Klei kƀĭn bruă Đảng dŭm gưl wưng thŭn 2025 – 2030 mâo boh tŭ yuôm bhăn. Anei amâo djŏ knŏng jing gưl bi mjĕ mjuk bruă kđi čar prŏng, êlam mơ̆ng kluôm Đảng, jih jang mnuih ƀuôn sang ƀiădah lŏ jing tur knơ̆ng čiăng mkŏ mjing tŭ dưn Klei bi kƀĭn phung bi ala kluôm ala čar tal XIV mơ̆ng Đảng. Kdlưn hĭn, dŭm hdră anei jing sa hlăm dŭm mta phŭn mjing tur knơ̆ng bruă kđi čar hơĭt kjăp ba lăn čar drei mŭt hlăm ênuk gưl mrâo, ênuk gưl đĭ kyar, sah mdrŏng, jăk yâo, bi knar hŏng dŭm ala čar ti êma krĭng lăn msĕ si klei čang hmăng mơ̆ng Khua gĭt gai Hồ Chí Minh khăp hơiêng lehanăn klei čang hmăng mơ̆ng jih jang djuê ana.

Boh sĭt hdră cách mạng Việt Nam brei ƀuh, Klei bi kƀĭn bruă Đảng dŭm gưl mâo bruă klam ktrâo lač, tă hdră êlan, bruă phŭn, mâo klei hmăi êlam hlăm kluôm Đảng lehanăn jih jang mnuih ƀuôn sang. Klei bi kƀĭn bruă Đảng dŭm gưl wưng anei mâo 3 bruă phŭn, anăn jing: Bi trông, bi mklă Hră mơar Klei bi kƀĭn gưl pô lehanăn đru mguôp hlăm klei čih mkra Hră mơar Klei bi kƀĭn gưl dlông; Hră mơar Klei bi kƀĭn gưl XIV mơ̆ng Đảng; ruah mnuih mă bruă nao hgŭm hlăm gưl bruă Đảng dŭm gưl; bi ênŭm mnuih mă bruă hlăm anôk bruă kiă kriê mơ̆ng Đảng mơ̆ng gưl nah gŭ truh kơ Gưl dlông. Dŭm bruă anei jing bruă “Phŭn”, yuôm bhăn, djŏ tuôm kơ bruă klam kiă kriê, ai kdơ̆ng mblah mơ̆ng Đảng; truh kơ bruă tă hdră mtrŭn, hdră msir kiă kriê, bi mklă ai ktang hlăm anôk bruă Đảng lehanăn anôk bruă kđi čar; truh kơ jih jang hdră kiă kriê mơ̆ng êpul bruă Đảng dŭm gưl hlăm wưng păn bruă ti anăp ăt msĕ mơh ai ktang mơ̆ng jih jang djuê ana hlăm êdei anăp.

Đảng drei jing Đảng kiă kriê, Đảng gĭt gai hŏng hdră êlan mtrŭn. Hră mơar Klei bi kƀĭn dŭm gưl jing bi sĭt klei mĭn, hdră êlan gĭt gai mơ̆ng Đảng jing dŭm hdră msir mâo ai hdĭp dơ̆ng mơ̆ng boh sĭt ti dŭm anôk bruă, êpul êya, alŭ wăl mâo kah mbha bruă klam, mâo boh tŭ yuôm tă hdră êlan kiă kriê, ktrâo atăt, msir mghaih jih klei kpăk gun, êdu kƀah, hnêč ba yua jih klei găl, klei mâo, ruh mtlaih jih klei gun, klei kpăk, iêu jak jih klei nao hgŭm mơ̆ng phung knuă druh, đảng viên lehanăn mnuih ƀuôn sang, mjing ai ktang prŏng čiăng hgao lehanăn dưi mâo mta kñăm mâo bi kčah, đru mguôp hluê ngă tŭ jing dŭm mta kñăm, hnơ̆ng čuăn, hdră kčah mâo Gưl dlông amâo dah bruă Đảng dŭm gưl kčah mtrŭn. Rơ̆ng boh tŭ mơ̆ng dŭm klei blŭ đru mguôp kơ dŭm mta Hră mơar Klei bi kƀĭn mơ̆ng gưl pô, klei čih mkra Hră mơar gưl dlông ăt msĕ mơh klei čih mkra Hră mơar mơ̆ng Klei bi kƀĭn bruă Đảng tal XIV, boh nik ba mdah dŭm hdră msir kbiă hriê mơ̆ng nah gŭ, mơ̆ng ai êwa hdĭp aguah tlam mơ̆ng grăp alŭ wăl, boh nik mơ̆ng grăp ƀuôn, grăp să, êpul êya lehanăn mnuih mjing boh kdrŭt, ai êwa, mjing ai lar bra ktang hlăm kluôm ala jing mta kñăm mơ̆ng dŭm gưl bruă Đảng brei dưi mâo.

Mnuih mă bruă hlăm anôk bruă Đảng ăt jing êpul knuă druh kiă kriê, gĭt gai, phung khua knơ̆ng ti grăp Phŭn, dhar bruă, alŭ wăl, êpul êya, jing “Kdrông mkŏ”plah wah Đảng,Knŭk kna hŏng mnuihƀuôn sang, jing êpul kriê dlăng, ktrâo lač, mkŏ mjing hluê ngă, bi mklă bruăba hdră êlan mtrŭn mơ̆ng Đảng, hdră bhiăn mơ̆ng Knŭk kna nao mŭt hlăm klei hdĭp; mbĭt anăn thâo klă klei mâo čiăng ba mdah hŏng Đảng, Knŭk kna ba mtrŭn hdră êlan djŏ guôp hŏng klei čang hmăng, klei tŭ dưn mơ̆ng mnuih ƀuôn sang. Khua bruă Đảng, Kơiăng khua bruă Đảng, phung đảng viên jing pô phŭn, yuôm bhăn, bi mklă boh tŭ dưn klei hluê ngă bruă klam kđi čar, klei hơĭt kjăp, đĭ kyar mơ̆ng alŭ wăl, anôk bruă, êpul êya hlăm wưng ti anăp lehanăn sui thŭn.

Čiăng mkŏ mjing tŭ dưn Klei bi kƀĭn bruă Đảng dŭm gưl wưng thŭn 2025-2030, bruă Đảng dŭm gưl brei ksiêm dlăng kjăp mta phŭn Asăp mtrŭn mrô 35 hruê 14/6/2024 mơ̆ng Phŭn bruă kđi čar kơ hdră mkŏ mjing Klei bi kƀĭn bruă Đảng dŭm gưl anăp mđing truh kơ Klei bi kƀĭn phung bi ala kluôm ala čar tal XIV mơ̆ng Đảng lehanăn klei Klah čŭn mrô 118 hruê 18/1/2025 mơ̆ng Phŭn bruă kđi čar kơ hdră mkra mlih, thiăm mbŏ Asăp mtrŭn mrô 35 mrâo lač.

Hlăk drei dôk pŏk ngă kjăp Hdră mtrŭn mrô 18 mơ̆ng Phŭn bruă kđi čar kơ hdră mkŏ wĭt, bi khuăt anôk bruă, êpul êya kđi čar, dŭm gưl bruă Đảng brei pral bi leh hdră mkŏ mjing, hnưm lŏ wĭt ngă bruă lehanăn lŏ dơ̆ng bi khuăt grăp êpul êya bruă, alŭ wăl. Pă bruă Đảng mrâo dưi mkŏ mjing jing bruă Đảng dŭm anôk bruă Đảng Gưl dlông, bruă Đảng Knŭk kna, bruă Đảng Anôk bruă kƀĭn ala, bruă Đảng anôk bruă mặt trận, dŭm anôk bruă Đảng gưl dlông mrâo dưi mkŏ wĭt; dŭm bruă Đảng mrâo mơ̆ng dŭm Phŭn, dŭm čar, ƀuôn prŏng… hluê hŏng klei dưi, bruă klam mâo kčah mtrŭn hnưm hdră mkŏ mjing lehanăn krơ̆ng kjăp hdră mă bruă hluê djŏ klei bhiăn Đảng lehanăn dŭm klei kčah mtrŭn mrâo mơ̆ng Anôk kriê dlăng bruă Đảng gưl dlông  hlăm hdră kiă kriê klei mă bruă lehanăn hdră mkŏ mjing Klei bi kƀĭn bruă Đảng.

Čiăng mđing mkŏ mjing jăk Klei bi kƀĭn bruă Đảng dŭm gưl, brei mđing kơ 3 bruă phŭn snei:

Tal sa, brei bi mklă klei thâo săng, dŭm boh tŭ dưn mơ̆ng ala čar dưi mâo leh 95 thŭn ti gŭ klei gĭt gai mơ̆ng Đảng, boh nik leh 40 thŭn mlih mrâo jing prŏng kdrưh, năng mpŭ mni, ktưn hưn êdi. Ƀiădah ala čar drei ăt dôk tlă anăp hŏng lu klei dleh dlan, lông dlăng brei kluôm Đảng, jih jang mnuih ƀuôn sang, kluôm êpul lĭng kahan bi hgŭm mguôp, gĭr ktưn hĭn čiăng hgao, hlăm anăn mâo Klei bi kƀĭn bruă Đảng dŭm gưl wưng thŭn 2025 – 2030, mâo klei đua klam nao hgŭm lehanăn jing êpul phŭn msir mghaih dŭm klei dleh dlan, lông dlăng anăn. Lu klei gun kpăk kơ klei bhiăn ăt dôk mâo sui thŭn ka dưi ruh mtlaih. Huĭ srăng “Dôk sa anôk”, huĭ srăng toh hroh, awăt, boh nik hlăm hdră duh mkra, kdrăp mrâo, kreh knhâo lehanăn lĕ hlăm klei “Hnư hrui wĭt ƀiă” huĭ srăng mâo.

Tal dua, kơ klei čih mkra Hră mơar đru mguôp klei blŭ hlăm Hră mơar Klei bi kƀĭn gưl dlông, Hră mơar Klei bi kƀĭn tal XIV mơ̆ng Đảng; Hưn mthâo bruă kđi čar ba mdah kơ Klei bi kƀĭn bruă Đảng dŭm gưl brei ksiêm dlăng kjăp Klei čih mkra Hră mơar ba mdah kơ Klei bi kƀĭn tal XIV; mđing hlak mblang, bi mklă bruă hluê ngă Hdră mtrŭn Klei bi kƀĭn leh êgao; hưn lač klă ênŭm, djŏ hŏng klei mâo lehanăn boh sĭt đĭ kyar mơ̆ng dŭm alŭ wăl, dhar bruă, anôk bruă, êpul êya. Bi mklă dŭm boh tŭ dưn mrâo, êdah êdi hlăm hdră kiă kriê, gĭt gai mơ̆ng êpul bruă Đảng, hluê ai tiê dlăng djŏ, tĭng dlăng klă, lačdjŏ, brei kpă ênuah hưn mdah klei êdu kčah, klei awăt, klei amâo jăk dôk mâo, boh nik dŭm klei gun kpăk hŏng hdră mđĭ kyar ka dưi msir mghaih, ruh mtlaih.

Tal tlâo, brei mđing mprăp kơ mnuih mă bruă ti Klei bi kƀĭn. Brei mâo klei thâo săng kluôm ênŭm, mprăp mnuih mă bruă amâo djŏ kơ sa klei bi kƀĭn, kbưi hĭn, anăn jing mprăp mnuih mă bruă kơ êdei anăp kñăm mđĭ kyar anôk bruă Đảng; mđĭ kyar anôk bruă, êpul êya, alŭ wăl; yuôm bhăn hĭn anăn jing mđĭ kyar Đảng, mđĭ kyar hdră êlan, mđĭ kyar ala čar, djuê ana. Anei jing bruă mâo phung knuă druh, đảng viên lehanăn mnuih ƀuôn sang mđing dlăng; anei ăt jing bruă mâo phung roh kreh mčhua, duah mnêč čiăng hâo hưn soh čhuai, mplư kñăm bi kah hlăm anôk bruă. Kơ hdră mkŏ wĭt anôk bruă Đảng, brei rơ̆ng klei gĭt gai, kiă kriê kluôm dhuôm mơ̆ng anôk bruă Đảng hŏng dŭm alŭ wăl yuôm bhăn, mđing kơ hnơ̆ng tŭ jăk, amâo mâo dưi mdlưh ôh hnơ̆ng tŭ jăk kyua bruă lŏ wĭt mkŏ dăp; amâo mâo guôn grăp alŭ wăl, dhar bruă brei mâo sơaĭ mnuih nao hgŭm hlăm bruă Đảng; mbĭt anăn mnuih mâo ruah nao hgŭm klă sĭt jing tur knơ̆ng kiă kriê bruă kđi čar, jing pô bi ala kơ êpul đảng viên lehanăn mâo mnuih ƀuôn sang khăp čiăng, đăo knang; năng jing mnuih hgŭm hlăm “Êpul đru kčĕ” kơ hdră kdơ̆ng mblah lehanăn mâo klei hgŭm mguôp, sa ai hlăm klei mĭn lehanăn hdră mă bruă, kpă ênuah, jhŏng ktang, sĭt suôr. Brĭei bi mklă klei đua klam mơ̆ng mnuih kiă kriê hlăm bruă ba mdah, hưn mthâo mnuihmă bruă, boh nik mnuih kiă kriê hlăm wưng păn bruă kơ anăp hluê si klei kčah mtrŭn mrâo mơ̆ng Gưl dlông.

Pral ngă jăk hdră bruă hlăm ai tiê klei mĭn, hâo hưn mtô mblang čiăng mjing klei sa ai hlăm kluôm anôk bruă Đảng lehanăn klei sa ai hlăm êpul êya mnuih ƀuôn sang, bi kjăp, mđĭ klei đăo knang mơ̆ng phung knuă druh, đảng viên, mnuih ƀuôn sang hŏng anôk bruă Đảng. Mjing klei găl lehanăn wăl anôk jăk čiăng mđĭ klei thâo lehanăn klei nao hgŭm mơ̆ng jih jang mnuih ƀuôn sang hlăm bruă čih mkra dŭm mta hră mơar lehanăn hdră knuă druh, đru mguôp tŭ dưn hlăm boh tŭ klei bi kƀĭn, hnưm ba hdră mtrŭn Klei bi kƀĭn bruă Đảng mŭt hlăm klei hdĭp, ba wĭt klei hdĭp trei mđao, yâo mơak, êđăp ênang kơ mnuih ƀuôn sang./.