Hluê klei hưn mơ̆ng Nai Lê Văn Lâm, mtô ti Sang hră gưl dua wăl krah Đăk Hà, kdriêk Đăk Hà, čar Kon Tum, hruê 5/10 leh êgao, sa êpul mnuih ngă mgưt knuă druh ksiêm dlăng mơ̆ng Anôk bruă kahan ksiêm čar Kon Tum lehanăn Phŭn bruă kahan ksiêm iêu đĭng blŭ lač Ñu djŏ tuôm kơ sa klei tlĕ čhĭ matuĭ prŏng. Čiăng amâo mâo hmăi kơ gŏ sang, găp djuê lehanăn dưi bi mklă amâo mâo djŏ tuôm kơ klei anei, hŏng klei kčĕ lehanăn klei kpĭ mơ̆ng êpul mnuih luar anei, nai Lâm hiu čan 1 êklai 100 êklăk prăk m’ĭt hlăm sa ak’khao ti sa knơ̆ng prăk leh kơnăn phung anei hlŏng tlĕ ƀơ̆ng jih prăk anăn. Nai Nguyễn Văn Hiền, Khua sang hră gưl dua wăl krah Đăk Hà, anôk nai Lê Văn Lâm dôk mă bruă brei thâo:

 “Leh hmư̆ nai Lâm hưn, kâo jing Khua sang hră hlŏng brei mtam nai Lâm nao hưn kơ Anôk bruă kahan ksiêm kdriêk. Bi kâo pô, hưn mthâo hŏng bruă Đảng, Anôk bruă sang čư̆ êa. Aguah hruê anei, kâo ƀuh nai Lâm nao mă bruă hŏng Anôk bruă kahan ksiêm čar”.

Mbĭt hŏng nai mtô Lê Văn Lâm, ti wăl krah Đăk Hà, kdriêk Đăk Hà, nai Hồ Thị Thu Sương, Sang hră gưl tlâo Trần Quốc Tuấn ăt mâo arăng mplư 270 êklăk prăk hlăm êlan hla pŏk web yang ƀuôn.

Klei hưn mơ̆ng nai Sương brei thâo, hruê 9/10 leh êgao, ñu nao hgŭm hlăm hdră ruah phung mâo đŏk mmuñ jăk. Hluê si klei mgrơ̆ng mơ̆ng hdră anei, ênoh prăk tĭng tla kơ grăp mta bruă srăng đĭ truh 100 êklăk prăk. Mâo djŏ mmông, phung anei brei nai Sương brei 220 êklăk prăk kơh dưi mă wĭt ênoh 100 êklăk prăk mâo tĭng tla êlâo anăn. Gŏ sang dleh dlan, dôk mâo klei ênguôt nai Hồ Thị Thu Sương hiu čan brei 170 êklăk prăk mkăp kơ hdră anei, mmông anăn ñu thâo arăng mplư leh pô.

Klei phung nai mtô ti kdriêk Đăk Hà, čar Kon Tum arăng mplư amâo djŏ knŏng luič liê prăk kăk diñu ƀiădah lŏ ngă kơ sang hră anôk diñu mă bruă lŏ ktrŏ hlăm bruă mă, lŏ mâo klei đua klam. Nai mtô Mai Xuân Kiên, Khua sang hră gưl tlâo Trần Quốc Tuấn, brei thâo:

 “Leh hmư̆ klei anei, sang hră tiŏ nao leh knuă druh bruă Công đoàn sang hră nao dôk hŏng nai anei, mđĭ ai ñu huĭdah ñu duah mĭn pliă plia, ngă klei amâo jăk. Đru kčĕ kơ ñu hlăm bruă nao hưn hŏng anôk bruă djŏ tuôm lehanăn sang hră ăt mđĭ ai, tui ksiêm lehanăn dôk hŏng ñu čiăng kơ ñu h’ĭt mơh ai tiê”.

Kơ boh phŭn ngă kơ lu phung nai ti alŭ wăl kdriêk lĕ hlăm klei arăng mplư hluê êlan hla pŏk web, aduôn Lê Thị Nhung, Khua Adŭ bruă Sang hră m’ar mtô bi hriăm kdriêk Đăk Hà, čar Kon Tum lač, kbiă hriê mơ̆ng lu mta:

 “Khădah mâo mtă răng leh mơ̆ng êlâo mơ̆ng dŭm anôk bruă djŏ tuôm boh nik kahan ksiêm. Khă snăn, ăt mâo lu phung nai mtô hmư̆ lehanăn đăo knang hlăm klei arăng mplư. Năng ai, phung nai ka thâo ya mta kñăm phung anăn ngă? Tal dua năng ai phung nai dôk čiăng kơ prăk kăk yua hlăm klei hdĭp, yua kơ bruă snăn diñu hmư̆ lehanăn hluê ngă. Tal tlâo kâo mĭn phung nai thâo leh pô djŏ arăng mplư snăn diñu ba m’ĭt prăk čiăng lŏ wĭt mă prăk pô êlâo kơnăn./.