Ktuê êlan êran pral, phung mă bruă dôk ngă bruă amâo mdei, mơ̆ng bruă tuh betông, mkra êlan, mkra kban truh kơ dŭm kdrêč bruă đ’điêt. Ênai măi mŏk ăt kwang bŏ krĭng čư̆ dliê. Dŭm boh êdeh prŏng bi kduê mdiăng ba mnơ̆ng yua rŭ mdơ̆ng. Ayŏng Lê Văn Huynh, mnuih mă bruă ti anôk ngă bruă TL 10 brei thâo.

“Ayŏng adei mă bruă jih ai tiê. Gĭr mă bruă khădah Têt ƀiădah ayŏng adei gĭr hŏng jih ai mơh. Hŏng ai tiê jing ayŏng adei hơ̆k mơak gĭr mă bruă čiăng rơ̆ng mta kñăm mâo kčah mtrŭn. 

Hŏng ai tiê anăn, Phan Viết Trí, khua êpul ngă mkra êlan ti mrô TL 10 brei thâo, êpul ayŏng mâo 30 hruê, hruê Têt dương lịch, jih êpul ăt mă bruă mơh.

“Ară anei ayŏng adei dôk gĭr mă bruă jih hnơ̆ng čiăng kơ hdră anei dưi ngă leh djŏ wưng kčah. Khădah yan adiê amâo jăk găl ƀiădah ayŏng adei ăt hnêč mă bruă, adiê hjan mă mơh. Têt dương lịch ăt mă bruă mơh.

Êlan mur kčŭn čư̆ Phượng Hoàng jing êan mur sa anei yơh ti êlan êran pral Khánh Hòa - Ƀuôn Ama Thuôt. Ară anei, phung ngă mkra dôk ba lu mnuih mă bruă, kdrăp mnơ̆ng, maĭ mŏk čiăng hluê ngă bruă anei hluê hdră “aguah – tlam – mlan lehanăn 4 êpul mă bruă”, ngă jih hruê mlam čiăng bi leh êlan mur anei hlăm knhal jih thŭn 2025. Ti anôk ngă mkra êlan mur ti dua nah kčŭn čư̆ Phượng Hoàng mơ̆ng čar Dak Lak, dŭm pluh čô mnuih mă bruă mbĭt hŏng kdrăp mnơ̆ng, maĭ mŏk dôk bi mtuh min, dŭ mdiăng lăn, boh tâo kbiă ti tač, dôk kă krañ msei, tuh bêtông, mkŏ dưm boh tâo bi kjăp êlan mur anei. Cao Tấn Lực – Kơiăng khua kriê dlăng hdră mkra êlan mur Phượng Hoàng, brei thâo:

“Anôk bruă mâo leh hdră ngă bruă hluê aguah – tlam – mlam hŏng 4 êpul bruă ngă rơ̆ng jih hruê mlam 24/24 čiăng bi leh bruă ktir, mkra êlan mur anei. Hlăm hdră ngă anei, êlan mur nah Yŭ čar Dak Lak mâo mkra leh 400 met, bi tĭng điâo mâo êbeh 440 met leh.

Ngô Hiểu Khoa, Khua Anôk bruă kriê dlăng Êpul group Đèo Cả brei thâo, êlan mur Phượng Hoàng dlông 1,7 km, jing sa hdră duh bi liê mâo boh taih dlông 11 km mâo êpul ngă mkra. Ară anei, grăp hruê êpul ba nao giăm 400 čô mnuih mă bruă lehanăn hlăm brô 100 kdrăp mnơ̆ng mbĭt hŏng maĭ mŏk ngă mkra êlan mur anei mbĭt hŏng 10 boh kban lehanăn dŭm kdrêč bruă mkăn. Tơdah hdră msir mghaih anôk ala ti čar Khánh Hòa pral dưi ngă leh, hdră kčah bi hluh êlan mur anei hlăm knhal jih thŭn 2025 srăng dưi ngă leh. Ngô Hiểu Khoa, brei thâo.

“Thŭn 2025, hmei srăng gĭr bi leh dŭm gơ̆ng, kmeh dră prŏng. Bi ti êlan mur Phượng Hoàng dôk tuôm hŏng klei dleh dlan kơ klei čiu hnô anôk ala ti nah Ngŏ čar Khánh Hòa lehanăn tơdah rơ̆ng pŏk ƀăng mur anei êlâo kơ Têt dương lịch 2025 thŭn anei lehanăn klei găl kơ lăn ala ăt msĕ snei snăn klă sĭt knhal jih thŭn 2025 hmei srăng dưi bi hluh êlan mur Phượng Hoàng.”

Hdră êlan êran pral Khánh Hòa - Ƀuôn Ama Thuột mâo boh taih dlông 116,5 km, hlăm anăn, lu jing găn čar Dak Lak. Boh nik, bruă hlăm kdrêč tal 3 dưi ngă leh hdră čiu hnô anak ala lehanăn dôk ngă mkra giăm 32%. Khădah tuôm hŏng lu klei dleh dlan kơ yan adiê, 18 hruê hjan hlăm mlan 12, ƀiădah hŏng klei gĭr mơ̆ng mnuih mă bruă, hdră ngă mkra ăt dưi krơ̆ng kjăp. Đặng Thọ Dần, Khua kriê dlăng hdră anei, brei thâo:

“Ară anei, hlăm hdră ngă mkra anei mâo giăm 1 êbâo čô mnuih mă bruă dôk gĭr ngă bruă, 500 kdrăp mnơ̆ng mbĭt hŏng 49 anôk ngă mkra hlăm kluôm ktuê êlan anei. Hmei mtă nanao kơ êpul brei rơ̆ng klei êđăp ênang mă bruă, lehanăn mnuih mă bruă dưi dưn prăk mưn, hdră mtrŭn jăk găl.

Hŏng mta kñăm hlăm knhal jih thŭn 2025 ngă leh 68 km tal êlâo mơ̆ng Hdră êlan êran pral Khánh Hòa - Ƀuôn Ama Thuôt, dŭm êpul djŏ tuôm hlăk lehanăn dôk pŏk ngă kjăp dŭm hdră msir kñăm mtrŭt mđĭ wưng bi leh hdră anei. Dŭm hruê akŏ thŭn mrâo 2025, dŭm êbâo čô mnuih dôk mă bruă. Diñu jing pô mtrŭt mđĭ pral bruă ngă leh ktuê êlan êran pral anei, đru ba Lăn dap kngư hlăm anăn mâo Dak Lak lŏ mâo klei găl kpưn đĭ hlăm ênuk gưl mrâo./.