Klei kƀĭn trông mñă klă, hlăm wưng êgao Đảng leh anăn knŭk kna amâo mâo mdei uêñ mĭn duh bi liê kơ lu hdră hlăm krĭng mnuih djuê ƀiă, boh nik jing hdră ala čar kñăm kơ bruă mkŏ mkra krĭng ƀuôn sang mrâo đru leh kơ krĭng ƀuôn sang mâo lu klei mlih, klei hdĭp mnuih ƀuôn sang dưi mđĭ hĭn.

Hnơ̆ng gŏ sang ƀun hrŏ pral ară anei knŏng adôk ti gŭ 2%, hlăm anăn gŏ sang ƀun hlăm krĭng mnuih djuê ƀiă adôk 5,4%, hrŏ êbeh 3% mkă hŏng thŭn 2023. Čiăng lŏ dơ̆ng mtrŭt mđĭ klei đĭ kyar bruă duh mkra leh anăn klei hdĭp, bi ala dŭm gưl mnuih ƀuôn sang hlăm krĭng mnuih djuê ƀiă ti čar Lâm Đồng mâo leh lu klei bi êdah, msĕ si čiăng mđing mgaih msir bruă mă hŏng anak čô mnuih djuê ƀiă leh jih hriăm gưl prŏng, gưl krah dưh, bruă mtô mjuăt bruă mă čiăng găl guôp hŏng boh sĭt, đru mkŏ mjing klei bi hmô hdră duh ƀơ̆ng mđĭ kyar klei hdĭp mda gŏ sang čiăng lŏ pŏk mlar.