Ea Sup jing kdriêk knông lăn ti čar Dak Lak, kbưi hŏng ƀuôn prŏng Ƀuôn Ama Thuôt hlăm brô 85 km. Hlăm 5 thŭn êgao, kdriêk Ea Sup dưi duh bi liê 80 bruă mkŏ mkra ti 9 să hŏng kluôm ênoh bi liê êbeh 91 êklai prăk. Êngao kơ năn, kdriêk lŏ kñăm đru rŭ mdơ̆ng mrâo leh anăn mkra wĭt 637 boh sang hŏng ênoh êbeh 20 êklai prăk. Ti alŭ wăl kdriêk mâo giăm 20.000 gưl gŏ sang ƀun ƀin, giăm ƀun ƀin dưi lĭng čan prăk mnga hdjul čiăng duh bi liê kơ klei ngă bruă, mnia mblei mâo boh tŭ dưn. Y-Mlai Ƀuôn Yă, ti ƀuôn Ea Sup, wăl krah Êa Sup brei thâo, mbĭt hŏng klei duh bi liê mđĭ kyar klei hdĭp mda, mnuih ƀuôn sang lŏ uêñ mĭn êdi kơ bruă kriê pioh knhuah gru djuê ana. “Lač jăk kơ Đảng leh anăn knŭk kna, lač jăk kơ phung khua ƀuôn atăt leh phung mda asei thâo kriê pioh dhar kreh djuê ana, mđĭ kyar klei hdĭp mda, mjĕ êrô tui hriăm, klei hdĭp đĭ kyar leh anăn ai tiê bi mguôp jăk siam. Hlăm thŭn mrâo kâo hmăng hmưi mnuih ƀuôn sang drei trei mđao, yâo mơak, anak čô hriăm hră mơar tŭ jing, phung thâo mbruă khua thŭn lŏ mtô kơ anak čô dŭm klei siam hlăm dhar kreh djuê ana Êđê drei.

Y Mlúi (djuê ana Jarai), mnuih mâo k’hưm ti ƀuôn Weh, să Hà Bầu, kdriêk Đăk Đoa, čar Gia Lai hưn lač: Thŭn 2022, mnuih ƀuôn sang hŏk kdơ̆k kyua hdră duh mkra – ala ƀuôn, pla mjing dưi wĭt msĕ hŏng klei hdĭp aguah tlam. Mnuih ƀuôn sang h’ĭt ai tiê mă bruă knuă. Lu gŏ sang dưi mkra leh sang mrâo, prŏng siam. “Truh ară anei, mnuih ƀuôn sang m’ak kyua bruă duh mkra pla mjing h’ĭt kjăp. Ară anei, mnuih ƀuôn sang m’ak, mđing pla mjing, mđĭ kyar bruă duh mkra h’ĭt kjăp. Pla lehanăn dlăng kriê wiê ênăk, mkra pưk sang prŏng, mâo anôk mdei, anôk pĭt đih kjăp. Dŭm hdră êlan mtrŭn mơ̆ng Đảng, Knŭk kna mâo mnuih ƀuôn sang hluê ngă kjăp, mnuih ƀuôn sang hơ̆k kdơ̆k kyua mâo leh klei hdĭp jăk msĕ hruê anei. Kâo, gŏ sang kâo ăt h’ĭt ai tiê mă bruă knuă, kyua thŭn anei kphê djŏ boh mnga mâo ênoh, boh tŭ mă bruă dưi mkra mđĭ snăn yơh mnuih ƀuôn sang hơ̆k m’ak êdi”.

Ƀuôn U2 ti wăl krah Ea T’Ling, kdriêk Čư̆ Jŭt, čar Dak Nông. Hlăm ƀuôn ară anei mâo êbeh 320 gŏ sang hong hlăm brô 1.600 čô mnuih ƀuôn sang, hlăm anăn mnuih djuê ana M’Nông mâo êbeh 25%. Klei hdĭp mnuih ƀuôn sang knơ̆ng kơ bruă pla mjing dŭm mta msĕ si: Kphê, tiu, kñŭl, dŭm mta boh mnga bruă lŏ hma leh anăn rông êmô kbao ŭn mnŭ. Y Ghông – Khua mduôn ƀuôn U2, khua mduôn bruă cách mạng brei thâo: “Mphŭn dô êjai ka mâo klei êngiê, klei hdĭp mnuih ƀuôn sang djuê ana M’nông ti nei dleh dlan êdi, kƀah mnơ̆ng ƀơ̆ng huă, kƀah čhŭm ao čŭt. Ară anei mâo Đảng, knŭk kna uêñ mĭn, ti ƀuôn U ară anei, klei hdĭp mnuih ƀuôn sang dưi trei mđao, knŏng dôk ƀiă gŏ sang ƀun ƀin. Knŏng phung alah đuč ƀun ƀin. Ară anei ya kƀah hĕ bruă mă, pla tiu, kphê, kñŭl, hbei ƀlang, êtač êbai. Hrui pĕ dŏ anei leh anăn dŏ dih, amâo lŏ mâo klei ư̆ êpa. Msĕ hŏng gŏ sang kâo, thŭn anei ngă lŏ mâo hlăm brô 70 – 80 kdô mdiê, djăp huă leh, amâo lŏ êpa ôh”