Ti ƀuôn prŏng Ƀuôn Ama Thuôt, Hdră “Hruê jih jang mnuih ƀuôn sang hgŭm myơr êrah” thŭn 2023 iêô jak êbeh 600 čô jing knuă druh, phung mă bruă knŭk kna, lĭng kahan nao myơr êrah. Mơ̆ng anăn mâo 459 ênoh êrah doh. Dŭm blư̆ hgŭm myơr êrah, ayŏng Nguyễn Văn Kiên, ti ƀuôn hgŭm Tân Thành, ƀuôn prŏng Ƀuôn Ama Thuôt brei thâo:

“Pô hgŭm 25 blư̆ kơh myơr êrah, hruê anei lŏ dơ̆ng ngă. Mơ̆ng grăp blư̆ myơr êrah ƀuh amâo huĭ ôh, grăp blư̆ ƀuh mơak kyua dưi bi đru hŏng phung čiăng kơ êrah hlăm dŭm klei huĭ hyưt.”

  Ayun H’Hương, Khua Êoul hgŭm gru bi kal hrah čar Dak Lak brei thâo, hlăm dŭm thŭn giăm anei, ênoh anôk bruă, sang mkra mjing, knơ̆ng bruă, sang hră mkŏ mjing dŭm bruă ngă myơr êrah ƀrư̆ hruê ƀrư̆ lu mơ̆ng klei mâo msĕ si Knăm mơak aruăt êrah hrah, knăm kjuh hrah, hdră bruă hrah… Dŭm knăm mơak myơr êrah mjing leh klei găl kơ lu mnuih dưi đru mguôp ba klei hdĭp kơ phung ruă dôk čiăng êrah. Hdră bi hdơr 23 thŭn hruê jih jang mnuih ƀuôn sang myơr êrah jing gưl čiăng hâo hưn mđĭ hĭn hdră kñăm, klei yuôm bhăn myơr êrah đru mnuih, lar bra klei myơr êrah hlăm êpul êya.

“Ăt čang hmăng hruê anei leh anăn dŭm hruê êdei mnuih ƀuôn sang hlăm kluôm ala hlue ngă bruă myơr êrah anei jăk hĭn. Hlăm wưng kơ anăp, hmei lŏ dơ̆ng hâo hưn kơ bruă myơr êrah ti čar čiăng kơ bruă myơr êrah ti čar ƀrư̆ hruê đĭ kyar hĭn”.

Ăt akŏ mlan Pă mrâo êgao, Anôk bruă gĭt gai myơr êrah čar Kon Tum mkŏ mjing Knăm pŏk ngă Hruê jih jang mnuih ƀuôn sang myơr êrah 7/4 hŏng akŏ: “Myơr êrah hrah – đru dŏng hdĭp”. Hlue si klei hưn mdah hlăm knăm pŏk ngă: Hlăm dŭm thŭn êgao, hdră myơr êrah čar Kon Tum đru mguôp kơ bruă kriê dlăng, răng mgang leh anăn mđĭ klei suaih pral mnuih ƀuôn sang. Hjăn thŭn 2022 mrâo êgao čar mkŏ mjing 334 gưl myơr êrah, tŭ mă êbeh 6.800 ênoh êrah doh, mâo êbeh 136% hnơ̆ng kčah anôk bruă ala čar mtrŭt mjhar myơr êrah jao.

 Hdră bruă myơr êra ară anei mđĭ kyar hlăm jih jang kdriêk, ƀuôn prŏng leh anăn anôk bruă čar Kon Tum jing sa klei dhar kreh jăk siam. Nguyễn Thị Hoài Ven, Khua Êpul hgŭm gru bi klah hrah, K’iăng Khua anôk bruă myơr êrah čar Kon Tum brei thâo:

“Thŭn 2023 Êpul hgŭn gru bi kal hrah čar Kon Tum jing anôk bruă gĭt gai srăng mkŏ mjing lu bruă ngă leh anăn hdră prŏng, msĕ si: Hdră knăm mơak myơr êrah, jih jang mnuih ƀuôn sang myơr êrah. Hdră kñăm thŭn 2023 srăng mâo ƀiă êdi 7.200 ênoh êrah doh. Mnuh ƀuôn sang ară anei thâo săng hĭn kơ bruă myơr êrah đru kơ mnuih knap mñai”

 Anôk bruă gĭt gai myơr êrah čar Kon Tum kčah hdră kñăm hlăm thŭn 2023 mâo 1.500 čô mnuih myơr êrah leha năn mkŏ mjing tŭ mă 7.200 ênoh êrah ngă djăp klei čiăng yua êrah mơng sang êa drao prŏng čar čiăng mdrao mnuih ruă.  Leh knăm pŏk ngă Hruê jih jang mnuih ƀuôn sang myơr êrah 7/4, Êpul hgŭm gru bi kal hrah čar Kon Tum ăt mkŏ mjing klei mă êrah mơ̆ng phung myơr êrah leh anăn hlăm mlan 4 gĭr ktưn mtrŭt mjhar, mkŏ mjing tŭ mă 720 ênoh êrah doh.

Mơ̆ng akŏ thŭn mtam, ti ƀuôn prŏng Ƀuôn Ama Thuôt, čar Dak Lak ăt mphŭn pŏk Hdră “Knăm juh hrah” tal 15 ti Lăn Dap Kngư. Hlăm knăm anei mâo êbeh 6 êtuh čô hđeh sang hră, nai mtô, knuă druh, aê mdrao dôk tui hriăm, mă bruă ti Sang hră gưl prŏng Y dược Buôn Ma Thuột, čar Dak Lak hgŭm. Mjưh ruê hdră mâo mă êbeh 500 ênoh êrah doh, đru hlăm hjiê êrah ala čar. Mâo leh 20 blư̆ myơr êrah, ayŏng Quốc Đình Khánh, Khua ksiêm dlăng, Anôk bruă ksiêm mkă, Sang êa drao Sang hră gưl prŏng Y Dược Ƀuôn Ama Thuôt.

“Anei jing sa bruă yuôm bhăn snăk, đru kơ mnuih ruă. Kâo ăt jing sa čô knuă druh mdrao mgŭn anăn kâo ăt thâo săng bruă myơr êrah jing čiăng snăk leh anăn amâo ngă jhat ôh kơ phung myơr êrah anăn kâo ăt mtrŭt mjhar jih jang phung hlăk ai tơdah djăp klei dưi snăn nao myơr êrah.”

Hdră “knăm kjuh hrah” tal 15 dưi mkŏ mjing ti 3 anôk mdê mdê ti Lăn Dap Kngư mâo Sang hră gưl prŏng Lăn Dap Kngư, kdriêk Čư̆ Mgar leh anăn kdriêk Ea Kar, čar Dak Lak. Hŏng hdră “myơr êrah dŏng mdrao mnuih, klei hdĭp ih hŏng kâo”, hdră kñăm lar bra klei jăk siam, đru hlăm knơ̆ng prăk êrah ala čar čiăng hmao mdrao kơ mnuih ruă./.