Hŏng mnuih ƀuôn sang Đăk Ga, să knông lăn Đăk Nhong, kdriêk Đăk Glei, čar Kon Tum, grăp blư̆ Bruă Đảng bi mŭt đảng viên mrâo jing sa klei yuôm bhăn mbĭt mơ̆ng jih ƀuôn sang. Ară anei, bruă Đảng ƀuôn Đăk Ga mâo 25 čô đảng viên leh anăn jih jang jing phung Jeh Triêng. Ayŏng A Cu, đảng viên, khua ƀuôn brei thâo:

“Mŭt Đảng snăn jing ktưn hưn snăk. Leh mŭt Đảng kâo pô bi mlih lu. Pô dưi thâo lu klei jăk, klei yuôm bhăn, mơ̆ng anăn mtô mblang kơ mnuih ƀuôn sang. Đảng viên jing pô bi hmô, ktrâo lač kơ mnuih ƀuôn sang mđĭ kyar bruă duh mkra. Boh nik ară anei jing bi mlih klei mĭn, hdră ngă pô duah klei mrâo, klei mbruă. Klei bhiăn kthŭl mluk ƀrư̆ dưi bi mlih, klei bhiăn jăk siam snăn pô lŏ pioh. Pô lŏ jing sa čô khua ƀuôn snăn iêô jak mnuih ƀuôn sang ngă bruă mđĭ kyar bruă duh mkra mkŏ mjing gŏ sang trei mđao jăk mơak”.

Să Knông lăn Đăk Nhong mâo Bruă Đảng kdriêk Đăk Glei lač jing sa hlăm dŭm alŭ wăl ngă jăk bruă mđĭ kyar Đảng viên krĭng mnuih djuê ƀiă.  Ară anei bruă Đảng să mâo 182 čô đảng viên, lu đảng viên mnuih djuê ƀiă. A Nang, K’iăng Khua bruă Đảng să Đăk Nhoong brei thâo, sa hlăm dŭm klei tâo mơ̆ng bruă Đảng jing hdră ksiêm dlăng hră mơar brei hmao rơ̆ng leh anăn djŏ klă:

       “Tơdah Bruă Đảng ksiêm dlăng phung hmei čiăng bi mŭt snăn hnưm jăk hĭn. Hmei bi kƀĭn Êpul dlăng bruă grăp mlan sa čô, dua čô ăt hưn mơh. Phung êdei ƀuh ngă pral, ksiêm dlăng djŏ klă êdei anei digơ̆ gĭr mŭt Đảng lu hĭn. Tơdah drei lui hră mơar sa hruê kăm, dua hruê kăm, anôk dih sa hruê kăm, anôk anăn dua hruê kăm snăn jih sa thŭn ka leh mơh”.

Dak Glei jing sa hlăm 3 kdriêk mâo klei găl bruă duh mkra ala ƀuôn dleh dlan hĭn ti čar Kon Tum, kluôm kdriêk mâo giăm 90% ênoh mnuih ƀuôn sang jing djuê ƀiă. A Phương, K’iăng Khua bruă Đảng kdriêk Đăk Glei brei thâo, bruă Đảng kdriêk mđing dlăng, kriê dlăng, mkra mđĭ êpul bruă Đảng leh anăn mđĭ kyar phung đảng viên ti dŭm ƀuôn sang.

“Hmei mbha kơ phung mă bruă hlăm bruă Đảng kdriêk, leh anăn gưl bruă đảng kriê dlăng alŭ wăl čiăng păn kjăp boh klei leh anăn ktrâo lač, ktuê dlăng phung êdah êdi mnuih djuê ƀiă. Đảng viên jing phung ba anăp, phung bi hmô kơ ƀuôn sang. Bruă gĭr ktưn mŭt Đảng, boh nik krĭng krŭ kdơ̆ng digơ̆ čiăng mŭt Đảng jing čiăng ngă bruă kơ mnuih ƀuôn sang, ala čar kyua amĭ ama digơ̆ đưm ăt jing phung krŭ kdơ̆ng.”

 Ti krĭng Yŭ Dưr, kyua mđĭ kyar đảng viên ti krĭng mnuih djuê ƀiă, boh nik hlăm êpul 5 djuê ana dleh dlan êdi jing Cống, Mảng, La Hủ, Si La, Lự, čar Lai Châu grăp knhuang mkra mđĭ hnơ̆ng jăk êpul bruă đảng leh anăn đảng viên ti nah gŭ. Đảng viên Phùng Giò Xó ti ƀuôn Phìn Khò, să Bum Tở ăt jing sa hlăm phung êdah êdi ti kdriêk Mường Tè, čar Lai Châu. Hŏng klei blŭ đảng viên ngă êlâo čiăng kơ mnuih ƀuôn sang tui hriăm leh anăn hlue ngă, amai Xŏ pla leh 4 ha quế leh anăn êkuaih, mguôp hŏng rông mnơ̆ng. Mơ̆ng sa gŏ sang dleh dlan, gŏ sang đảng viên djuê ana La Hủ anei gĭr ktưn jing gŏ êsei mdrŏng. Mâo klei găl kơ bruă duh mkra, amai Xó kah mbha klei ngă bruă duh ƀơ̆ng leh anăn đru lu gŏ êsei hlăm ƀuôn tlaih ƀun. Amai Xó mâo mnuih ƀuôn sang đăo knang ruah ngă khua ƀuôn hlăk mrâo 23 thŭn:

“Pô jing đảng viên leh anăn lŏ ngă khua ƀuôn anăn pô bi hmô ba anăp hlăm djăp mta bruă, leh anăn hâo hưn mtô mblang kơ mnuih ƀuôn sang đru ngă. Ară anei mnuih ƀuôn sang ăt pla lu ênhă quế. Mkă hŏng êlâo dih klei mnuih ƀuôn sang thâo săng lu leh, mâo klei tŭ dưn hlăm bruă duh mkra kơh đăo knang kơ pô hĭn.”

          Bum Tở jing să mâo 100% jing mnuih djuê ƀiă La Hủ. Lu thŭn êgao, klei ư̆ êpa mâo nanao hlăm ƀuôn sang. Hŏng klei gĭr bi mlih ana pla mjing, đru kơ mnuih ƀuôn sang mđĭ kyar bruă duh mkram hơĭt klei hdĭp, bruă Đảng bruă sang čư̆ êa jhŏng bi mlih klei mĭn, phung mda asei, gĭr đru kơ mnuih ƀuôn sang. Hŏng hdră ngă anei, Bum Tở mâo leh lu klei bi mlih mơ̆ng phung mda asei, hŏng 100% khua dlăng bruă đảng, khua ƀuôn mâo thŭn kkiêng mơ̆ng 1985 -1999. Phung mda asei anei hâo hưn, mtô mblang kơ mnuih ƀuôn sang pla quế, rông mnơ̆ng leh anăn kƀĭn msir klei ư̆ êpa bi hrŏ klei ƀun knap. Đỗ Văn Khải, Khua dlăng bruă Đảng Bum Tở, kdriêk Mường Tè brei thâo:

Boh nik leh klei bi kƀĭn wưng thŭn 2020-2025, klei hmăo leh anăn lar bra mơ̆ng phung knuă druh mda asei, boh nik gưl alŭ ƀuôn 100% jing mnuih alŭ wăl mâo leh klei bi mlih klă mngač mkă hŏng dŭm thŭn êlâo.”

Ăt ti kdriêk krĭng taih kbưi Đăk Glei, čar Kon Tum amâodah ti dŭm alŭ, să dleh dlan ti čar Lai Châu, phung đảng viên mnuih djuê ƀiă dôk grăp hruê gĭr đru msir klei ư̆ êpa bi hrŏ klei ƀun ƀun, mkŏ mkra anôk dlăng bruă đảng kjăp. Diñu jing pui mtrang mngač, đru kơ mnuih ƀuôn sang gĭr ktưn mkŏ mkra klei hdĭp trei mđao - jăk mơak.