Krĭng Yŭ Dưr lehanăn djiêu gah mâo 14 čar, jing krĭng yuôm bhăn hlăm hdră duh mkra – ala ƀuôn, lĭng kahan, răng mgang klei êđăp ênang, bruă hŏng tač êngao, mâo 30 djuê ana hrăm mbĭt hdĭp mda, hlăm anăn mnuih djuê ƀiă truh hlăm brô 65%, lu jing mnuih djuê ana Mông, Tày, Thái, Mường, Nùng…

Hlăm 5 thŭn êgao, dŭm alŭ wăl krĭng mnuih djuê ƀiă ti Yŭ Dưr lehanăn djiêu gah dưi mkra leh êbeh 860 gru hmô jih jang mnuih ƀuôn sang răng mgang klei êđăp ênang ala čar, hŏng giăm 46.000 gru hmô dưi mđĭ lar ti lu alŭ wăl hlăm djăp mta bruă.

Lu gru hmô tŭ dưn mâo klei lar bra pral, msĕ si “Êpul hgŭm đru mđĭ ai, đru kơ mnuih ngă soh lŏ ñŭ kma hŏng ala ƀuôn” mơ̆ng čar Sơn La, “Anôk mjĕ mjuk bruă klei đăo rơ̆ng klei êđăp ênang ala ƀuôn ti ƀuôn Giàng Ly Cha” mơ̆ng čar Lai Châu, “Ênai tiêng liêng h’ĭt ênang ti sang bi kƀĭn Mường Riệc” mơ̆ng čar Hòa Bình. Giàng A Pao, mnuih hgŭm hlăm anôk bruă klei đăo Tin Lành Báp-tít Việt Nam ti ƀuôn Sam Lang, să Nà Hỳ, kdriêk Nậm Pồ, čar Điện Biên brei thâo: “Hmei mŭt hlăm êpul čŏng kriê dlăng amâo ênưih, amâo mâo hdră đru. Ƀiădah hmei thâo tơdah amâo mâo êpul čŏng kriê dlăng anei, hlăm ƀuôn srăng mâo lu bruă dleh dưi msir mghaih. Tơdah nao msir mghaih dŭm klei amâo thâo bi djŏ khădah klei điêt dưn arăng ăt ăl čôñ mơh, dleh dlan snăk. Hmei gĭr mblang kơ mnuih ƀuôn sang, čiăng kơ digơ̆ thâo kơ êpul čŏng kriê dlăng pô, čiăng kơ ƀuôn sang hmư̆, dah djŏ srăng bi mgrăng lŏ bi jăk”.

Hluê klei hưn mơ̆ng kahan ksiêm dŭm alŭ wăl, hluê hŏng hdră ngă mơ̆ng dŭm gru hmô, mnuih ƀuôn sang mkăp leh giăm 70.000 klei hâo hưn djŏ tuôm kơ bruă răng mgang klei êđăp ênang, lu klei hâo hưn tŭ yuôm, đru kơ êpul djŏ tuôm pral nao ksiêm dlăng êbeh 13.300 boh klei, mă kơ̆ng êbeh 11.500 čô mnuih…

Hlăm 5 thŭn, mnuih ƀuôn sang nao hgŭm mtrŭt mjhar arăng nao hưn klei soh lehanăn mă kơ̆ng êbeh 900 čô mnuih ngă soh arăng tui duah, tlĕ đuê̆ kơ klei phat mkra; nao hgŭm kriê dlăng, mjuăt bi hriăm, đru kơ êbeh 3.700 čô ngă soh lŏ wĭt ñŭ kma hŏng yang ƀuôn, bi rai dŭm êtuh êbâo m2 lăn pla ana drao ruă… Jing gru mngač ba akŏ nao hgŭm hlăm hdră gang mkhư̆ matuĭ, Sồng A Dính, khua mduôn, mnuih mâo k’hưm ti să Hang Kia, kdriêk Mai Châu, čar Hòa Bình brei thâo: “Pô mtô mblang kơ anak čô êlâo, anak čô hluê ngă jăk snăn kơh phung djiêu gah tui hmư̆. Kâo mtô mtă kơ phung anak amâo yua matuĭ, amâo ngă soh hŏng hdră bhiăn… Phung ră rañ matuĭ amâo nao mdrao ră rañ kâo kreh nao ti sang mđĭ ai, mtrŭt mjhar gĭr nao, phung ngă soh tlĕ đuê̆ kâo ăt hgŭm mbĭt hŏng phung êdam êra, phung mniê, phung kahan hđăp bi nao mtô mblang…”

Phung khua mduôn, khua ƀuôn, mnuih mâo k’hưm hlăm krĭng mnuih djuê ƀiă, krĭng taih kbưi, krĭng knông lăn đru mguôp amâo djŏ ƀiă ôh hlăk mtô mblang kơ mnuih ƀuôn sang nao hgŭm hlăm bruă răng mgang klei êđăp ênang ti gưl nah gŭ, răng mgang klei dưi kiă kriê kluôm ênŭm krĭng knông lăn ala čar. Blŭ ti anôk bi kƀĭn, Trung tướng Lê Quốc Hùng, K’iăng khua Phŭn bruă kahan ksiêm mñă klă: “Mtă kơ gru mngač ba anăp lŏ dơ̆ng mđĭ lar ai tiê hgŭm mguôp djuê ana, čiăng ba myơr ai tiê, klei thâo pô; mđĭ lar klei khăp čiăng, thâo bi đru, čung ba kñăm ba wĭt klei tŭ dưn. Jih jang hdră mtrŭt mjhar ƀrư̆ srăng jing čŏng pô ngă; hluê klei bhiăn Đảng kiă kriê, bruă sang čư̆ êa kriê dlăng, êpul kahan ksiêm, lĭng kahan, kahan răng mgang knông lăn, bruă mặt trận, anôk kiă kriê klei hâo hưn klă sĭt jing êpul ba anăp, tă hdră kơ bruă anei đĭ kyar, mkŏ mjing hdră răng mgang klei êđăp ênang hlăm jih jang mnuih ƀuôn sang”.

Trung tướng Lê Quốc Hùng mtă kơ êpul kahan ksiêm pral bi hgŭm hŏng êpul kahan răng mgang knông lăn mđĭ hdră hiu suang dlăng êlan knông lăn. Mtă kơ kahan ksiêm dŭm čar gĭt gai kahan ksiêm să, kdriêk, ƀuôn hgŭm mbĭt hŏng kahan răng mgang knông lăn hluê ngă jăk hdră mtrŭt mjhar mnuih ƀuôn sang, bruă sang čư̆ êa, dŭm êpul djŏ tuôm; hluê ngă hdră giăm mnuih ƀuôn sang, đru kơ mnuih ƀuôn sang; hluê ngă hdră “3 mbĭt”, “4 thâo” hŏng mnuih ƀuôn sang. Mbĭt hŏng hdră mtrŭt mjhar, brei ngă jăk hdră đru kơ yang ƀuôn, bi hgŭm kjăp hŏng kahan ksiêm lehanăn mnuih ƀuôn sang ala čar ƀĭng găp Lao.

Ƀri gưl anei, Phŭn bruă kahan ksiêm mđup brei leh Hră pah mni kơ 22 êpul, 61 čô mnuih mâo boh tŭ êdah êdi hlăm hdră jih jang mnuih ƀuôn sang răng mgang klei êđăp ênang krĭng mnuih djuê ƀiă nah Yŭ Dưr lehanăn djiêu gah, wưng thŭn 2018 – mđup brei mnơ̆ng kơ phung bi ala jing mnuih mâo k’hưm hlăm êpul êya mnuih ƀuôn sang djuê ana ƀiă./.