Hlue si Knơ̆ng bruă tuh tia mnia blei čar Gia Lai, đăo knăl klei čiăng blei hlăm gưl Tết Nguyên Đán Qúy Mão 2023 srăng đĭ hlăm brô 30%. Čiăng rơ̆ng hdră mkăp mnơ̆ng dhơ̆ng, Knơ̆ng bruă mtă leh kơ dŭm anôk bruă pŏk ngă hdră kčah dŭm mta mnơ̆ng dhơ̆ng, boh nik mnơ̆ng ƀơ̆ng huă, ngă tŭ dưn hdră bo hơĭt ênoh ênil, čhĭ djŏ ênoh. Mbĭt anăn, dŭm anôk bruă ƀuăn rơ̆ng hnơ̆ng jăk mnơ̆ng dhơ̆ng, mâo hră mơar bi mklă djăp ênŭm, phŭn agha klă mngač. Đào Thị Thu Nguyệt, K’iăng Khua Knơ̆ng bruă tuh tia mnia blei Gia Lai, hâo hưn:

“Ênoh mnơ̆ng dhơ̆ng thŭn anei đăo knăl mâo 20. 800 êklai prăk, hnơ̆ng pioh thŭn anei hơĭt kjăp. Knơ̆ng bruă tuh tia mnia blei ăt pŏk ngă dŭm hdră kčah kơ dŭm anôk bruă duh mkra čiăng bi hơĭt ênoh mnơ̆ng dhơ̆ng rơ̆ng ba čhĭ leh anăn mđing kơ mnuih Việt Nam blei mnơ̆ng Việt Nam čiăng pŏk ngă hlăm gưl Tết. Pioh mnơ̆ng dhơ̆ng rơ̆ng hnơ̆ng mkăp, amâo brei mđĭ ênoh lu đeu hlăm gưl Tết Nguyên Đán 2023”.

 Ti čar Dak Lak, anôk ba čhĭ mnơ̆ng dhơ̆ng kơ Tết Nguyên đán Quý Mão dôk mâo lu. Hŏng 2 anôk bruă čhĭ giò chả ti ƀuôn prŏng Ƀuôn Ama Thuôt, amai Nguyễn Thị Nguyệt brei thâo, gưl Tết hnơ̆ng mnơ̆ng dhơ̆ng mkăp kơ anôk nba čhĭ đĭ giăm 3 blư̆, lu hĭn dưi ba čhĭ hlăm brô 7 tạ/hruê.

“Knơ̆ng bruă anei mnia blei hlăm brô 40-50 thŭn leh, snăn grăp thŭn hlăm gưl Têy pô mkra lu, mnơ̆ng dhơ̆ng pioh mkra tinei snăn knŏng čĭm mrâo, amâo yua čĭm êăt ôh, mă ti anôk čuh tă snăn mâo čĭm jăk. Ară anei klei bi mdoh snăn yuôm bhăn hĭn, dŭm mta mnơ̆ng bi mƀăt snăn hlue si Phŭn bruă mdrao mgŭn, dŭm hnơ̆ng arăng brei yua pô yua dŭm năn yơh.”

  Anôk mkra mjing mnơ̆ng ƀơ̆ng Thành Phát, ƀuôn prŏng Ƀuôn Ama Thuôt truh wưng anei ăt pioh leh djăp mta mnơ̆ng dhơ̆ng ƀơ̆ng huă. Hlue si Vũ Thị Gấm, kriê dlăng anôk bruă, đăo knăl, gưl Tết thŭn anei klei čiăng mnơ̆ng ƀơ̆ng huă đĭ hlăm brô 20% mkă hŏng hruê yang đar. Čiăng rơ̆ng djăp mnơ̆ng dhơ̆ng, anôk bruă pral akâo blei ti dŭm anôk bruă mơ̆ng ƀuôn prŏng Hồ Chí Minh leh anăn dŭm êpul hgŭm bruă mkra mjing lŏ hma doh hlăm čar Dak Lak:

“Mnơ̆ng dhơ̆ng msĕ si ƀêñ mmih, keăo dŭm mta snăn blei npioh mâo 90% leh. Tal dua ară anei mŭt hlăm wưng mkra mnơ̆ng bi mđam msăm, dŭm mta mnơ̆ng djuê ana hlăm gưl Tết. Grăp thŭn snăn sơăi, hlue si klei ƀuăn rơ̆ng hŏng anôk bruă kruê dlăng, anôk bruă blei mnơ̆ng djŏ si phŭn agha klă mngač, anăn knăl bi klă čiăng rơ̆ng klei dưi kơ phung yua.”

Čiăng rơ̆ng hnơ̆ng jăk leh anăn ênoh mnơ̆ng dhơ̆ng, êbeh 1 mlan anei êpul kriê dlăng sang mnia hlăm Knơ̆ng bruă kriê dlăng sang mnia čar Dak Lak mđĭ dŭm bruă ksiêm dlăng ktuê dlăng. Mbĭt anăn mđĭ ktang bruă hâo hưn mtô mblang hdră bhiăn leh anăn bi siñê ƀuăn rơ̆ng hŏng dŭm êpul bruă amâo dŭ mdiăng mnơ̆ng mgưt, mnơ̆ntg amâo klă phŭn agha. Mai Mạnh Toàn, Khua Knơ̆ng bruă kriê dlăng sang mnia čar Dak Lak brei thâo:

        “Bi mklă alŭ wăl, mnơ̆ng dhơ̆ng phŭn, mkŏ mjing hdră kčah klă klơ̆ng čiăng pŏk ngă tŭ dưn, mđĭ ksiêm dlăng sang mnia leh anăn đŭ bi kmhal klei ngă soh djŏ tuôm kơ mnơ̆ng dhơ̆ng pioh čhĭ kơ mnuih ƀuôn sang hlăm gưl Tết.”

Čar Dak Lak ăt mkŏ mjing 3 êpul ksiêm dlăng mlir dhar bruă kơ klei doh êƀăt mnơ̆ng dhơ̆ng, ksiêm dlăng ti dŭm anôk bruă mkra mjing, mnia blei, blei mnơ̆ng ƀơ̆ng mơ̆ng ala tač enegao, mnia blei mnơ̆ng ƀơ̆ng hlăm ktuê êlan ti 7 kdriêk, wăl krah leh anăn ƀuôn prŏng Ƀuôn Ama Thuôt. Phạm Thế Hoan, K’iăng Khua Knơ̆ng bruă lŏ hma leh anăn mđĭ kyar krĭng ƀuôn sang brei thâo:

“Mơ̆ng bruă ksiêm dlăng snăn lu dŭm gŏ êsei, phung mkra mjing mnia blei kơ klei doh êƀăt mnơ̆ng ƀơ̆ng ngă jăk dŭm klei lčah mtrŭn mơ̆ng Hdră bhiăn. Khădah snăn mâo đa đa anôk ngă soh snăn hmei đŭ bi kmhal hlue si hdră bhiăn. Bi mguôp hŏng klei ksiêm dlăng snăn hmei srăng hâo hưn kčah mtrŭn kơ hdră bhiăn kơ klei doh êƀăt mnơ̆ng ƀơ̆ng leh anăn ktrâo lač kơ dŭm anôk bruă mkra mjing mnia blei rơ̆ng doh êƀăt mnơ̆ng ƀơ̆ng hlue si hdră kčah.”

Kñăm rơ̆ng hơĭt ênoh mnơ̆ng dhơ̆ng sang mnia gưl Tết Nguyên đán Quý Mão 2023, Knơ̆ng bruă sang čư̆ êa čar Dak Lak pioh leh 1.500 êklai prăk čiăng pioh mnơ̆ng dhơ̆ng čiăng êdi. Êpul mnơ̆ng dhơ̆ng brei kƀĭn bi hơĭt ênoh mnơ̆ng dhơ̆ng knhal jih thŭn 202 leh anăn Tết Nguyên đán Quý Mão 2023, mâo: mnơ̆ng ƀơ̆ng huă (braih ƀâo mngưi pla mjing hlăm ala čar, kđeh čĭm ŭn, mnŭ da, boh bip, boh mnŭ, êa prăi, ƀêñ hra leh anăn dŭm mta boh kroh, djam tam, êa pui êwa čuh. Wưng bi hơĭt ênoh mơ̆ng hruê 30/11/2022 truh hruê 30/2/2023.