Blŭ hrăm hlăm klei bi kƀĭn, Khua bruă kƀĭn ala Vương Đình Huệ brei thâo, Klei bi kƀĭn mâo 7 klei ksiêm hriăm mơ̆ng phung hlăm Klei bi kƀĭn kluôm leh anăn 2 klei bi kƀĭn thơ̆ng, êbeh 40 klei čih mơ̆ng dŭm êpul bruă, phung thơ̆ng kơ bruă, phung kreh knhâo. Hlăm dŭm gưl klei bi trông leh anăn klei bi kƀĭn kluôm ăt msĕ mơh klei bi trông mâo êbeh 40 klei blŭ mguôp phung ksiêm hriăm, kreh knhâo, dŭm anôk bruă duh mkra leh anăn phung bi ala hlăm ala čar leh anăn ala tač êngao hgŭm bi trông.

Klei bi kƀĭn kah mbha klei blŭ êpul êya duh mkra mơ̆ng phung bi ala Êpul hgŭm mnia blei leh anăn tuh tia Việt Nam (VCCI), mơ̆ng dŭm êpul hgŭm, dŭm anôk bruă duh mkra nao hlăm klei bi kƀĭn, klei kah mbha plah wah phung thơ̆ng kơ bruă hlăm ala čar leh anăn ala tač êngao, phung ksiêm hriăm, kčah hdră êlan leh anăn anôk bruă hlue ngă hdră êlan ăt msĕ mơh phung dưi dưn hdră êlan. Klei bi kƀĭn klă sĭt jing sa anôk bruă hâo hưn lu tĭng leh anăn kluôm. Phung bi ala lač lu kơ boh kdrŭt mơ̆ng klei tŭ dưn klă sĭt mơ̆ng klei đĭ kyar mtah leh anăn bi mklă anei jing êlan klă sĭt, kmeh gơ̆ng hlăm hdră yă hdră bruă, hdră êlan kñăm mđing mđĭ ai ktang bi ktưn leh anăn đĭ kyar bruă duh mkra kjăp.