Mơ̆ng êlâo kơ tết nguyên đán truh kơ ară anei, đang dliê hngô jing anôk ênưih lĕ hlăm klei pui ƀơ̆ng, anăn jing čuê dliê mrô 263 dôk hlăm să Phúc Thọ, kdriêk Lâm Hà (Lâm Đồng) mâo nanao êpul răng mgang dliê Lâm Hà lehanăn dŭm gŏ êsei tŭ mă phăn jao răng mgang dliê bi suang răng, dăp nanao mnuih bi gak răng kăp dlăng huĭdah mâo klei pui ƀơ̆ng dliê. Tui si Dương Thanh Quang, khua êpul kiă kriê mrô 5, Hlăm êpul kiă kriê dliê Lâm Hà, mơ̆ng akŏ yan bhang mtam, knuă druh čuê dliê tiŏ nao mnuih jah waih rơ̆k rung, ƀur kyâo, lehanăn mkra pưk gak răng dliê:

 “Phung ayŏng adei hmei bi mbha bruă, nao bi ksiêm dlăng jih jang êpul tŭ mă phăn jao dliê mkŏ mjing klei gak răng hrue lehanăn mlam. Lŏ tiŏ nao lu êpul bi đru hiu suang răng hrue wăt mlam yợh”.

        Lâm Hà mâo êbeh 34.000 ha dliê, lu jing dliê pla, sir knông hŏng dŭm anôk ngă đang hma mơ̆ng mnuih ƀuôn sang, kyuanăn jing hyưt snăk hŏng pui. Hồ Nghĩa Nam, K’iăng khua anôk bruă kiă kriê dliê Lâm Hà brei thâo, mbĭt hŏng bruă mđĭ hĭn klei hiu gak răng, mkŏ mjing lehanăn ngă djăp bruă bi gang mkhư̆ klei pui ƀơ̆ng dliê, hlăk mâo êpul êya bruă dôk mđing.

 “Êpul bruă kiă kriê dliê lŏ mkra wĭt pưk gang răng dliê, lehanăn mprăp djăp mta mnơ̆ng pioh kơ bruă gang mkhư̆ klei pui ƀơ̆ng dliê. Ară anei dŭm êpul truăn kơ bruă mâo ngă leh dŭm mta bruă rơ̆ng hlăm thŭn 2023 amâo mâo tuôm hŏng klei pui ƀơ̆ng dliê ôh”.

      Lâm Đồng jing alŭ wăl mâo lu ênhă dliê hngô, lehanăn dŭm đang dliê pla mkăn ênưih snăk pui ƀơ̆ng, hŏng ênhă jih jang êbeh 513.000 ha. Mrâo mŭt hlăm yan bhang không, ƀiădah hlăm čar mâo leh 3 pui ƀơ̆ng rơ̆ng krô ti gŭ êyui kyâo. Kyua pral hmao ƀuh lehanăn truih mdjiê hĕ snăn amâo mâo truih kơ klei luič liê prŏng ôh. Ară anei yan adiê ti Lâm Đồng hlăk dôk hlăm klei thu krô, mđiă bhang hlơr, jing ênưih snăk kơ klei pui ƀơ̆ng dliê. Knơ̆ng bruă sang čư̆ êa čar Lâm Đồng mâo leh lu hră mơar mtrŭt mjhar dŭm êpul êya bruă djŏ tuôm brei mâo klei mđing răng nanao, lehanăn ngă hŏng lu hdră kñăm dưi răng kriê dliê bi jăk./.