Ngô Hiểu Khoa, Khua gĭt gai êpul grŭp Đèo Cả brei thâo ƀăng mur Phượng Hoàng mâo boh tlaih 1,7km, jing sa hlăm hdră rŭ mjing mâo boh tlaih 11km mơ̆ng anôk bruă klam ngă. Ară anei grăp hruê êpul grŭp tiŏ nao giăm 400 čô mă bruă leh anăn hlăm brô 100 êdeh êdâo mbĭt hŏng kdrăp yua masin, hrăm mbĭt ngă bruă rŭ mkra ƀăng mur Phượng Hoàng mbĭt hŏng 10 kban.

Tơdah bruă ruh mgaih anôk ala ti čar Khánh Hoà dưi mgaih msir hơĭt, năng ai dưi bi hluh ƀăng mur ti knhal jih thŭn 2025. Êlan dơ̆ng pral Khánh Hoà – Ƀuôn Ama Thuôt mâo boh tlaih êbeh 117km, hŏng 4 êlan êdeh, mmông rŭ mjing wưng tal 1 mơ̆ng thŭn 2021 – 2025. Kluôm ênoh duh bi liê kơ hdră giăm 22.000 êklai prăk. Ară anei pô duh bi liê leh anăn dŭm anôk ngă bruă dôk kñăm ai dưi ngă bruă, mta knăm truh knhal jih thŭn 2026 êlan dơ̆ng pral srăng dưi ba yua.