Hŏng êbeh 189km êlan hang êa ksĭ, Dka Lak mâo nanao dŭm êtuh hô̆ mran nao ti êa ksĭ mă kan hdang leh anăn rông kan hdang. Hrăm mbĭt hŏng phung mă kan hdang, phung knuă druh, lĭng kahan knông lăn dôk ti êa ksĭ, ngă jăk bruă klam răng mgang, rơ̆ng kơ klei kdơ̆ng mblah, mprăp đru kơ phung mă kan hdang trah mă leh anăn rơ̆ng kơ klei êđăp ênang ti êa ksĭ.

Ti krŭn ksĭ kan Đông Tác, Thượng úy Phan Ngọc Dương, khua êul ksiêm dlăng knông lăn Đà Rằng, kđông kahan knông lăn Tuy Hoà brei thâo: mơ̆ng akŏ thŭn truh kơ ară anei, mâo leh dŭm êpul hôn mran wah kan ngừ êa ksĭ wĭt truh kdrŭn ksĭ čhĭ kan, mƀĭt hŏng anăn jing lu kŭm păn nao ti êa ksĭ, jih jang dưi ksiêm dlăng kjăp.

“Anôk ksiêm dlăng knông lăn Đà Răng mâo nanao knuă druh gak răng êjai kŭm păn nao amâodah wĭt dưi ksiêm dlăng hluê si hră mơar răng mgang. Bi mguôp hŏng kdrŭn ksĭ kan brei hưn mdah klei mŭt kbiă leh anăn rơ̆ng djŏ hŏng klei čuăn hdră bhiăn kơ gang mkhư̆ klei trah mă kan soh hdră bhiăn ti êa ksĭ.”

 Kdrŭn ksĭ Phú Lạc jing anôk ngă bruă mơ̆ng êbeh 650 kŭm păn mă kan hdang. Grăp hruê, dŭm pluh boh kŭ mă kan leh anăn đrua ba kan hdang wĭt čhĭ tinei kơ phung dŭ mdiăng truh ƀuôn prŏng Hồ Chí Minh, Lăn Dap Kngư leh anăn ba kơ dŭm sang mă mkra kan ƀuăt. Êpul lĭng kahan knông lăn mơ̆ng kđông kahan Hoà Hiệp nao ngă bruaq mbĭt hŏng phung mă bruă ti krŭn kăn hâo hưn, mtô kơ mnuih ƀuôn sang ngă djăp dŭm klei čuăn trah mă kan hdang. Thiếu tá Lương Công Hậu, k’iăng khua kiă kriê kđông kahan knông lăn Hoà Hiệp hâo hưn:

“Čiăng êđăp ênang êjai trah mah, anôk bruă mđĭ hĭn klei hâo hưn kơ mnuih ƀuôn sang čiăng thâo yan adiê ti êa ksĭ, hâo hưn kơ phung trah mă kan hdang rơ̆ng kơ klei trah mă êđăp ênang, hluê ngă dŭm klei čuăn kơ trah mă IUU, amâo mâo soh hŏng krĭng ksĭ ala tač êngao. Hluê ngă djŏ dŭm klei čuăn bi klă ksiêm dlăng klei mŭt kbiă kơ hô̆ pui, ngă dŭm hră mơar nao mă kan dang ti êa ksĭ”.

Ară anei dôk hlăm wưng mă kan hdang phŭn. Mâo mă lu kan hlăm dŭm gưl nao ti êa ksĭ mtrŭt leh phung trah mă kan hdang nao ti êa ksĭ hlăm wưng tết, ba mbĭt klei đăo knang kơ dŭm gưl nao mă tŭ dưn. Nao mbĭt hŏng bruă klam răng mgang klei dưi kiă kriê, phung lĭng kahan knông lăn lŏ jing anôk knang kjăp mơ̆ng phung trah mă an hdang. Mơ̆ng mtô ngă hră mơar, hâo hưn gang mkhư̆ trah mă IUU, truh kơ đru phung mâo klei truh ti êa ksĭ, phung lĭng kahan knông lăn jing leh jĕ giăm. Hà Thanh Hùng, ti ƀuôn hgŭm Phú Yên, čar Dak Lak, brei thâo:

Bi hŏng phung lĭng kahan knông lăn hmei drông mơ̆ng lăn hang ăt msĕ mơh ti êa ksĭ, êjai kŭm păn hmei mâo klei truh amâodah kƀah wư diñu truh kơ hmei jăk sơnăk. Hŏng dŭm hruê yan mnga diñu mkŏ mjing klei găl đru kơ phung trah mă kan hdang, phung dôk ti êa ksĭ msĕ si hmei bi đru leh anăn bi mtă mtăn kơ dŭm klei knŭk kna kăm aghă”.

Čiăng ngă dŭm klei čuăn kơ klei trah mă han hdang, êlâo kơ grăp gưl nao ti êa ksĭ, êpul lĭng kahan knông lăn čar Dak Lak bi mguôp hŏng phung pô hô̆ mra hâo hưn, hyuăt kjăp kơ phung mă kan hdang kơ gang mkhư̆ klei trah mă soh hdră bhiăn IUU. Êjai ngă bruă ti êa ksĭ, kŭm păn trah mă srăng hưn, bi êran kdrăp ktuê dlăng leh anăn čih yap klei trah mă, trah mă djŏ anôk leh anăn amâo mâo duah nao trah mă ti ksĭ ala tač êngao, ƀrư̆ ƀrư̆ lăm lui hră kñĭ mơ̆ng Dhar bruă Ơrôp hŏng Việt Nam. Đại úy Lô Văn Giới, k’iăng khua bruă kđi čar kđông kahan knông lăn Hoà Hiệp Nam brei thâo:

Hmei hâo hưn hŏng phung trah mă kan hdang ngă djŏ dŭm klei čiăng kơ trah mă, mă kang hdang ti êa ksĭ, boh nik jing gang mkhư̆ klei trah mă IUU. Hluê anăn, đru kơ mnuih ƀuôn sang hơĭt ai tiê nao ti êa ksĭ djŏ klei čuăn, rơ̆ng kơ klei êđăp ênang, klei dưi kiă kriê êa ksĭ lăn čar.”

          Mơ̆ng kdrŭn ksĭ truh kơ anôk trah mă kan hdang, mơ̆ng dŭm gưl nao ti êa ksĭ akŏ thŭn truh kơ mmông êa poh yă. Lĭng kahan knông lăn čar Dak Lak mâo nanao ƀô̆ mta msĕ si anôk knang mơ̆ng phung mă kan hdang. Klei hrăm mbĭt, bruă kla leh anăn klei khăp anăn amâo djŏ knŏng răng mgang klei dưi kiă kriê, klei êđăp ênang êa ksĭ, ƀiădah lŏ hyư kjăp klei khăp lĭng kahan – mnuih ƀuôn sang, lŏ čuê̆ klei đăo knang čiăng phung trah mă kan hdang  hơĭt ai tiê nao ti êa sĭ, bi mdrŏng kơ ƀuôn sang./.