl mluk, mtô kơ mnuih ƀuôn sang, mkra mjing, kreh kriăng, thâo gĭr”.

Mbĭt hŏng Dam Rông, ti dŭm alŭ wăl mkăn msĕ si Lạc Dương, Lâm Hà, Đức Trọng, Di Linh…, bruă lŏ đru kơ phung tuôm nao ngă Fulro lŏ wĭt hŏng ƀuôn sang mâo pŏk ngă hrăm mbĭt. Phung tuôm soh čhuai lŏ wĭt amâo djŏ knŏng đru kơ bruă mdrao mgŭn ôh, duh ƀơ̆ng, sang dôk, mjing klei găl mđĭ kyar msĕ si mnuih ƀuôn sang mkăn ôh.

Hlue si Thượng tá Lê Công Duy – Kahan ksiêm čar Lâm Đồng, boh sĭt mđĭ kyar ƀuôn sang leh anăn klei lar bra ktang hlăm êpul êya jing mta yuôm bhăn, đru kơ phung soh čhuai lŏ ƀuh klei yuôm bhăn hlăm klei hdĭp.
“Dŭm hdră êlan đru kơ klei hdĭp mda ala ƀuôn msĕ si mdrao mgŭn, đru kơ ana pla mjing, mnơ̆ng rông amâo mâo klei bi kah mbha ôh. Anôk bruă kahan ksiêm khăng bi tuôm hŏng diñu leh anăn ƀuh klei hdĭp dleh dlan snăn srăng kčĕ hŏng bruă sang čư̆ êa să, mđing msir mgaih. Kyua anăn diñu lŏ wĭt hlăm klei hdĭp êpul êya, hŏng ƀuôn sang, hơĭt ai tiê mă bruă knuă, mkra mjing. Dưi lač diñu jing sa hlăm phung jih ai tiê čiăng krơ̆ng kjăp boh klei hlăm krĭng mnuih djuê ƀiă, amâo brei Fulro lŏ wĭt mâo ti alŭ wăl Lâm Đồng”.
Boh sĭt brei ƀuh, Lâm Đồng jing sa hlăm dŭm anôk mngač ti Lăn Dap Kngư kơ hdra êlan đru nah tluôn, bi đru kơ phung tuôm soh čhuai wĭt hŏng klei hdĭp aguah tlam. Kyua ai klei jăk, mơ̆ng jih bruă sang čư̆ êa alŭ wăl leh anăn grăp êpul êya alŭ ƀuôn mjing leh krĭng lăn êđăp ênang ti krah dap kngư- anôk phung tuôm soh čhuai ară anei dôk kjăp, đru mguôp jăk kơ klei đĭ kyar mơ̆ng ƀuôn sang, mđĭ klei bi hgŭm jih jang djuê ana./.
Viết bình luận