Mâo lu anôk msĕ hlăm dua klei bliư̆ êdeh mlan hrue 12 lehanăn mlam hrue  14/2 leh êgao ktue êlan Hồ Chí Minh, kdrêč găn kdriêk Đăk Glei lehanăn êlan dơ̆ng mrô 40B, kdrêč găn kdriêk Đăk Tô, čar Kon Tum, anăn jing: Jih dua klei truh hŏng êdeh prŏng  bliư̆ ngă 3 čô mnuih djiê, 4 čô mnuih êka; Jih dua čô mnuih mgăt êdeh anăn jing mnuih mơ̆ng êngao čar sơăi, sa čô mơ̆ng čar Thanh Hoá lehanăn sa čô mơ̆ng čar Long An. Kyua mơ̆ng klei ka mưng ôh hŏng êlan, tui si Thượng tá Nguyễn Xuân Hướng, k’iăng khua adŭ bruă kahan ksiêm êlan klông, knơ̆ng bruă ksiêm čar Kon Tum, jing mnuih mâo leh lu thŭn ksiêm, lehanăn mghaih msir lu klei truh tơl hlăm êlan klông ti čar Kon Tum lač klei soh tinei jing kyua amâo mâo răng hlăm klei mgăt êdeh tơl truh kơ klei amâo mâo jăk:

 “Hmei ƀuh lu jing pô mgăt êdeh amâo mâo răng snăn truh kơ klei amâo mâo jăk. Tal sa, jing đĭ êdeh mtiŏ. Tal dua, klei ruăt kuăt. Mâo dŭm kdrêč êlan êjai pô mgăt êdeh bi kduê tluôn mbĭt hlăm sa wang êlan kbưi, snăn mâo đa đa mgăt êdeh amâo mâo ar lŏ guôn ôh, đĭ mtam êdeh amâo lŏ djŏ grông êlan pô ôh, blă hĕ tlăm êlan hlăm kdrêč êlan jing anôk kniă, amâodah ti dŭm kcŭn, snăn ênưih snăk tuôm hŏng êdeh hriê mơ̆ng dih tlă ngă truh klei jŭ jhat”.

Ăt tui si Thượng tá Nguyễn Xuân Hướng hlăm djăp kdrêč êlan ti čar Kon Tum mâo lu kdrêč êlan bŏ hŏng kčŭn čư̆ huĭ hyưt snăk msĕ si kčŭn čư̆: Lò Xo, ktuê êlan Hồ Chí Minh; kčŭn čư̆ Văng Rơi, ktuê êlan dơ̆ng prŏng 40B; kčŭn čư̆ Măng Đen, kčŭn čư̆ Vi ô lắc ktuê êlan dơ̆ng prŏng 24; kčŭn čư̆ Ngọc Vin ktuê êlan dơ̆ng prŏng mrô 14C… Thượng tá Nguyễn Xuân Hướng brei thâo, dŭm kleoi bi knăl brei ƀuh klei truh tơl hlăm êlan klông knư̆ hrue knư̆ kjham hĭn êjai hlăm dŭm kdrêč êlan găn hlăm čar dŭm hrue giăm anei, êpul kahan ksiêm êlan klông lŏ mđĭ hĭn leh klei ktrâo atăt, lehanăn mâo klei mtyă brei răng hŏng phung mgăt êdeh:

 “Phung mgăt êdeh ô tô mdiăng mnơ̆ng, ô tô mdiăng tue jing phung djă êdeh ktrŏ sơăi, snăn êlâo kơ truh ti êlan kčŭn năng mdei bhiâo ksiêm dlăng hĕ êdeh, boh nik hŏng pre, kdrăp gai, mnơ̆ng bi êđăp pông êdeh. Snăn êjai găn kčŭn čư̆ brei mđing kơ mdha knăl kăp hưn kơ êlan klông. Mgăt êdeh mtrŭn mrô êdeh kñăm bi ktrŏ mơh klei êdeh êran, kñăm đăm lĕ hlăm klei juă prê nanao ôh ngă khiă jih pre luič, jhat hĕ pre snăn jing huĭ hyưt snăk”.

   Khuất Việt Hùng, K’iăng khua klam kơ bruă răng mgang klei êđăp ênang êlan klông ala čar lač, ti čar Kon Tum lehanăn hlăm lăn dap kngư klei ngă soh hŏng klei bhiăn êđăp ênang êlan klông, msĕ si êdeh ô tô mdiăng mnơ̆ng ktrŏ êgao hnơ̆ng, mnuih ƀuôn sang đĭ êdeh mô tô, êdeh p’hŭt amâo mâo đua đuôn mgang boh kŏ, mnăm leh kpiê êsei ăt mgăt êdeh... Klei anăn jing lu. Jih jang êlan klông hlăm alŭ wăl ăt adôk mâo nanao lu klei amâo mâo jăk, ênưih lĕ hlăm klei truh tơl jŭ jhat prŏng. Kyuanăn dhar bruă răng mgang klei êđăp ênang ala čar, lehanăn bruă sang čư̆ êa, dŭm dhar bruă djŏ tuôm dŭm čar lŏ mđĭ hĭn klei hâo hưn, čiăng bi mlih klei thâo săng, lehanăn bruă ngă mơ̆ng mnuih đĭ êrô hlăm êlan klông:

 “Bruă drei mkŏ mjing klei hâo hưn mtă mtăn kơ klei êrô hiu hlăm êlan klông, msĕ si: Mnăm leh kpiê êsei amâo mâo lŏ dưi mgăt êdeh ôh, amâo mâo dưi mdiăng ktrŏ êgao hnơ̆ng, amâo mâo liŏ, amâo mtiŏ lehanăn bi blă ôh hlăm êlan klông, đua đuôn mgang boh kŏ kjăp êjai đĭ hiu êdeh mô tô, êdeh p’phŭt. Hŏng dŭm mta klei mtă êdu êun lehanăn ênưih hdơr. Mơ̆ng dŭm bruă hâo hưn snăn phung hđeh êdam hlăk ai, lehanăn lu mnuih ƀuôn sang păn kjăp klei mtă mtăn kơ klei êđăp ênang hlăm êlan klông. Mơ̆ng anăn ƀrư̆ ƀrư̆ đru kơ phung ƀuôn sang mâo klei thâo săng hĭn hŏng hdră bhiăn răng mgang klei êđăp ênang hlăm êlan klông, lehanăn đru bi hrŏ mơh klei truh tơl hlăm êlan klông”./.