Ayŏng Nguyễn Thế Tuấn ti ƀuôn prŏng Ƀuôn Ama Thuôt, čar Dak Lak mâo leh êbeh 10 thŭn ngă bruă drông tue hiu čhưn mơ̆ng Dak Lak nao ti dŭm čar kwar Krah msĕ si Đà Nẵng, Phú Yên, Khánh Hòa, Bình Định... Ayŏng Tuấn brei thâo, mơ̆ng Ƀuôn Ama Thuôt nao Phú Yên găn êlan dơ̆ng ala čar mrô 29, tuôm jingt êlan pral hĭn, kyua êlan dơ̆ng điêt ƀiădah amâo mâo dar čư̆ ôh. Bi ară anei, ktuê êlan jhat rai leh, êlan klông Dak Lak leh anăn Phú Yên leh bi mŭt, srăng jing sa  bruă prŏng.

 “Êlâo dih, mơ̆ng Ƀuôn Ama Thuôt - Phú Yên knŏng luč hlăm brô 3 mmông mkrah, ară anei truh 5 mmông kơh. Kyua êlan klông jhat rai, čiăng nao pral ăt dleh mơh. Anei jing êlan sa anăn mơ̆ng Ƀuôn Ama Thuôt nao ti Tuy Hòa leh anăn mklăk wĭt. Leh bi mŭt čiăng mđĭ kyar ƀiădah êlan klông snăn dleh mơh. Tơdah čiăng mnia blei, mđĭ kyar leh bi mŭt snăn brei mkra mđĭ, pŏk mlar êlan klông.”

Nguyễn Thị Thanh Thu jing sa hlăm brô 1000 čô knuă druh dôk mă bruă ti čar Phú Yên năng ai srăng hriê ti ƀuôn prŏng Ƀuôn Ama Thuôt mă bruă leh bi mŭt. Ñu brei thâo, hlăm gưl nao ti Dak Lak bi kƀĭn hdră msir bi mŭt, êpul êran êdeh êmưt kyua êlan điêt, jhat rai, ñĕ kơ lu êdeh mdiăng kbâo, êdeh prŏng mdiăng mnơ̆ng dhơ̆ng leh anăn êdeh wai jơ̆ng phung hđeh sang hră hlăm êlan klông.

 “Mâo lu snăk êlan jhat, wĭt ruă jih asei mlei hlăm sa hruê. Ti anăp dua čar srăng klă sĭt bi mŭt ngă bruă, knuă druh Phú Yên hriê ti Dak Lak mă bruă srăng dleh dlan kơ klei găn êrô. Grăp hruê kăm năng ai knŏng wĭt kơ ƀuôn sa blư̆, knăm sa săng nao leh anăn tlam knăm êma srăng wĭt. Ƀiădah êlan klông snei snăn nao mơ̆ng tlam knăm kjuh snăn kơh aguah knăm sa srăng hmao mmông mă bruă.”

Êlan dơ̆ng ala čar mrô 29 jing sa hlăm dŭm ktuê êlan klông yuôm bhăn mkŏ krĭng ktuê hang ksĭ Dhŭng kwar Krah leh anăn Lăñ Dap Kngư; taih truh ti knông lăn Dak Lak - Campuchia hŏng hlăm brô 293 km. Khădah snăn, hŏng hnơ̆ng čuăn êlan klông gưl IV čư̆ čhiăng, 2 grông êlan, boh prŏng êlan 5,4 mét leh anăn 7,5 mét êlan bi liede mơ̆ng lu thŭn êlâo, Êlan dơ̆ng ala čar 29 klă sĭt amâo năng hŏng klei găl đĭ kčar.

Trương Công Thái, K’iăng Khua Knơ̆ng bruă sang čư̆ êa čar Dak Lak, brei thâo hdră msir dôk dưi kčĕ jing bi liê mkra mđĭ, pŏk mlar dŭm kdrêč êlan mơ̆ng Km31+300 (êlan dơ̆ng ala čar mrô 1, wăl krah Đông Hòa, čar Phú Yên) truh ti anôk mkŏ êlan dơ̆ng ala čar mrô 14 (Km178+062, wăl krah Buôn Hồ, čar Dak Lak), hŏng boh taih hlăm brô 147 km.  Ktuê êlan mĭn tĭng dưi mkra mđĭ truh hnơ̆ng êlan dơ̆ng gưl III, hŏng hnơ̆ng dưi êran 60-80 km/mmông, mâo 4 grông êlan, tur prŏng 20,5 m, hnơ̆ng bi liê êbeh 10 êbâo êklai prăk.

 “Êlâo hĭn brei mkra mđĭ čiăng duh kơ bruă găn êrô găl jăk hlăm klei phung knuă druh nao mă bruă mphŭn mơ̆ng 1/9 kơ anăp. Dua čar Phú Yên, Dak Lak ngă leh hră mơar mơĭt kơ Phŭn bruă rŭ mdơ̆ng, Ngăn prăk ksiêm dlăng bi liê prăk đru kơ alŭ wăl čiăng mkra mđĭ ktuê êlan ala čar anei hlăm wưng hnưm hĭn”.

 Tạ Anh Tuấn – Khua Knơ̆ng bruă sang čư̆ êa čar Phú Yên lač, tơdah Êlan dơ̆ng ala čar mrô 29 dưi mkra mđĭ srăng mjing klei găl kơ grăp čô mnuih leh anăn êdâo găn êrô, mnia blei mnơ̆ng dhơ̆ng, đru mđĭ bruă duh mkra - ala ƀuôn leh bi mŭt. Khădah snăn, kơ hnơ̆ng sui, čar Dak Lak klă sĭt srăng mkra mjing êlan dơ̆ng êran pral Ngŏ - Yŭ phă êa ksĭ, mđĭ kyar hlue si hdră mơ̆ng Gưl dlông. Bruă anei ăt mâo bruă Đảng čar dua čar tŭ ư leh anăn srăng dưi bi liê hlue hdră bi hgŭm knŭk kna hŏng êngao knŭk kna (PPP) hlăm wưng 2025 – 2030 hrô kơ hdră čuăl mkă mơ̆ng Knŭk kna wưng êdei thŭn 2030. Tạ Anh Tuấn lač klei mĭn:

 “ Hŏng klei čiăng ară anei leh bi mŭt dua čar, ăt msĕ mơh hdră tă mđĭ kyar phă êa ksĭ, snăn bruă mkŏ mjing êlan dơ̆ng êran pral ăt čiăng êdi. Dua čar Phú Yên leh anăn Dak Lak amâodah êdei anăp jing čar mrâo Dak Lak srăng hưn mdah hŏng Knŭk kna, Bruă kƀĭn ala mđĭ pral bruă hlue ngă mkŏ mjing mtam hlăm wưng 2025 – 2030.”

 Mkra mđĭ êlan dơ̆ng ala čar mrô 29 leh anăn mkra mrâo êlan dơ̆ng êran pral mkŏ “dliê hŏng êa ksĭ” mjing êlan phŭn kơ čar Dak Lak mrâo, amâo djŏ knŏng jing klei čiăng mjêč ôh, ƀiădah lŏ mjing boh kdrŭt kơ klei mđĭ kyar leh bi mŭt. Sa anôk bruă nah gŭ mrâo mrang, hrăm mbĭt srăng pŏk mlar klei bi hgŭm krĭng, mđĭ kyar bruă duh mkra - ala ƀuôn đĭ kyar kjăp hĭn kơ dua čar Dak Lak mrâo bi mŭt ăt msĕ mơh krĭng Dhŭng kwar Krah - Lăn dap Kngư.