Võ Thị Như Ngọc, Khua Chi đoàn adŭ 12A1, sang hră gưl 3 Lê Quí Đôn, ƀuôn prŏng Ƀuôn Ama Thuôt, čar Daklak jing sa čô hđeh hriăm hră kdlưn hĭn mâo bi mŭt Đảng hlăk mrâo bŏ 18 thŭn. Anei jing klei čih pioh dŭm klei thâo gĭr hlăm klei hriăm mjuăt mơ̆ng ñu hlăm lu thŭn êgao.  Như Ngọc chia sẻ:

“Kâo ƀuh mâo klei myun. Jing mmông găl čiăng mđĭ kyar kâo pô, lehanăn bi lar klei jăk, klei gĭr hŏng ƀĭng găp hlăm sang hră”.

Bi adei Nông Quốc An, hđeh sang hră gưl 3 Võ Nguyên Giáp, kdriêk Ea Kar, čar Daklak mâo nanao klei gĭr mjuăt hriăm, jing leh hđeh hriăm hră thâo djăp ênŭm, lehanăn hur har snăk hlăm bruă Đoàn. Mlan 8/2023, Nông Quốc An mâo mŭt hlăm Đảng êjai dôk hriăm hră mơar:

“Hlăm dŭm thŭn dôk hriăm gưl 3, kâo gĭr bi mguôp hlăm djăp mta bruă hlăm sang hră. Kâo mâo klei myun leh dưi mŭt Đảng. Mơ̆ng klei anei kâo srăng lŏ gĭr hĭn hlăm wưng tinăp”.

Tui si Nguyễn Tiến Dũng, Khua bruă Đảng, Khua sang hră gưl 3 Võ Nguyên Giáp, mâo mkŏ mjing hlăk thŭn 2021, hlăm sang hră mâo 27 čô đảng viên. Dơ̆ng mơ̆ng hrue mkŏ mjing, Êpul bruă Đảng mđing êdi kơ bruă bi mŭt Đảng. amâo mâo djŏ knŏng hlăm phung knuă druh mnuih mă bruă lehanăn phung nai mtô đuič ôh, ƀiădah kñăm mbĭt hŏng phung hđeh mâo klei kdlưn hĭn hlăm sang hră bi mŭt hlăm Đảng mơh. Thŭn hriăm 2023- 2024, sang hră mâo bi mŭt leh 6 čô đảng viên mrâo jing phung hđeh hriăm hră sơăi. Čiăng dưi ruah phung jing tŭ kdlưn, mbĭt hlăm klei hriăm mjuăt, phung hđeh mâo klei lŏ mtrŭt mjhar bi êdah knhuah dôk dơ̆ng ƀơ̆ng huă, lehanăn mâo klei thâo săng hlăm kđi čar.   Nguyễn Tiến Dũng, brei thâo:

“Anôk hrŏng ruah srăng kñăm mơ̆ng êpul bruă Đoàn sang hră, kăp mđing dlăng kơ klei hriăm mjuăt hlăm phung hđeh. Tal dua lĕ jing hlăm phung nai kiă kriê adŭ, nai mtô klei hriăm, rơ̆ng kơ diñu bi leh bruă đoàn. Lehanăn mâo boh tŭ dưn jăk hlăm klei hriăm hră mơar, hlăm klei mjuăt hriăm kñăm mjing mnuih tŭ kdlưn pioh kơ klei bi mŭt hlăm Đảng”.

 Mơ̆ng thŭn 2020 truh kơ ară anei, kluôm čar Daklak mâo bi mŭt leh 368 čô đảng viên jing hđeh hriăm hră, hjăn thŭn 2024 mâo 200 čô phung hđeh hriăm hră mâo bi mŭt Đảng. Tui si Đỗ Tường Hiệp, K’iăng khua knơ̆ng bruă sang hră mơar čar Daklak, boh tŭ dưn mơ̆ng klei mđĭ ai anei jing mă klei hriăm kơ dŭm boh sang hră lŏ dơ̆ng ngă bruă bi mŭt Đảng hlăm phung hđeh hriăm hră. Klei hriăm hră êjai, lehanăn nao hlăm klei mjuăt hriăm bruă kđi čar jing leh klei čoh čuăn prŏng hŏng phung hđeh hriăm hră. Wưng tinăp, knơ̆ng bruă sang hră mơar lŏ dơ̆ng bi mguôp hŏng dŭm gưl bruă Đảng, sang hră lŏ mjing klei găl, mjing anôk jăk kơ phung hđeh hriăm mjuăt. Đỗ Tường Hiệp, brei thâo:

“Bruă bi mŭt đảng hlăm sang hră hlăk mâo klei dôk mđing. Boh nik hŏng phung hđeh hriăm hră. Phung đoàn viên tŭ kdl\ưn hlăm sang hră gưl 3 srăng dưi lŏ bi hriăm mbŏ klei thâo săng kơ bruă kđi čar, kơ klei mĭn, lehanăn kơ klei čang hmăng cách mạng pioh bi hriăm mbŏ lehanăn bi mŭt hlăm đảng čiăng kơ phung hđeh mâo klei ktưn mơ̆ng hnưm, leh anăn mđĭ kyar kơ êdei anăp”.

Bruă bi mŭt Đảng hlăm phung hđeh hriăm hră amâo mâo djŏ knŏng jing klei myun đuič ôh, ƀiădah lŏ jing klei bi knăl kơ phung hđeh mda asei čar Daklak hŏng bruă rŭ mdơ̆ng lehanăn răng mgang ƀuôn sang lehanăn lăn čar. Phung   đảng viên mda asei mâo mjut mjing mơ̆ng sang hră, srăng jing asăr mjeh hrah, klei hmăng hmưi kơ klei lŏ čuê, lehanăn mđĭ kyar Đảng kơ êdei anăp./.