Kkiêng leh anăn đĭ hriê kơ prŏng mơ̆ng sang gŏ sang ngă lŏ hma, anôk mâo lu mnuih Khmer hdĭp mda, kyuanăn Huỳnh Thị Kẩm Huyên mơ̆ng hlăk điêt ƀuh leh klei suaih êmăn mơ̆ng amĭ ama leh anăn mnuih ƀuôn sang ƀuôn sang pô. Kyuanăn yơh mtrŭt ñu hluê hriăm bruă mdrao mgŭn, hŏng klei hmăng hmưi ba wĭt klei hriăm leh anăn kngan pô đru kơ phung ruă ƀun ƀin. Aê mdrao brei thâo, mơ̆ng hlăk ñu dôk điêt ƀuh leh lu mnuih mâo klei ruă duam ƀiădah amâo mâo dưi mdrao. Mâo phung ruă kyua amâodưi hmao dŏng mdrao jing truh kơ kjham hĭn, kyuanăn ñu ƀuăn hŏng pô truh kơ prŏng srăng mâo bruă ngă đru kơ digơ̆ dưi mdrao mgŭn jăk hĭn, êjai anăn amĭ ama sa ai êdi hŏng klei bi klă mơ̆ng anak:

“Amĭ ama kăn mgô̆ lei bruă anak hriăm bruă mdrao mgŭn. Êjai dôk điêt kâo kreh mâo klei ruă, grăp blư̆ sơnăn ƀuh amĭ ama kriê dlăng suăi êdi, mơ̆ng năn kâo mâo klei mĭn êdei duh srăng mâo bruă ngă đru kơ pô mkăn dưi mdrao mgŭn jăk hĭn, amĭ ama mâo klei ruă dưi dlăng kriê jăk hĭn. Kyuanăn kâo nao hriăm bruă mdrao mgŭn”.

Thŭn 2015, êjai leh jih hriăm bruă aê mdrao, Huỳnh Thị Kẩm Huyên dưi nao mă bruă ti anôk bruă dŏng mdrao, Sang êa drao prŏng kdriêk Châu Thành (ară anei jing anôk bruă mdrao mgŭnkdriêk Châu Thành). 10 thŭn êgao, aê mdrao Kẩm Huyên amâo lŏ dưi hdơr ôh dŭm čô pô tuôm kriê dlăng, đru kčĕ hdră mdrao mgŭn. Lu phung mâo klei truh, êa drao ngă mâo ñu leh anăn phung mă bruă mbĭt dŏng mdrao êlâo kơ nao ba ti anôk dŏng mdrao găl guôp. Amâo djŏ knŏng jih ai tiê hŏng klei dŏng mdrao, Aê mdrao Huyên lŏ mâo klei gĭr, kriê dlăng jih ai tiê hŏng phung ruă khua thŭn. Êjai anăn, mâo lu phung mduôn nao ti sang êa drao kreh mâo klei ăl čôñ, rŭng răng, đa đa ăl kơ aê mdrao. Ƀiădah klei ênang leh anăn jih ai tiê, Huyên bi mlih leh klei dôk đing jing klei đăo knang leh anăn klei khăp čiăng.

Nguyễn Văn Liêu ti să Hưng Mỹ, kdriêk Châu Thành – sa čô ruă tŭt klang leh anăn proh klang, mơ̆ng lu thŭn hŏng anei kreh nao ti sang êa drao brei thâo: anei jing sang êa drao kdriêk ƀiădah dôk ti wăl krah, lu mnuih hriê dŏng mdrao, mkă dlăng, lu hĭn jing phung khua thŭn leh anăn gŏ sang ƀun, jing phung amâo mâo lu prăk kăk ƀiădah phung aê mdrao ngă bruă jih ai tiê leh anăn jăk êdi:

“Aê mdrao tinei mă bruă jih ai tiê, ti anôk pô ruă, iêo aê mdrao mâo ƀô̆ mta mtam. Aê mdrao ti kdriêk ăt sơnăn mơh, jih ai tiê êdi, pô ruă pô iêo diñu hriê mtam”.

Hdơr klei mtă mơ̆ng Awa Hồ hŏng phung aê mdrao: Mdrao mgŭn msĕ si klei khăp amĭ anak, aê mdrao Huỳnh Thị Kẩm Huyên amâo mâo mdei hriăm, bi mjuăt pô čiăng ngă jăk bruă klam pô. Krơ̆ng kjăp klei ƀuăn pô, ñu gĭr leh jih ai tiê hriăm leh anăn ară anei dưi hriăm jih Chuyên khoa 1 –Nội khoa.

Bruă ti sang êa drao jing suăi êmăn leh, ƀiădah hŏng sa čô aê mdrao msĕ Huyền ăt suăi êmăn hĭn. Dŭm mmông mă bruă wăt mlam mmăt, lu phung ruă nao mdrao jing kjham čiăng kơ klei hơĭt leh anăn ngă bruă kjăp,…jing klei kpĭ êdi. Ƀiădah Huyền ka tuôm kdŭn ôh. Boh nik, sang êa drao lu hĭn jing mnuih Khmer nao mdrao, gŏ sang ƀun dưi mâo čar đru hră ênua bruă mdrao mgŭn, klei thâo săng ăt adôk kƀah:

“Mnuih ƀuôn sang pô giăm wăl krah dôk thâo hriê mkă dlăng klei ruă, bi phung ti krĭng ƀuôn sang taih kbưi jing dleh dlan êdi. Mâo phung mduôn hriê ti sang êa drao amâo mâo gŏ sang nao mbĭt amâodah kyua klei dleh dlan gŏ sang amâodưi nao mbĭt, kriê dlăng. Mâo đa đa amâo mâo prăk kăk, hmei bi mkrum blei brei êsei huă, êa mnăm amâodah dŭm mta čiăng êdi hlăm klei găl hmei mâo”.

Aê mdrao CK1, Khua anôk bruă mdrao mgŭn kdriêk Châu Thành bi klă: aê mdrao Kẩm Huyên jing sa čô aê mdrao êdah êdi jih ai tiê hŏng pô ruă, mâo bruă đua klam, mâo klei hriăm kjăp leh anăn mâo phung mă bruă mbĭt khăp čiăng.

“Bi kơ klei hriăm thơ̆ng kơ bruă hlăm klei mkă dlăng, mdrao klei ruă, lač klă aê mdrao Kẩm Huyên jing sa hlăm phung aê mdrao êdah êdi mơ̆ng anôk bruă. Boh nik jing klei thâo, thơ̆ng kơ bruă, tal dua jing kơ hdră blŭ tlao nao hriê hŏng phung ruă. Leh anăn Kẩm Huyên ăt mâo ai tiê hluê hriăm leh anăn ară anei ñu dưi bi leh klei hriăm êdei gưl prŏng”.

Ti krah klei hdĭp dleh dlan, klei yăl dliê kơ ai tiê thâo khăp, jih ai tiê hŏng mnuih ruă ƀun ƀin msĕ si aê mdrao Huỳnh Thị Kẩm Huyên klă sĭt jing năng mpŭ. Hmăng hmưi, ƀrư̆ hruê ƀrư̆ mâo thiăm lu phung aê mdrao mda asei mâo klei khăp, jih ai tiê, čiăng kơ bruă mdrao mgŭn, boh nik hŏng phung ƀun ƀin ƀrư̆ hruê ƀrư̆ jăk hĭn. Aê mdrao Kẩm Huyên amâo djŏ knŏng jing klei tưn hưn mơ̆ng gŏ sang, mơ̆ng sang êa drao, ƀiădah lŏ jing gru mngač kơ phung nao êdei hluê hriăm./.