Ayŏng Phàn Diếu Hồ, djuê ana Dao, ti ƀuôn Nậm Lúng, să Bản Lang, kdriêk Phong Thổ (čar Lai Châu) mâo 6 čô mnuih, ƀiădah knŏng mâo 2 čô mă bruă phŭn, hdră duh mkra gŏ sang lu thŭn knŏng jưh knang hlăm êbeh 5.000 m2 mdiê lŏ sa yan. Hŏng klei đru mơ̆ng hdră mđĭ kyar bruă duh mkra, ala ƀuôn krĭng mnuih djuê ƀiă lehanăn krĭng čư̆ čhiăng, ung mô̆ ñu bi mlih ba pla čêñ hruê̆ lehanăn rông hnuê mă êa hnuê, hnư hrui wĭt ƀrư̆ hruê dưi mkra mđĭ. Khădah ka thâo mâo ôh, ƀiădah ung mô̆ ñu akâo kbiă mơ̆ng anăn gŏ sang ƀun mơ̆ng ƀuôn, mơ̆ng să.

 “Êlâo adih gŏ sang kâo jing gŏ sang ƀun hluê si klei bi mklă mơ̆ng să hlăm 4thŭn leh. Thŭn 2024, gŏ sang akâo čih hră tlaih ƀun, čiăng kơ Knŭk kna lŏ đru kơ dŭm gŏ sang dlẹh dlan hĭn”.

Mbĭt hŏng gŏ sang ayŏng Phàn Diếu Hồ, ti čar Lai Châu mâo leh lu gŏ sang čih hră akâo kbiă mơ̆ng anăn gŏ sang ƀun. Ară anei, klei khăp mnuih ƀuôn sang lehanăn klei yăl dliê kơ bruă thâo bi đru klam klei dleh dlan dưi lar bra ti djăp ƀuôn êlan krĭng mnuih djuê ƀiă hlăm alŭ wăl anei. Dŭm gŏ sang anei mâo klei mĭn jăk êdi.

 “Gŏ sang kâo amâo mâo klei mĭn čang guôn hlăm knŭk kna, kyua dlăng phă tluôn ăt mâo lu gŏ sang dleh dlan hĭn mkă hŏng gŏ sang pô”.

 “Pô dôk ai hlăk snăn gĭr mă bruă knuă lehanăn kâo čih leh hră akâo kbiă mơ̆ng anăn dŭm gŏ sang ƀun, čiăng lui klei đru mơ̆ng knŭk kna kơ dŭm gŏ sang dleh dlan hĭn sang kâo”.

Tal êlâo knŏng mâo dŭm gŏ sang ti ƀuôn Bản Lang, ƀiădah klei čih hră akâo kbiă mơ̆ng anăn gŏ sang ƀun ară anei dưi lar bra ti lu să mơ̆ng kdriêk. Msĕ si ti să krĭng dlông, krĭng knông lăn Sin Suối Hồ, anôk hdĭp mda mơ̆ng lu mnuih ƀuôn sang djuê ana Mông lehanăn Dao, jing krĭng ƀun knap êdi mơ̆ng čar. Ƀiădah kyua mâo klei đru mơ̆ng bruă sang čư̆ êa alŭ wăl, hlăm thŭn 2024 mâo leh êbeh 30 gŏ sang čih hră akâo bi mklă kbiă mơ̆ng anăn gŏ sang ƀun, ba ênoh gŏ sang ƀun ti să anei hrŏ dôk êbeh 40%. Sùng A Lùng, Kơiăng khua anôk bruă sang čư̆ êa să Sin Suối Hồ brei thâo:

 “Klei čih hră akâo tlaih ƀun ti alŭ wăl dưi lar bra truh kơ dŭm gŏ sang mkăn hlăm ƀuôn, hlăm să. Mơ̆ng anei, knŭk kna srăng lŏ mâo thiăm phŭn duh đru kơ dŭm gŏ sang mkăn lehanăn jing boh kdrŭt čiăng kơ dŭm gŏ sang tlaih ƀun lŏ kpưn đĭ kơ mdrŏng.

Čar knông lăn Lai Châu dưi thâo jing krĭng ƀun êdi mơ̆ng kluôm ala čar, hŏng ênoh gŏ êsei ƀun dôk êbeh 20%. Êlâo adih, lu gŏ sang ƀĭng ngă lŏ hma mâo klei mĭn dôk čang guôn, jưh knang hlăm klei đru mơ̆ng knŭk kna. Kyua mâo bruă Đảng, bruă sang čư̆ êa lehanăn dŭm êpul êya mtrŭt mđĭ hdră mtô mblang, mtrŭt mjhar lehanăn hluê ngă jăk hdră mtrŭn bi hrŏ ƀun, kyua anăn mnuih ƀuôn sang ƀrư̆ ƀrư̆ mđĭ klei thâo săng, gĭr ktưn kpưn đĭ tlaih kơ ƀun.

Ksiêm yap hlăm thŭn 2024, kluôm čar mâo êbeh 4 êbâo gŏ sang tlaih ƀun, hlăm anăn mâo giăm 500 gŏ sang čŏng čih hră akâo tlaih mơ̆ng anăn gŏ sang ƀun. Kdriêk knông lăn Phong Thổ jing alŭ wăl ba akŏ hlăm hdră bi hrŏ ƀun lehanăn ênoh mnuih ƀuôn sang čih hră akâo tlaih mơ̆ng ƀun ăt đĭ lu.

Aduôn Mai Thị Hồng Sim, Kơiăng khua anôk bruă sang čư̆ êa kdriêk Phong Thổ brei thâo, thŭn 2025 anei, kdriêk gĭr bi hrŏ mơ̆ng 4 – 5% gŏ sang ƀun, ba ênoh gŏ sang ƀun trŭn dôk hlăm brô 27%.

 “Čiăng rơ̆ng kơ mnuih ƀuôn sang tlaih kơ ƀun hơĭt kjăp, mnuih ƀuôn sang bi hơĭt klei hdĭp snăn kdriêk srăng ba yua dŭm hdră ala čar kñăm, mđĭ kyar bruă duh mkra ala ƀuôn krĭng mnuih djuê ƀiă lehanăn krĭng čư̆ čhiăng; hdră kñăm mđĭ kyar bruă duh mkra ala ƀuôn bi hrŏ ƀun hơĭt kjăp lehanăn mkŏ mkra krĭng ƀuôn sang mrâo. Mbĭt anăn, kdriêk srăng mtrŭt mđĭ hdră đru kơ gru hmô duh ƀơ̆ng, mđĭ kyar bruă duh mkra kơ mnuih ƀuôn sang.

Bruă mâo lu mnuih ƀuôn sang čih hră akâo kbiă mơ̆ng anăn gŏ sang ƀun amâo djŏ knŏng jing boh tŭ mơ̆ng hdră mtrŭn đru brei mơ̆ng dŭm gưl bruă knŭk kna ƀiădah anei lŏ jing klei bi mklă kơ ai tiê čŏng pô gĭr ktưn kpưn đĭ tlaih ƀun mơ̆ng mnuih ƀuôn sang krĭng dlông. Klei anei mñă klă ai ktang hgŭm mguôp, klei gĭr ktưn, klei đăo knang hlăm sa êdei anăp jăk siam hĭn ti krĭng lăn ƀuôn sang./.