Mơ̆ng lu mlan hŏng anei, K’Sáu, Khua alŭ K’Rèn, să Hiệp Thạnh, čar Lâm Đồng kreh mtô mblang kơ Hdră bhiăn ruah khua, mñă kơ klei bhiăn mtăp mđơr, mplĕ hră mbĭt anăn hưn mthâo kơ hnơ̆ng čuăn mgơ̆ng ruah, hdră bi kƀĭn, bi mklă anăn. Hluê ayŏng K’Sáu, bruă hluê ngă djŏ hdră srăng đru rơ̆ng hdră ruah khua mkŏ mjing hruê 15/3 kơ anăp anei dưi rơ̆ng klei ngă phŭn mil pô, djŏ hdră bhiăn, êđăp ênang lehanăn mnuih ƀuôn sang hlăm alŭ dưi ruah mnuih mâo djăp klei năng.

“Hŏng klei thâo mơ̆ng kâo jing mtô mblang kơ mnuih ƀuôn sang hdră ruah khua, klei kơ mnuih mă bruă. Ƀuh mnuih ƀuôn sang mơak mơh hmư̆ klei hâo hưn. Mrâo êgao mkŏ mjing Klei bi kbĭn hlăm alŭ mâo 2 čô, 1 êkei 1 mniê čiăng mgơ̆ng ngă pô bi ala Êpul gơ̆ng bruă ƀuôn sang să anăp anei. Mnuih ƀuôn sang sa ai mơh”.

Ti čar Lâm Đồng, čiăng mnuih ƀuôn sang thâo kơ klei hâo hưn hdră ruah khua, bruă Đảng, Mặt trận čar kwar lehanăn dŭm êpul kđi čar – ala ƀuôn ksiêk kjăp, ênŭm Asăp mtrŭn mrô 46 hruê 16/5/2025 mơ̆ng Phŭn bruă kđi čar, Asăp mtrŭn mrô 02 hruê 23/9/2025 mơ̆ng Anôk dlăng bruă Đảng čar kơ hdră ruah phung bi ala bruă kƀĭn ala gưl XVI lehanăn bi ala Êpul gơ̆ng bruă ƀuôn sang dŭm gưl wưng thŭn 2026 – 2031. Mơ̆ng anăn Mặt trận čar kwar lehanăn dŭm êpul kđi čar – ala ƀuôn bi hgŭm hŏng anôk bruă djŏ tuôm mđing mtô mblang dŭm mta mrâo mơ̆ng Hdră bhiăn phŭn thŭn 2013 leh mkra mlih, thiăm mbŏ dŭm mta lehanăn Hdră bhiăn mkŏ mjing bruă knŭk kna alŭ wăl mkra mlih; Hdră bhiăn mkra mlih, thiăm mbŏ dŭm mta hlăm Hdră bhiăn ruah phung bi ala bruă kƀĭn ala lehanăn bi ala Êpul gơ̆ng bruă ƀuôn sang, dŭm mta hră mơar, klei gĭt gai, ktrâo lač mơ̆ng dŭm anôk bruă, êpul êya djŏ tuôm, mơ̆ng Êpul hgŭm ruah khua ala čar…Mai Linh Sơn, Khua Dhar bruă mặt trận să Dran, čar Lâm Đồng brei thâo:

“Mặt trận bi hgŭm hŏng Knơ̆ng bruă, Adŭ bruă Dhar kreh hâo hưn mkŏ mjing hdră mtô mblang. Tal dua jing mblang hluê kdrăp zalo lehanăn hluê dŭm klei kƀĭn mă klei blŭ mơ̆ng mnuih ƀuôn sang ti anôk diñu dôk čiăng rơ̆ng klei dưi lehanăn bruă klam djŏ Hdră bhiăn ruah khua. Rŏng mnuih ƀuôn sang thâo klă dŭm mta djŏ tuôm kơ klei đua klam mơ̆ng mnuih ƀuôn sang hluê ngă ênŭm bryă klam mkŏ mkra bruă sang čư̆ êa. Si srăng ngă čiăng phung bi ala năng jing pô bi ala kơ klei mĭn, klei čang hmăng mơ̆ng mnuih ƀuôn sang”.

 Trần Hùng Dũng, Khua knơ̆ng bruă sang čư̆ êa să Đơn Dương, čar Lâm Đồng brei thâo:

“Hluê hŏng kdrăp bi kčaĭ asăp leh kơnăn hlăm kdrăp hâo hưn điện tử lehanăn dŭm hdră mkăn dưi mtô mblang êlam truh kơ jih jang mnuih ƀuôn sang ti alŭ wăl. Mơ̆ng anăn, mnuih ƀuôn sang ăt thâo săng klei đua klam, klei yuôm mơ̆ng hdră ruah khua kyua anăn nao hgŭm hlăm hdră anei čiăng đru mguôp kơ bruă mkŏ mjing hdră ruah pô bi ala bruă kƀĭn ala lehanăn Êpul gơ̆ng bruă ƀuôn sang dŭm gưl hlăm wưng ti anăp dưi mkŏ mjing jăk siam.

Čiăng kơ hruê ruah phung bi ala bruă kƀĭn ala lehanăn Êpul gơ̆ng bruă ƀuôn sang dŭm gưl hruê 15/3 kơ anăp anei dưi mkŏ mjing êđăp ênang, ngă phŭn mil pô, klă sĭt jing hdră bi mjĕ mjuk bruă kđi čar, jing “Hruê mơak lăn êa”, leh Klei bi kƀĭn tal 3 êgao, hdră mtô mblang kơ bruă kđi čar yuôm bhăn mơ̆ng ala čar anei mâo leh Lâm Đồng mtrŭt mđĭ kñăm mjing klei sa ai hlăm mnuih ƀuôn sang.

Mbĭt hŏng hdră mtô mblang truh kơ mnuih ƀuôn sang, 124 să, ƀuôn hgŭm mkŏ dưm leh êbeh 2.600 kdrăp panô mtô mblang kơ klei ruah khua, yuôl êbeh 3000 blah hla čhiăm gru, kdrăp bi kčaĭ asăp gưl nah gŭ mđung klei hâo hưn kơ Hdră bhiăn ruah khua, klei dưi lehanăn bruă klam mơ̆ng mnuih ƀuôn sang. Ti dŭm ktuê êlan, wăl anôk siam ti ƀuôn hgŭm Xuân Hương- Đà Lạt, Bắc Gia Nghĩa, Phan Thiết, Hàm Thắng… mkŏ mjing dŭm anôk mtô mblang kơ hdră ruah khua mjing ai êwa hơ̆k mơak, đru mđĭ klei thâo săng kơ mta kñăm, boh tŭ yuôm, klei dưi, bruă klam mơ̆ng mnuih ƀuôn sang.

Phạm Thị Phúc, Koiăng khua bruă Đảng, Khua bruă mặt trận čar Lâm Đồng brei thâo, ti dŭm  să krĭng taih kbưi, alŭ wăl mâo lu mnuih djuuê ƀiă hdĭp mda, hdră mtô mblang kơ klei ruah khua ba wĭt leh boh tŭ dưn klă sĭt, Mặt trận mđĭ lar leh bruă klam mơ̆ng 900 čô mnuih mâo kơhưm, phung khua kiă kriê klei đăo hlăm bruă hrăm mbĭt hŏng anôk bruă sang čư̆ êa alŭ wăl.

“Mặt trận mâo bruă klam phŭn hlăm klei bi hgŭm hŏng dŭm knơ̆ng, dhar bruă, anôk bruă djŏ tuôm bi mjtrŭt mjhar, mjuăt bi hriăm, mkăp klei hâo hưn čiăng tă hdră êlan kơ mnuih mâo kơhưm, phung khua kiă kriê klei đăo hlăm krĭng đăo, krĭng mnuih djuê ƀiă bi hgŭm hlăm hdră mtô mblang, mtrŭt mjhar. Kreh mtô mblang, hâo hưn lehanăn mjuăt bi hriăm čiăng lŏ dơ̆ng mđĭ lar. Hŏng phung kiă kriê klei đăo brei krơ̆ng kjăp klei bi mjĕ, hgŭm mguôp lehanăn mâo klei bi mguôp kjăp hŏng alŭ wăl hlăm hdră mtô mblang, mtrŭt mjhar”.

Hŏng klei bi hgŭm kjăp mơ̆ng bruă kđi čar, klei pral hlăm hdră mtô mblang, mbĭt hŏng ai tiê đua klam, klei sa ai mơ̆ng phung knuă druh, đảng viên lehanăn mnuih ƀuôn sang, čar Lâm Đồng dôk mprăp kơ hruê mơak prŏng mơ̆ng jih jang djuê ana 15/3. Mơ̆ng dŭm krĭng taih kbưi truh kơ ƀuôn prŏng, ai êwa mđing truh hriê mơak ruah phung bi ala bruă kƀĭn ala gưl XVI lehanăn Êpul gơ̆ng bruă ƀuôn sang dŭm gưl wưng thŭn 2026 – 2031 ti čar Lâm Đồng dưi mđĭ lar ktang phĭt.