Hŏng êbeh 350 sang čhĭ kphê kơ mnuih ƀuôn sang leh anăn phung tuê amâo mă prăk hlăm Knăm mơak kphê Ƀuôn Ama Thuôt tal 8 thŭn 2023, ti êlan Phan Đình Giót, ƀuôn hgŭm Tân Thành, ƀuôn prŏng Ƀuôn Ama Thuôt srăng mâo lu bruă ngă jăk siam kơ hdră mkra mjing kphê mơ̆ng đang pla mjing truh kơ phung blei yua.

Mơ̆ng hruê 1- truh hruê 14/3, tơdah tuê nao ti êlan Phan Đình Giót, ƀuôn hgŭm Tân Thành, ƀuôn prŏng Ƀuôn Ama Thuôt hŏng klei dưi mnăm kphê amâo liê prăk kyua 4 anôk bruă mkăp, mâo: Êpul grup Trung Nguyên, Knơ̆ng bruă mnia blei ba čhĭ kơ ala tač êngao 2-9 (Simexco Dak lak), Knơ̆ng bruă King Coffee leh anăn Knơ̆ng bruă mkŏ mjing klei hâo hưn Pro (anăn knăl Ama Coffee), phung tuê lŏ dưi  hgŭm hlăm dŭm bruă ksiêm hriăm kơ hƀuê ênuk dhar kreh kphê, wăl dhar kreh kphê.  Hlăm anăn, năng mđing jing hdră “Simexco Coffee tour” kñăm mpŭ kơ ƀĭng ngă lŏ hma pla kphê leh anăn kah mbha hdră mkra mjing kphê mơ̆ng đang pla mjing truh kơ blei yua./.