Knơ̆ng bruă sang čư̆ êa čar Lâm Đồng gĭt gai dŭm kdriêk, ƀuôn prŏng Đà Lạt leh anăn Bảo lộc lŏ dơ̆ng ksiêm dlăng, ktuê dlăng jih jang dŭm wăl mnuih ƀuôn sang, sang hră, anôk bruă mdrao mgŭn, anôk bruă lĭng kahan ti krĭng ktuê hang  krông, krĭng kčŭn čư̆ čiăng hmao thâo ƀuh, hưn brei răng krĭng mâo klei huĭ klưh hroh, êa lip, êngăp êa.

Boh nik, Knơ̆ng bruă sang čư̆ êa čar Lâm Đồng mtă kơ dŭm alŭ wăl hlăm čar gĭr mbĕ đuĕ mtam dŭm gŏ êsei, phung mă bruă hlăm anôk bruă ti krĭng jơ̆ng čư̆, krĭng mâo hnơ̆ng čư̆ dlông huĭ hyưt, huĭ klưh hroh lăn kñăm rơ̆ng êđăp ênang kơ klei hdĭp mda leh anăn ngăn drăp. Mbĭt anăn, pral mâo hdră dăp, bi đru, hơĭt kjăp anôk đuĕ dăp leh anăn klei hdĭp mda kơ dŭm gŏ êsei mbĕ đuĕ. Hjăn krĭng kčŭn čư̆ Bảo Lộc, brei mâo hdră msir gak răng jing hruê mlan hlăm boh klei yan adiê amâo jăk, msir mgaih mkŏ wĭt êlan klông pral hĭn tơdah mâo klei truh./.