Truh kơ ară anei, kluôm ênoh ngăn prăk duh bi liê kơ bruă hiu čhưn ênguê nao mbĭt hŏng bruă lŏ hma mơ̆ng čar Lâm Đồng hlăm brô 377 êklai prăk, ti ênhă êlan êbeh 300ha. Hlăm anăn, mâo 212ha lăn lŏ hma, 9ha lăn mkŏ mkra, dŭm adôk jing ênhă lăn mkăn. Ƀiădah, leh giăm 2 thŭn čar Lâm Đồng ba mdah hdră êjai kơ bruă duh bi liê leh anăn kriê dlăng bruă hiu čhưn ênguê nao mbĭt hŏng bruă lŏ hma ti alŭ wăl, lu boh klei dleh kpăk lŏ mâo nanao.

Klă klơ̆ng, mbĭt hŏng 33 anôk hiu čhưn ênguê nao mbĭt hŏng bruă lŏ hma mâo čar brei klei dưi ngă bruă êjai êlâo anăn, dŭm pluh anôk bruă hiu čhưn ênguê nao mbĭt hŏng bruă lŏ hma ăt mâo lu klei dleh kpăk, ka mâo klei hrăm mbĭt, sa ai hlăm klei ngă bruă. Boh nik jing klei ngă hră mơar knŭk kna, rơ̆ng kơ dŭm hnơ̆ng čuăn hlăm bruă rŭ mjing, čuăk mkă lăn, čuăl mkă bruă mkŏ mkra, hnơ̆ng bruă mkŏ mkra mâo čuôr ti lăn bruă lŏ hma, mlih lăn bruă lŏ hma jing bruă mkăn. Klei anei jing leh klei kpăk prŏng hĭn ngă kơ hdră mkăp bruă hiu čhưn ênguê nao mbĭt hŏng bruă lŏ hma ka dưi hluê ngă ôh, amâodah ka duh bi liê djŏ hnơ̆ng, ka dưi rơ̆ng hnơ̆ng čuăn bi djăp ênŭm klei čuă dlăng mơ̆ng phung tuê.

        Hluê si aduôn Đoàn Ngọc Bích, khua kiă kriê knơ̆ng bruă duh mkra mnia mblei Tám Trình, ti kdriêk Lâm Hà, čar Lâm Đồng, êngao kơ dŭm klei dleh dlan anăn, boh klei brei kơ phung tuê dưi jưh mdei ti anôk hiu čhưn ênguê nao mbĭt hŏng bruă lŏ hma ăt čiăng mâo čar lŏ ksiêm dlăng leh anăn bi klă.

 “Wăl hiu čhưn ênguê mơ̆ng anôk bruă djŏ tuôm hŏng kphê. Mta kñăm jing čiăng kơ phung tuê hriê čuă dlăng kơ bruă mkra mjing kphê, đeh kwă kphê si ngă. Ƀiădah ăt dôk tuôm hŏng klei dleh kpăk hlăm hră mơar. Mbĭt anăn, bruă hiu čhưn ênguê nao mbĭt hŏng bruă lŏ hma amâo mâo ôh klei jưh mdei, phung tuê mơ̆ng ala tač êngao hriê ti Việt Nam čiăng dôk ti nei lui diñu ksiêm hriăm. Anăn jing 1 hlăm dŭm klei êmuh prŏng mơ̆ng bruă hiu čhưn ênguê nao mbĭt hŏng bruă lŏ hma anei”.

            Lâm Đồng jing alŭ wăl tal êlâo hlăm kluôm ala lông ngă klei bi hmô bruă hiu čhưn ênguê nao mbĭt hŏng bruă lŏ hma. Phạm S, k’iăng khua bruă sang čư̆ êa čar Lâm Đồng, mñă klă, ară anei bruă hiu čhưn ênguê anei dưi bi lar leh klei găl, dưn yua tŭ dưn bruă hiu čhưn ênguê anei mkŏ mjing leh dŭm mta mnơ̆ng dhơ̆ng bruă lŏ hma, đru kơ bruă hiu čhưn ênguê, mgaih msir bruă mă, mđĭ hnư hrui wĭt leh anăn hưn mdah boh mnga bruă lŏ hma mơ̆ng alŭ wăl. Kyuanăn, mbĭt hŏng bruă mjêč tui duah dŭm hdră êlan ruh mgaih klei dleh dlan, êgun kpăk, Lâm Đồng ăt čiăng mkŏ mjing dŭm klei čuăn klă klơ̆ng čiăng mtrŭt mđĭ bruă hiu čhưn ênguê nao mbĭt hŏng bruă lŏ hma dưi đĭ kyar hŏng tur knơ̆ng rơ̆ng ngă djŏ dŭm mta mtrŭn hlăm klei bhiăn ala čar. Phạm S, lač:

 “Hlăm wưng êgao, čar mâo 33 anôk hiu čhưn ênguê nao mbĭt hŏng bruă lŏ hma, ƀiădah hnơ̆ng klei duh bi liê, boh prŏng ka mâo ôh leh anăn mnơ̆ng dhơ̆ng bi msĕ plah wah dŭm čar. Hlăm wưng kơnăp, čar mâo hdră tă tal êlâo, mtrŭt mjhar dŭm klei bi hmô mâo ênhă prŏng hĭn, rơ̆ng kơ ênhă duh bi liê dŭm anôk bruă mkŏ mkra, mnơ̆ng dhơ̆ng amâo mâo msĕ, mâo knhuah klei mbruă, djŏ guôp hŏng wăl anôk mnia mblei, klei mlih yan adiê. Dŭm anôk mkăn amâo mâo klei găl dưi ngă, Lâm Đồng mâo klei găl srăng mtrŭt mjhar, bi lar čiăng mkŏ mjing mnơ̆ng dhơ̆ng bruă hiu čhưn ênguê phŭn leh anăn đĭ kyar kjăp hlăm mgi dih”.

Knhal jih thŭn 2022 mrâo êgao, knơ̆ng bruă Dhar kreh mjuăt ktang asei mlei leh anăn hiu čhưn ênguê čar Lâm Đồng mkŏ mjing leh klei kƀĭn trông bi klă leh anăn ba mdah dŭm hdră êlan hluê ngă bruă hiu čhưn ênguê nao mbĭt hŏng bruă lŏ hma. Blŭ hlăm klei kƀĭn, Phạm S lač, hlăm wưng êgao, čar Lâm Đồng jing sa hlăm dŭm alŭ wăl ba anăp hlăm kluôm ala kơ klei mđĭ kyar bruă hiu čhưn ênguê nao mbĭt hŏng bruă lŏ hma, hluê anăn dưi bi lar rup klei hiu čhưn ênguê, klei siam leh anăn dhar kreh mnuih Đà Lạt – Lâm Đồng, iêo jak lu phung tuê hiu čhưn ênguê, mkŏ mjing bruă mă leh anăn hnư hrui wĭt mơ̆ng bruă čhĭ mnia mnơ̆ng dhơ̆ng. Ƀiădah, hlăm klei ngă bruă ăt dôk mâo lu klei dleh dlan, kpăk gun. K’iăng khua bruă sang čư êa čar Lâm Đồng Phạm S jao kơ knơ̆ng bruă, dhar bruă, alŭ wăl djŏ tuôm, lŏ dơ̆ng ksiêm dlăng dŭm anôk bruă hiu čhưn ênguê nao mbĭt hŏng bruă lŏ hma dưi tŭ yap, mtô kơ dŭm anôk bruă bi mbŏ, bi ênŭm dŭm klei găl čiăng bi klă leh anăn tŭ yap gru hmô bruă hui čhưn ênguê nao mbĭt hŏng bruă lŏ hma, bi mklin dŭm klei blŭ mguôp, klei bi êdah mơ̆ng phung bi ala čiăng bi mbŏ, bi leh dŭm mta phŭn, hnơ̆ng čuăn leh anăn hưn mdah hŏng bruă sang čư êa čar ksiêm dlăng, bi mbŏ, mkra mlih klei čuăn djŏ guôp hŏng boh sĭt, kñăm lŏ dơ̆ng bi lar dŭm klei găl phŭn mâo, mđĭ kyar bruă hiu čhưn ênguê djŏ hŏng hdră tă mâo leh.