Hdră lač jăk, bi blŭ hrăm hŏng phung kahan êka êkeh ktrŏ hlăm kluôm ala mâo anăn “Klei mngač mơ̆ng tiê boh”, mâo klei hgŭm mơ̆ng 100 čô bi ala jing phung kahan êka êkeh ktrŏ, 50 čô knuă druh, phung nai aê mdrao hriê mơ̆ng 14 anôk bruă đru rông ba, dlăng kriê phung kahan êka êkeh hlăm kluôm ala lehanăn giăm 600 čô êdam êra, sinh viên hlăm alŭ wăl buôn prŏng phŭn Hà Nội. Phung bi ala hmư̆ leh phung kahan êka êkeh bi blŭ hrăm, hưn mthâo kơ dŭm klei đru myơr, klei luič liê lehanăn hdră mblah tŭ jing mơ̆ng phung kahan hđăp gao leh. Mơ̆ng klei yăl dliê kơ klei hdĭp kdơ̆ng mblah, hdră mblah tŭ jing, klei djiê êka, klei ruă msĕ si dưi mdah wĭt čiăng kơ grăp čô, boh nik phung sinh viên ƀuh klă hdră kdơ̆ng mblah jhŏng ktang lehanăn dŭm klei đru myơr mơ̆ng phung kahan êka êkeh lehanăn aê ama nao êlâo. Adei Lê Thảo Đan, sinh viên Sang hră gưl prŏng Kinh tế Quốc dân brei thâo:

“Nao hgŭm hlăm hdră anei dưi hmư̆ phung kahan hưn lač kơ sa ênuk gưl boh ƀom, min mtuh, kâo ƀuh klă klei săn asei djiê êngiă prŏng prĭn mơ̆ng aê ama, myơr ênuk ai hlăk čiăng kơ jih jang drei dưi mâo klei hdĭp jăk hlăm hruê anei. Kâo pô srăng gĭr hriăm hră čiăng đru mguôp ba lăn čar pô đĭ kyar hĭn, năng hŏng klei săn asei djiê êngiă mơ̆ng ênuk aê ama nao êlâo.

Mđing truh bi hdơr 69 thŭn hruê mtaih êngiê ƀuôn prŏng phŭn. Êpul bruă phung mniê ƀuôn prŏng Hà Nội mkŏ mjing leh hruê năm “Phung mniê ƀuôn prŏng phŭn čô̆ kơ bruă hŏng klei mbruă” thŭn 2023. Hruê knăm jing wưng čiăng mđĭ ai čô̆ kơ bruă leh anăn mlih mrâo hŏng klei mbruă mơ̆ng phung mniê ti ƀuôn prŏng Hà Nội, mkŏ mjing klei găl kơ phung kriê dlăng, knơ̆ng bruă leh anăn dŭm êpul êya đru čô̆ kơ bruă mjĕ êrô, kah mbha klei hriăm, bi hriăm leh anăn mkŏ, bi mguôp mđĭ kyar. Êpul bruă phung mniê ƀuôn prŏng Hà Nội bi mni leh kơ 10 klei mĭn, mnơ̆ng dhơ̆ng mbruă. Ăt hlăm hruê knăm, phung amai adei tŭk knă leh dŭm mta mnơ̆ng ƀơ̆ng mơ̆ng dŭm mta mnơ̆ng jăk yâo ti alŭ wăl. Amai Phạm Thị Tư Hậu, Pô anôk bruă mkra mjing mnơ̆ng ƀơ̆ng Yên Anh Food brei thâo:

“Ba Vì ƀuôn sang kâo jing krĭng ênhă lăn kbuôn čư̆, lu mnuih bi pla ana hbei ƀang ƀiădah amâo mâo anôk ba čhĭ. Čhĭ kơ phung nao blei diñu mjuă ênoh đei kyuanăn kâo mkra mjing êbeh 10 mta mnơ̆ng ƀơ̆ng hŏng hbei ƀlang msĕ si: bêñ hbei ƀlang ăm hŏng êa boh đung, ƀêñ hbei ƀlang ăm phomai, hblei ƀlang ăm durian, hbei ƀlang hŭl hŏng hla nếp, hbei ƀlang dim kphê…anôk bruă mkăp brei kơ dŭm sang hjiê ba čhĭ hlăm kluôm ala leh anăn đa đa ala čar mah jiăng msĕ si Lào, campuchia”.

Kkuh m’ak bi hdơr 69 thŭn Hruê mtlaih êngiê ƀuôn prŏng phŭn, ti Hà Nội mkŏ mjing leh Knăm rang mdah bruă čih lač rup “Ƀuôn prŏng phŭn 2023, hŏng anăn “Klei djŏ klă, đua klam, mă bruă, mĭn mrâo, đĭ kyar”. Knăm anei thŭn anei rang mdah 260 pŏk rup hluê hdră: Čih kač, krah mkra, mâo Êpul hgŭm mkŏ mjing hrŏng ruah mơ̆ng 365 pŏk rup mơ̆ng phung ba bi lông. Hlăm anăn, mâo 229 pŏk rup čih kač lehanăn 31 rup krah mkra. Hluê si klei tĭng dlăng mơ̆ng phung thơ̆ng kơ bruă čih kač, klei êdah êdi mơ̆ng knăm rang mdah thŭn anei jing rup siam, klei thâo kơ bruă dưi mkra mđĭ. Anăn jing hdră bi êdah dŭm pŏk rup anei hŏng klei jăk, mâo duh kluôm ênŭm mơ̆ng pô bi lông. Knăm anei pŏk sa klei găl bi mjĕ mjuk lehanăn bi êmuh hriăm kơ phung mă rup, krah mkra rup.

Anei ăt jing wưng čiăng kơ phung mă rup, krah mkra rup ƀuôn prŏng phŭn bi hgŭm mbĭt, mđing truh kơ mta kñăm mđĭ kyar kjăp bruă čih kač rup hlăm êdei anăp. Nguyễn Xuân Thủy – Khua Êpul hgŭm bruă čih kač rup ƀuôn prŏng Hà Nội brei thâo:

“Knăm rang mdah anei mâo knhuah jăk siam jing bi mni kơ anak mnuih Hà Nội, lăn adiê lehanăn dhar kreh Hà Nội. Hluê knăm anei, phung nghệ sĩ čiăng ba m’ĭt truh kơ mnuih khăp kơ rup ƀuôn prŏng phŭn asăp hưn mthâo jing Nghệ thuật Hà Nội đĭ kyar nanao, jing mta phŭn dưi mtrŭt mđĭ lehanăn lŏ čuê, mđĭ lar knhuah gru jăk siam mơ̆ng mnuih Hà Nội, knhuah gru rŭ mdơ̆ng lehanăn răng mgang ƀuôn prŏng phŭn ăt msĕ mơh dhar kreh mnuih Hà Nội lač kluôm”./.