Tui si hdră mơ̆ng phŭn bruă lŏ hma, truh kơ akŏ mlan 3 tinăp, bruă rŭ mkra knơ̆ng kdơ̆ng êa prŏng hŏng ênoh bi liê truh 4.400 êklai prăk ti akŏ Krông Pač hlăm čar Daklak srăng kđăl yơh êlan êa, lehanăn mgơ̆ng êa hlăm knơ̆ng. Knơ̆ng kdơ̆ng êa anei mâo ênoh tĭng srăng mkăp êa krih mđoh kơ 15.000 ha lăn pla mjing ti dŭm kdriêk nah ngŏ čar.

Siămdah, truh ti wưng anei, bruă čiu hnô, ruh mgaih anôk ala ăt adôk ka leh ôh, adôk truh 488 ăt dôk hlăm wăl êa srăng đĭ ka bi mbĕ đuĕ ôh. Ară anei knơ̆ng bruă sang čư̆ êa kdriêk Mdrak, čar Daklak hlăk dôk mjêč mruăt ngă bruă mgô̆ brei mbĕ đuĕ jih dŭm gŏ êsei adôk anăn dưi mă bruă djŏ hŏng hdră kčah, kñăm bi leh bruă mkra mjing knơ̆ng kdơ̆ng êa anei, kyua dôk êmưt nanao mơ̆ng bruă ruh mgaih, lehanăn čiu hnô, mkŏ mkra anôk dôk mrâo kơ mnuih ƀuôn sang. Jih jang anôk mkŏ mkra ala ƀuôn mrâo kơ mnuih ƀuôn sang ăt dôk ka leh, lehanăn klei lŏ mbha lăn kơ mnuih ƀuôn sang duh ƀơ̆ng ka djŏ hŏng klei mnuih ƀuôn sang čiăng. Snăn klei ruh mgaih anôk ala, hlăm anăn mâo truh 742 dôk hlăm wăl rŭ mkra knơ̆ng kdơ̆ng êa, ƀiădah knŏng mrâo mbĕ đuĕ mil 254 gŏ êsei nao dôk kơ anôk dôk mrâo. Jih jang dŭm gŏ êsei mâo mbĕ mđuĕ leh nao dôk kơ anôk dôk mrâo mrô 2, hlăm să Čư̆ Bông, kdriêk Ea Kar.