Sang hră gưl sa Čư̆ Mlan, kdriêk knông lăn Ea Sup mâo êbeh 600 čô hđeh sang hră hluê hriăm mơ̆ng adŭ 1 truh kơ adŭ 5. Hlăm ênoh anăn mâo êbeh 140 čô hđeh dôk ti sang hră mbĭt hŏng giăm 40 čô hđeh sang hră mkăn mơ̆ng sa sa hră mbĭt să. Aduôn Trần Thị Thủy – khua kiă kriê sang hră brei thâo, jih jang phung hđeh dôk ti sang hră dưi đru sa kdrêč huă yang hruê leh anăn huă mmăt. Hnơ̆ng đru 8 êbâo 500 prăk kơ sa čô hđeh sang hră hlăm sa blư̆ huă. Bruă đru kơ prăk huă 2 blư̆ sa hruê dưi đru bi mdul klei ktrŏ kơ phung amĭ ama, đru kơ sang hră rơ̆ng kơ sang huă ƀơ̆ng, hđeh sang hdră mâo djăp mta jăk đĭ kyar asei mlei, hriăm hră mơar. Aduôn Trần Thị Thủy  brei thâo:

“Tlâo thŭn anei êpul ngă bruă đru dưi rơ̆ng leh anăn đru kơ phung hđeh dôk hlăm sang hră mâo mnơ̆ng huă ƀơ̆ng djăp mta jăk, hrăm mbĭt hŏng sang hră ngă klei đru čiăng mâo klei hdĭp jăk ti sang hră. Tơdah amâo mâo diñu đru, hjăn sang hră ăt dleh sơnăk dưi ngă. Sang hră hmăng hmưi phung mâo ai tiê kmah lŏ hrăm mbĭt đru kơ mmông huă ƀơ̆ng kơ phung hđeh sang hră.”

Ară anei, bruă mkŏ mkra ti dŭm sang hră ti kriêk knôn lăn Ea Sup, čar Dak Lak dưi duh bi liê kdrưh kơăm, mâo ênŭm kdrăp yua mtô leh anăn hriăm. Ƀiădah kyua alŭ wăl prŏng, bruă nao drông phung hđeh grăp hruê dôk mâo lu klei dleh dlan, phung amĭ ama kreh mưn ang jưh giăm sang hră. Adei Phùng Trung Hiếu, hđeh sang hră adŭ 2, sang hră gưl 1 Čư̆ Mlan brei thâo, sang kbưi hŏng sang hră giăm 20 km, amĭ ama mưn sang jưh dôk mbĭt hŏng lu găp mkăn. Klei huă ƀơ̆ng mnei hgei tuôm hŏng lu klei dleh dlan. Mơ̆ng hruê nao dôk ti sang hră leh anăn mă prăk đru huă ƀơ̆ng, klei hdĭp aguah tlam leh anăn hriăm hră mơar mâo klei jăk găl hĭn.

“Êlâo dih kâo dôk ti sang jưh giăm sang hră, huă mbĭt hŏng găp, găp huă hmar đei kyuanăn kâo huă amâo mâo trei. Ƀiădah ară anei dưi huă hlăm sang, kâo dưi huă lu, mâo djam djăp.”

Hluê si ayŏng Đặng Quốc Vương – Khua bruă êdam êra kdriêk Êa Sup, klei hdĭp mnuih ƀuôn sang mnuih djuê ƀiă ti kdriêk Ea Sup dôk mâo lu klei dleh dlan. Mơ̆ng mkrah kwah thŭn 2018, Bruă êdam êra kdriêk bi mguôp hŏng anôk bruă đru lăn čar leh anăn đa đa phung mâo ai tiê kmah hlăm leh anăn êngao čar Dak Lak đru brei prăk huă yang hruê, prăk huă hlăm sang hră kơ lu phung hđeh mâo klei hdĭp dleh dlan ti alŭ wăl knông lăn, mkŏ mjing anôk dôk hŏng ênoh giăm 800 êklăk prăk čiăng kơ phung hđeh sang hră mâo anôk huă ƀơ̆ng, anôk dôk, mâo klei hơĭt hriăm hră mơar. Bruă êdam êra kdriêk lŏ dơ̆ng iêo mthưr phung mâo ai tiê kmah hlăm lăn čar rơ̆ng ngă dŭm hdră leh anăn čiăng ƀrư̆ hruê ƀrư̆ mâo lu phung hđeh sang hră ƀun ƀin ti alŭ wăl knông lăn dưi mâo klei đru.

“Hdră “Rông adei” dưi hluê ngă thŭn tal 3. Hŏng hdră anei, phung hđeh sang hră mâo klei găl hdĭp leh anăn huă ƀơ̆ng djăp ênŭm ti sang hră. Leh mâo klei hdĭp hơĭt, diñu mâo klei găl hriăm hră mơar, nao hgŭm hlăm dŭm mta bruă ti sang hră mơar dưi ênưih hĭn. Hmei hmăng hmưi dŭm êpul êya, grăp čô lŏ dơ̆ng hrăm mbĭt čiăng kơ hdră dưi ngă nanao, ƀrư̆ hruê ƀrư̆ mâo lu phung hđeh sang hră ƀun ƀin ti krĭng knông lăn dưi tŭ klei đru, lŏ dơ̆ng nao sang hră mơar.”