Msĕ si yang đar, grăp blư̆ hlăm yan không msĕ si ară anei, êdeh mdiăng kbâo lŏ dăp pruê̆ hlăm tač Sang mkra mjing ƀêñ hra An Khê, amâodah sang mkra mjing ƀêñ hra AYun Pa, čar Gia Lai. Ƀiădah mdê hŏng grăp thŭn, thŭn anei dŭm êdeh mdiăng kƀâo leh truh hlăm sang mkra mjing anei dưi dôk jưh khuăt. Pô êdeh thâo săng dăp kbâo bi khuăt hlăm lam êdeh. Lu êdeh prŏng dưi mdiăng djŏ hnơ̆ng, čiăng rơ̆ng hnơ̆ng êđăp ênang hlăm êlan klông ti dŭm ktuê êlan mâo kbâo mơ̆ng dŭm sang mkra mjing ƀêñ hra. Lương Tuấn Thông-  K’iăng Khua hdră mnêč mkra mjing ƀêñ hra Ayun Pa brei thâo, thŭn anei bruă ktuê dlăng êgao hnơ̆ng dưi ngă kjăp mơ̆ng bruă ksiêm dlăng êdeh truh kơ êran hlăm êlan klông. Čiăng mguôp ai hŏng êpul bruă djŏ tuôm, sang mkra mjing ƀêñ hra mâo hdră êlan tla prăk dŭ mdiăng hŏng dŭm boh êdeh mdiăng djŏ hnơ̆ng ktrŏ.

 “Ară anei knơ̆ng bruă mâo hdră êlan hlue ngă hdră kčah mơ̆ng Hdră bhiăn, hâo hưn hŏng dŭm êdeh dŭ mdiăng čiăng dŭ mdiăng êđăp ênang pioh kơ bruă mkra mjing mơ̆ng sang mkra mjing. Knơ̆ng bruă ăt hrăm mbĭt hŏng êdeh dŭ mdiăng, hŏng dŭm boh êdeh mdiăng 17 ton, djŏ hnơ̆ng ktrŏ snăn knơ̆ng bruă srăng tla hnô 8% čiăng rơ̆ng prăk hrui wĭt kơ êdeh dŭ mdiăng kơ mnuih ƀuôn sang ngă lŏ hma. Hŏng dŭm boh êdẹ êgao đei hnư̆ng mdiăng snăn knơ̆ng bruă amâo dưi blei leh anăn ngă hră mơar”

Hlue si pô mgăt Nguyễn Đình Khang, pô mgăt êdeh mdiăng kbâo sui thŭn kơ dŭm sang mkra mjing ƀêñ hra ti čar Gia Lai, thŭn anei lu pô mgăt êdeh mđĭ gưl mdiăng, hrô kơ mdăng sph hdră kčah kyia hnơ̆ng bi kmhal hŏng prăk kơ klei anei lu snăk.

 “Tơdah hlăm akŏ yan, êpul bruă djŏ tuôm hâo hưn kơ hnơ̆ng êgao hnơ̆ng dưi mdiăng, pô mgăt êdeh ăt ƀuăn rơ̆ng ngă djŏ tui si klei ktrâo lač kơ êpul bruă djŏ tuôm”

Trung tá Lê Công Ngọc, Khua Êpul kahan ksiêm mrô 1, Adŭ bruă kahan ksiêm čar Gia Lai brei thâo: mơ̆ng akŏ yan mă kbâo truh ară anei, êpul đŭ bi kmhal leh êbeh 1 êtuh čô. Ară anei dŭm krĭng pla kbâo mkra ƀên hra ti Gia lai ăt adôk mâo hnơ̆ng đĭ truh dŭm êtuh êbâo ton kbâo hlăm kdrăn pla mjing, anăn anôk bruă ăt lŏ dơ̆ng mđĭ dŭm hdră msir ktuê dlăng hnơ̆ng êdeh dưi mdiăng.

 “Hlăm yan kbâo – 2023, adŭ bruă kahan ksiêm hlăm êlan klông, klă klơ̆ng jing êpul 1, klam dlwng êlan dơ̆ng prŏng 25 klă klơ̆ng bi siinê ƀuăn rơ̆ng hŏng 157 boh êdeh ngă bruă dŭ mdiăng kbâo wĭt ti sang mkra mjing Ayun Pa. Adŭ bruă kahan ksiêm bi hgŭm hŏng 5 kdriêk mâo kbâo, grăp hruê kăm hmei bi hgŭm hŏng dŭm kdriêk čiăng msir mgaih kơ klei êgao hnơ̆ng mdiăng.”

Kñăm mđĭ hnơ̆ng bruă ksiêm dlăng, ktuê dlăng dŭm boh êdeh mâo klei bi knăl êgao hnơ̆ng, Knơ̆ng bruă êlan klông Việt Nam mtă kơ Dŭm Knơ̆ng bruă êlan klông dŭ mdiăng, dŭm anôk bruă kriê dlăng êlan klông gĭt gao êpul kahan ksiêm êlan klông yua kdrăp mdar rup čiăng lŏ mdar rup, mơ̆ng anăn bi kmhal êdeh êdâo ngă soh. Knŭk kna ăt mâo Hdră mtrŭn 123, hlăm anăn, mđĭ hnơ̆ng bi kmhal hŏng klei ngă soh êgao hnơ̆ng ktrŏ êdeh. Đại tá Đỗ Thanh Bình, K’iăng Khua Knơ̆ng bruă kahan ksiêm lač, čiăng msir mgaih klei anei brei bi mklă bruă klam mơ̆ng anôk bruă kriê dlăng êđăp ênang êdeh êdâo brei ngă jăk boh phŭn anei.

 “Hmei srăng ba jih hnơ̆ng êpul leh anăn mbha gưl klă mngač, grăp anôk bruă msĕ si: Knơ̆ng bruă kahan ksiêm tăp hnơ̆ng klam bruă, adŭ bruă kahan ksiêm, khua kahan ksiêm si klam bruă leh anăn klei bi hgŭm phung kahan ksiêm să hlăm bruă ksiêm dlăng bi mklă êdeh êdâo, dŭm mta phŭn ngă êgao hnơ̆ng leh anăn đŭ bi kmhal. Phŭn bruă kahan ksiêm mă leh bruă hŏng Phŭn bruă êlan kông čiăng bi mklă bruă klam kriê dlăng êđăp ênang hdră mnêč, amâo brei hdră mnêč čih anăn dưi êran tui si pô čiăng, leh anăn ngă bruă snăn amâo mâo ôh pô klam kơ klei êgao hnơ̆ng jing lŏ mkra mjing tono mdiăng prŏng hĭn”

 Kñăm mđĭ bruă ksiêm dlăng hnơ̆ng êdeh dưi mdiăng hlăm wưng kơ anăp, Phŭn bruă êlan klông dŭ msiăng mâo leh hră mơar mơĭt kơ anôk bruă hlăm dhar bruă pŏk ngă hdră kčah hiu ksiêm dlăng, ktuê dlăng hnơ̆ng êdeh mdiăng hlăm kluôm ala./.