3 čô mrâo mâo mă jing: Y Khing Liêng (kkiêng thŭn 1992, dôk ti să Hòa Sơn, kdriêk Krông Bông); Y Huăl Êban (kkiêng thŭn 1970, dôk ti ƀuôn Măp, wăl krah Ea Pôč, kdriêk Čư̆ M’Gar); leh anăn Nay Dương (kkiêng thŭn 1968, dôk ti să Čư̆ Pơ̆ng, kdriek Krông Ƀuk).  Anei jing 3 hlăm 6 čô kahan ksiêm čar Dak Lak kčŭt leh anăn mtrŭn klei knŭk kna duah kơ klei soh “Ngă măk ƀai bi kdơ̆ng hŏng bruă sang čư̆ êa yang ƀuôn” hlue si Mta 113, Hdră bhiăn phat kđi. Phung anei  hgŭm hlăm klei ngă măk ƀai hlăm  Knơ̆ng bruă sang čư̆ êa 2 să Ea Tiêu leh anăn Ea Ktur, kdriêk Čư̆ Kuin hruê 11/6, leh anăn tlĕ đuĕ.

Aguah 21/7, hmư̆ kei hâo hưn 3 čô dôk đuĕ dăp hlăm krĭng hma ti ƀuôn Kniêt, să Ea Ktur, kdriêk Čư̆ Kuin, êpul kahan ksiêm čar Dak Lak kwang dar leh anăn mă kơ̆ng. Ară anei êpul bruă djŏ tuôm dôk mă asăp hưn klei soh mơ̆ng phung anei.Snăn truh ară anei, êpul bruă djŏ tuôm čar Dak lak mă kơ̆ng leh jih jang 6 čô knŭk kna duah hlăm klei ngă măk ƀai ti kdriêk Čư̆ Kuin hruê 11/6 ngă kơ 9 čô djiê leh anăn 2 čô êka. Truh ară anei, Anôk bruă kahan ksiêm kčŭt hưn 84 čô, hlăm anăn mâo 75 čô ngă soh bikdơ̆ng hŏng bruă sang čư̆ êa yang ƀuôn; 7 čô kơ klei amâo kčŭt hưn phung ngă soh; 1 čô mdăp phung ngă soh; 1 čô kơ klei mkŏ mjing êpul, đru kơ phung mkŏ mjing mŭt kbiă ti Việt Nam soh hŏng hdră bhiăn./.