Ti ƀuôn prŏng Hồ Chí Minh, Khua gĭt gai Đảng Tô Lâm mâo leh mmông bi tuôm hŏng Khua gĭt gai Đảng yang ƀuôn Campuchia, khua Bruă Kƀĭn Ala nah dlông Campuchia Hun Sen leh anăn khua gĭt gai Lào Thongloun Sisoulith.

Hlăm mmông bi tuôm, hlăm wưng alŭ wăl leh anăn tar rŏng lăn mâo lu klei mlih, dleh đăo knăl, tlâo tĭng bi tŭ ư bi êlam, bi kluôm leh anăn pŏk mlar hĭn klei mjĕ giăm plah wah 3 Đảng, 3 lăn čar, hyuă kjăp klei đăo knang bruă kđi čar leh anăn klei mjĕ giăm plah wah phung khua gĭt gai gưl dlông, klei ƀuăn rơ̆ng leh anăn bi lar knhuah gru bi hgŭm mguôp plah wah 3 lăn čar, dlăng anăn jing ngăn dŏ yuôm bhăn, jing hdră bhiăn hŏmg bruă rơ̆ng kơ klei êđăp ênang leh anăn đĭ kyar mơ̆ng grăp lăn čar, tŭ ư krơ̆ng kjăp leh anăn mđĭ hĭn klei bi mguôp hlăm bruă hâo hưn, mtô mjuăt dŭm ênuk mnuih ƀuôn sang 3 lăn čar, boh nik jing phung mda asei, thâo klă leh anăn hdơr nanao kơ knhuah gru klei bi mguôp anei. Tlâo čô khua gĭt gai tŭ ư bi lar tŭ dưn dŭm hdră êlan dôk mâo, lŏ dơ̆ng bi trông, duah hdră êlan mrâo čuăng bi mguôp tŭ jăk, tŭ dưn, klă klơ̆ng, kyua boh tŭ mơ̆ng grăp lăn čar leh anăn boh tŭ mbĭt mơ̆ng mnuih ƀuôn sang tlâo lăn čar, kyua klei hơĭt kjăp, đĭ kyar alŭ wăl leh anăn tar rŏng lăn.