Jing klei bhiăn mưng leh, hlăm grăp hrue knhal jih hrue kăm, êpul čŏng kiă kriê klông knông lăn Buôn Drang Phôk, să Krông Ana, kdriêk Buôn Đon, lŏ dơ̆ng mđrăm mbĭt hŏng kahan răng mgang knông lăn Sêrêpôk hiu suang êwăng, hlăm klông knông lăn, ksiêm dlăng gơ̆ng knăl knông lăn. Y Mosk H’ra, mnuih mâo kơhưm hlăm ƀuôn brei thâo, phung ƀuôn sang hdĭp mơ̆ng đưm leh hlăm krah kmrơ̆ng knŭk kna mkuôm Yok Đôn, kyuanăn mbĭt hŏng bruă răng kriê gơ̆ng knăl knông lăn, răng mgang kjăp klei hơĭt ênang ti knông lăn ăt mâo klei mđing uêñ mơh. Khua mduôn phung mâo kơhưm kreh mtă mtăn nanao hŏng hđeh gưl mrâo hlăm ƀuôn nao mđrăm mbĭt hŏng kahan răng mgang knông lăn răng kriê mơ̆ng grăp phŭn kyâo, kgam lăn ti knông lăn:

 “Jih jang phung ƀuôn sang sa ai tiê mbĭt hŏng kahan răng mgang knông lăn kđông Sêrêpôk, êpul ngă bruă mơ̆ng ƀuôn, kơ dliê mâo klei bi mguôp mbĭt hŏng anôk bruă kiă kriê dliê kyâo đang dliê knuk kna mkuôm Yok Đôn čiăng răng mgang dliê lehanăn gơ̆ng knăl, knông lăn. Hâo hưn mtô mblang mơ̆ng mnuih prŏng hlŏng kơ hđeh êlăk bi hrăm mbĭt đru răng mgang klei êđăp ênang ti knông lăn, lehanăn mtă mtăn kơ phung hđeh amâo mâo dưi duah găn knông lăn soh hŏng klei bhiăn ôh”.

Ti să knông lăn Ia Lốp (kdriêk Ea Sup), 12 boh ƀuôn mâo mkŏ mjing mơ̆ng hlăk thŭn 2006 tui hlue hdră êlan hriê mkŏ mkra ala ƀuôn mrâo mơ̆ng Binh đoàn 16 – Phŭn bruă lĭng kahan, ară anei jing Êpul bruă duh mkra bruă lĭng kahan mrô   737, kahan alŭ wăl 5. Hà Thị Phê, Dôk ti alŭ Đừng, să Ia Lốp brei thâo, hriê kơ anei mkŏ mkra klei hdĭp mda mrâo mơ̆ng hlăk dôk hlăk ai, găn leh 17 thŭn hdĭp, mkŏ mjing găp djuê, ñu mbĭt hŏng lu gŏ sang mkăn yap anei jing ƀuôn sang tal dua kơ pô. Phung ƀuôn sang kơ anei thâo săng klă kơ bruă klam pô hŏng lăn čar, răng kriê kjăp klông knông lăn, anăn yơh jing răng kriê klei hdĭp mda pô, klei hdĭp mơ̆ng grăp boh ƀuôn. Grăp čô mnuih yap pô jing gơ̆ng knăl knông lăn hdĭp ti krĭng knông lăn anei:

 “Mâo klei kahan răng mgang knông lăn hâo hưn mtă mtăn hlăm bruă răng mgang kjăp klông knông lăn, snăn kâo lehanăn gŏ sang hmei thâo săng kơ klei yuôm bhăn hong phung ƀuôn sang. Kâo srăng kčĕ kơ phung hlăm sang, ayŏng adei, anak aneh mâo nanao klei bi mguôp mbĭt hŏng kahăn răng mgang knông lăn, lehanăn kahan ksiêm să răng mgang kjăp klei êđăp ênang knông lăn”.

 Čar Daklak mâo êbeh 71 km klông knông lăn bi knông hŏng ala čar Campuchia. Hlue ngă asăp mtrŭn mrô 01/CT-TTg, hrue 09/01/2015 mơ̆ng khua knŭk kna kơ klei “Bi mkŏ mjing bruă jih jang phung ƀuôn sang đru bi răng mgang klei êđăp ênang ti knông lăn hŏng boh klei ară anei hin”, bruă sang čư̆ êa dŭm boh să ti knông lăn mâo leh klei bi mguôp kjăp hŏng dŭm boh kđông kahan răng mgang knông lăn, jih jang dŭm êpul êya bruă dôk ngă bruă ti knông lăn, ngă jăk jih jang bruă răng mgang klei êđăp ênang knông lăn  msĕ si mâo lu mta bruă bi hmô snei: “Phung mda asei hŏng klei bhiăn” “Ênai tuk mruk răng mgang klei êđăp ênang”, “Ênai tông mmông mơ̆ng phung ƀuôn sang bi răng mgang”. Hlăm jih 4 boh să ti knông lăn dôk hlăm dua boh kdriêk Ƀuôn Đon, lehanăn Ea Sup ară anei mâo leh êbeh 2.400 êpul lehanăn gŏ sang, mnuih nao ngă hră mơar čiăng hrăm mbĭt bi kriă kriê truh 60 km klông knông lăn, lehanăn 4 ƀĕ gơ̆ng knăl knông lăn.  Trung tá Nguyễn Thanh Tùng, khua kiă kriê kđông răng mgang knông lăn Ea H’leo, mơ̆ng kahan răng mgang knông lăn čar Daklak brei thâo, mâo klei bi mguôp lah wah kahan răng mgang knông lăn hŏng dŭm êpul bruă kđi čar, yang ƀuôn, lehanăn djăp êpul êya ti dŭm boh ƀuôn hlăk dôk ngă mâo leh lu êdi klei tŭ dưn êdi bruă răng mgang klei êđăp ênang ti knông lăn:

 “Êpul êya hmei bi mguôp leh hŏng dŭm êpul bruă, mâo dŭm klei bhiăn bi mguôp hŏng Êpul hgŭm bruă mniê, Êpul hgŭm kahan hđăp mđrăm mbĭt mâo klei bi mguôp hŏng kahan răng mgang knông lăn hiu suang êwăng, kiă kriê răng mgang kjăp klei êđăp ênang knông lăn, răng kriê gơ̆ng knăl knông lăn. Dŭm boh ƀuôn ngă leh hră mơar amâo mâo ngă soh ôh hŏng klei bhiăn, lehanăn sa ai mprăp mđrăm mbĭt hŏng kahan răng mgang knông lăn bi kdơ̆ng, lehanăn kăp hưn tơdah ƀuh mâo klei bi knăl mâo mnuih găn knông lăn soh hŏng klei bhiăn”.

Đại tá Đào Viết Hùng, Khua kiă kriê knơ̆ng bruă kahan răng mgang knông lăn čar Daklak brei thâo, mbĭt hŏng bruă “Jih jang mnuih ƀuôn sang bi răng mgang klei êđăp ênang knông lăn hlăm boh klei msĕ si ară anei”, bruă mkŏ mjing lehanăn bi kjăp jih jang êpul bruă Đảng, bruă sang čư̆ êa, lehanăn jih jang djăp êpul êya hlăm knông lăn knư̆ hrue knư̆ dưi lŏ bi kjăp hĭn nanao. Êpul phung knuă druh,   đảng viên kahan răng mgang knông lăn tiŏ nao bi mguôp hŏng êpul bruă Đảng ƀuôn sang ti dŭm să, lehanăn mâo bruă klam kăp kčĕ kơ jih jang bruă knơ̆ng kơ klei mđĭ kyar klei hdĭp mda hlăm ƀuôn sang, mâo klei bi mguôp mđĭ kyar bruă duh mkra hŏng bruă răng mgang klei êđăp ênang ti knông lăn:

 “Hmei mâo leh klei bhiăn mă bruă hŏng bruă Đảng kdriêk, dŭm boh kđông kahan răng mgang knông lăn jao klei bhiăn ngă bruă hŏng bruă Đảng să mjing klei bi sa ai kơ klei Đảng kiă kriê. Sitôhmô bruă răng kriê klông knông lăn snăn hmei bi mguôp hŏng hdră mtrŭn mrô 03 mơ̆ng khua knŭk kna. Hŏng klei jih jang mnuih ƀuôn sang bi răng mgang klei êđăp ênang knông lăn, snăn hmei čoh čuăn jing ngă bruă hŏng êpul bruă Đảng bi jăk jing tal êlâo, lehanăn bi kjăp jih jang bruă sang čư̆ êa nah gŭ. Ară anei dua boh kdriêk ti knông lăn mâo 38 boh ƀuôn, snăn hmei tiŏ nao leh sơăi knuă druh bi mguôp mbĭt hŏng dŭm boh ƀuôn anăn”.

Mbĭt hŏng klei thâo gĭr amâo mâo mdei, snăn jih jang phung knuă druh kahan răng mgang knông lăn, snăn lŏ mâo klei thâo bi mguôp mơ̆ng mnuih ƀuôn sang hrăm mbĭt đru bi răng kriê leh klei êđăp ênang ti knông lăn čar Daklak./.