Mâo mkŏ mjing hlăk hrue 06/12/1989, Êpul kahan hđăp Việt Nam jing sa êpul bruă kđi čar, bi ala kơ ai tiê, lehanăn klei tŭ dưn kơ phung kahan hđăp, jing mnuih hlăm Êpul bruă mặt trận čar kwar mâo Đảng kiă kriê. Dơ̆ng mơ̆ng mphŭn mkŏ mjing truh kơ ară anei, Êpul hgŭm kahan đăp amâo mâo mdei dưi đĭ kyar, mă bruă hŏng klei jăk, djŏ hdră, lehanăn mâo klei tŭ dưn. Klei bi kƀĭn prŏng mkŏ mjing hlăm knhal jih thŭn 2022, bi klin wĭt jih jang bruă hlue ngă hdră mtrŭn klei bi kƀĭn prŏng kluôm ala Êpul hgŭm kahan hđăp Việt Nam tal 6, mơ̆ng anăn dưi thâo ƀuh klei awăt kƀah, klei tŭ dưn, boh phŭn lehanăn mă klei hriăm, bi klă hdră êlan, mta kñăm, bruă čuăn, klei ngă bruă kơ wưng păn bruă tal 7, wưng thŭn 2022-2027. Klei bi kƀĭn prŏng jing leh bruă kđi car yuôm bhăn hlăm klei hdĭp bruă kđi čar mơ̆ng êpul kahan hđăp, lehanăn phung ƀuôn sang kluôm ala, mơ̆ng anăn lŏ dơ̆ng bi klă bruă klam, lehanăn dŭm klei đru mguôp yuôm bhăn mơ̆ng Êpul kahan hđăp Việt Nam hlăm bruă rŭ mdơ̆ng lehanăn răng mgang lăn čar.

Blŭ hrăm ti anôk bi kƀĭn khua gĭt gai Đảng Nguyễn Phú Trọng lač, leh bi ruĕ ênŭm bruă knuă hlăm lĭng kahan, dŭm êklăk čô mnuih knuă druh, lĭng kahan wĭt hŏng ƀuôn sang amâodah nao ngă bruă mkăn. Phung kahan hđăp jing phung tuôm găn leh hlăm klei bi blah, mâo klei mjuăt hriăm lehanăn mâo leh klei đĭ kyar mơ̆ng kdrăn mblah, lehanăn mâo leh klei duh myơr prŏng hŏng bruă sua mă klei êngiê kơ lăn čar, kơ djuê ana, rŭ mdơ̆ng lehanăn răng mgang lăn čar, ƀrư̆ hrue ƀrư̆ jing leh êpul êya yuôm bhăn hlăm yang ƀuôn. Bi mni kơ dŭm boh tŭ dưn hlăm bruă knuă, lehanăn klei jăk jĭn Êpul hgŭm kahan hđăp mâo hlăm wưng leh êgao, jing yuôm bhăn snăk, đru mguôp kơ klei “Lăn čar drei ka tuôm mâo ôh klei jing, ai ktang, k’hưm prŏng hŏng tar rŏng lăn msĕ si ară anei”, Khua gĭt gai Đảng Nguyễn Phú Trọng lač klă, Đảng lehanăn knŭk kna bi myuôm bruă knuă lehanăn klei đru mguôp yuôm bhăn mơ̆ng Êpul kahan hđăp Việt Nam hŏng bruă rŭ mdơ̆ng lehanăn răng mgang lăn čar ară anei, jing năng kơ klei dŭm êpul bruă Đảng, bruă sang čư̆ êa, lehanăn phung ƀuôn sang jưh knang.

Bi êdah klă, thŭn kơ anăp, dlăng kơ boh klei dlông rŏng lăn ăt dôk nanao hlăm klei dleh dlan, dleh thâo tĭng knăl, hlăm ala čar drei tuôm hŏng lu klei dleh dlan mơh, khua gĭt gai Đảng Nguyễn Phú Trọng brei thâo hŏng êpul hgŭm kahan hđăp, klei bi kƀĭn prŏng Đảng 13 kčah čua leh klă: “Mđĭ ai êpul kahan hđăp dưn yua jih knhuah gru ai ktang, klei găl pô jing lĭng kahan awa Hô hlăm bruă rŭ mdơ̆ng lehanăn răng mgang lăn čar yang ƀuôn ngă phŭn êngiê, răng mgang knhuah bhiăn Đảng, bi kdơ̆ng hŏng djăp mta klei mĭn soh čhuai, klei bi roh, lehanăn bi đru hdơ̆ng găp hlăm bruă duh ƀơ̆ng, mđĭ kyar klei hdĭp mda. Lŏ hyuă kjăp bruă klam jing ƀĭng hgŭm hlăm Êpul kahan hđăp đru hlăm bruă mtrŭt mjhar, đru čung ba phung hđeh gưl mrâo thâo săng kơ knhuah gru cách mạng, kơ ai tiê thâo khăp kơ lăn čar, đru bi rŭ mdơ̆ng lehanăn bi kjăp bruă kđi čar, mkŏ mjing Đảng, lehanăn bruă kđi čar hŏng klei klă mngač, kjăp ktang", mơ̆ng klei anăn, khua gĭt gai Đảng Nguyễn Phú Trọng mtă: Êpul hgŭm kahan hđăp Việt Nam ti dŭm gưl lŏ ngă jăk hĭn bruă klam pô, jing knơ̆ng kơ bruă kđi čar, mâo bruă ngă yuôm bhăn hlăm bruă mkŏ mjing, mtrŭt mjhar phung ƀuôn sang hlue gưt klei bhiăn, hdră êlan mơ̆ng Đảng, knŭk kna, mâo klei thâo bi mguôp jih jang djuê ana, dưn yua klei dưi ngă phŭn mơ̆ng pô, dưn yua jih klei găl pioh mđĭ kyar bruă duh mkra ala ƀuôn, mkŏ mjing bi jăk klei hdĭp mda êđăp ênang hlăm ƀuôn sang, bi lar ai tiê thâo khăp kơ lăn čar, ngă klei ngă phŭn mil pô, bi rŭ mdơ̆ng hdră êlan thâo bi sa ai hlăm yang ƀuôn kñăm hlue ngă tŭ jing djăp mta ênoh čuăn kčah, bruă čuăn kđi čar kơ lăn čar hlăm ênuk gưl mrâo. Đảng gĭt gai, knŭk kna kiă kriê, phung ƀuôn sang jing pô phŭn, jing leh boh tâo kan kjăp kơ bruă rŭ mdơ̆ng lehanăn răng mgang lăn čar drei.

Khua gĭt gai Đảng Nguyễn Phú Trọng mtă, Êpul hgŭm kahan hđăp djăp gưl lŏ răng kriê bi kjăp boh tŭ dưn bruă cách mạng, lŏ mjuăt bi hriăm bruă kđi čar, klei mĭn, đru phung knuă druh, ƀĭng hgŭm păn kjăp hdră êlan mơ̆ng Đảng, knŭk kna, mâo nanao klei bi klin, bi êdah hŏng dŭm gưl bruă Đảng nah gŭ, bruă sang čư̆ êa jih jang ai tiê klei mĭn mơ̆ng êpul hgŭm kahan hđăp, mơ̆ng phung ƀuôn sang kơ jih jang hdră êlan mđĭ kyar bruă duh mkra ala ƀuôn, răng mgang kjăp klei êđăp ênang bruă kđi čar: Êpul hgŭm kahan hđăp djăp gưl bi dưn yua jih ai, ktang, klei găl pô, lehanăn hlue ngă dŭm hdră êlan mơ̆ng knŭk kna hŏng êpul hgŭm kahan hđăp, bi mguôp djăp mta hdră, mâo dŭm klei mtrŭt mjhar êpul hgŭm kahan hđăp hŏng sa hdră tŭ dưn. Mđĭ bruă ‘Êpul phung kahan hđăp bi đru hdơ̆ng găp mđĭ kyar klei hdĭp mda, bi hrŏ ƀun’. Mđing hĭn êdi ti dŭm alŭ wăl dleh dlan, krĭng taih kbưi, krĭng phŭn krŭ kdơ̆ng, mđĭ ai, mtrŭt mjhar djăp êpul êya, phung kahan hđăp bi đru hgŭm duh mkra mnia mblei, kpưn đĭ tui duah klei sah mdrŏng hŏng klei ênuah, djă pioh nanao kơ klei mnăm êa hdơr kơ hnoh, ƀơ̆ng boh hdơr kơ phŭn anăn yơh jing knhuah siam mơ̆ng “Kahan awa Hô, mơ̆ng êpul kahan hđăp”.

Khua gĭt gai Đảng Nguyễn Phú Trọng ăt lŏ mtă, duh mĭn bruă kiă kriê êpul hgŭm kahan hđăp doh mngač, kjăp ktang kơ bruă kđi čar, kơ klei mĭn, lehanăn bruă mkŏ mjing, mlih mrâo jih jang hdră mă bruă čiăng kơ Êpul hgŭm hlue ngă jăk bruă klam, bruă čuăn kơ pô, bi djŏ hŏng grăp čô ƀĭng hgŭm, wir phă nah gŭ, mđing mĭn kơ hnơ̆ng kjăp, klei tŭ jing, amâo mâo ngă mă khă kơ leh, lehanăn jih ai tiê bi hgŭm hlăm bruă mkŏ mjing Đảng, lehanăn knŭk kna./.