Hlăm ênhiang mmuñ jăk êdi, pui mngač ƀlêč ƀlir lehanăn kluôm anôk rang mdah dưi bi msiam hŏng dŭm mta kphê jăk ti krĭng ƀuôn prŏng čư̆ čhiăng Pleiku, phung mă bruă mơ̆ng Anôk bruă mguôp hnư Ba Ka (Pleiku, Gia Lai) mčhĭt m’uăt hưn mthâo kơ mnơ̆ng pô. Nguyễn Thị Thanh, Kơiăng khua anôk bruă brei thâo, hdră anei dưi mkŏ mjing grăp hruê dăl hlăm 2 thŭn hŏng anei. Anei jing boh kdrŭt đru kơ anôk bruă duh mkra hưn mthâo lehanăn ba mnơ̆ng jăk mơ̆ng Gia Lai truh hŏng kiê kngan mnuih blei yua hlăm kluôm ala čar. Knŏng hlăm wưng bhiâo, mnơ̆ng dhơ̆ng mơ̆ng anôk bruă jak iêu leh dŭm êbâo čô mnuih tui ksiêm, dưi tĭng dlăng êbeh 4,2 mtŭ. Nguyễn Thị Thanh brei thâo, mbĭt hŏng bruă pŏk mlar wăl anôk mnia mblei, anôk bruă duh mkra ăt bi găl ênưih hdră mkra, mđĭ boh tŭ mnơ̆ng dhơ̆ng, mkra hruh đŭng lehanăn mđing kơ bruă đru mdul ênoh.

 “Grăp mlan, hmei mâo dua čô kăp livestream mơ̆ng 7mmông mmăt truh kơ 10 mmông mmăt. Grăp blư̆ live hmei mđing mprăp kơ pui mngač, micro, hdră hưn mthâo. Wăl anôk mnia mblei điện tử ƀuh pô kriăng ngă bruă, diñu ăt đru mơh hŏng voucher amâo mă prăk dŭ mdiăng hŏng phung tuê blei mnơ̆ng tơdah dôk live. Ară anei, anôk rang mdah mơ̆ng BaKa hlăm wăl anôk mnia mblei điện tử mâo tĭng dlăng mơ̆ng 4,5 truh kơ 4,9 mtŭ. Hmei đăo knang ngă bruă hŏng jih ai tiê srăng ba wĭt boh tŭ dưn jăk.

Mbĭt hŏng kphê, ară anei lu mta mnơ̆ng jăk mơ̆ng Gia Lai msĕ si êa hnuê, tiêu, asăr kñŭl dưi čhĭ leh hlăm wăl anôk mnia mblei điện tử, hŏng hnơ̆ng hrui wĭt đĭ êbeh 8% grăp thŭn. Hlăm hdră mlih mrô, Gia Lai đru leh kơ anôk bruă duh mkra ngă 255 255 website mnia mblei điện tử čiăng bi mklă anăn knăl, bi mklă phŭn agha anôk mkra mjing lehanăn mnia mblei hluê jdrăp mrô. Êngao anăn, êbeh 90 tài khoản čhĭ mnơ̆ng online mâo mkŏ mjing kơ 30 anôk bruă duh mkra mâo kơhưm. Phan Thanh Thiên, Kơiăng khua Êpul hgŭm phung mă bruă duh mkra mda asei Gia Lai, hâo hưn:

 “ Anei jing hdră čhĭ mnơ̆ng jăk êdi kơ čar lehanăn krĭng Lăn dap kngư. Êpul srăng đru kơ mnuih hgŭm hlăm êpul ti Gia Lai grăp mlan jak iêu KOL, KOC, tiktoker čiăng čhĭ, đru kơ anôk bruă duh mkra mđĭ ênoh hrui wĭt.

Dŭm thŭn êgao, anôk bruă tuh tia mnia mblei Gia Lai mkŏ mjing leh lu klei bi kƀĭn, mjuăt bi hriăm mđĭ klei thâo kơ anôk bruă duh mkra mnia mblei, êpul hgŭm bruă lehanăn ƀĭng ngă lŏ hma hlăm bruă ba yua hdră mnia mblei điện tử. Mrâo anei, Knơ̆ng bruă tuh tia mnia mblei Gia Lai bi hgŭm hŏng Êpul phung duh mra mda asei čar Gia Lai lehanăn sa anôk mnia mblei điện tử mkŏ mjing 2 gưl čhĭ mnơ̆ng megalive (hdră čhĭ mnơ̆ng online hŏng hnơ̆ng prŏng). Năng mđing, ti dŭm gưl anei, Khua knơ̆ng bruă tuh tia mnia mblei mâo leh klei bi mjĕ, hâo hưn hŏng mnuih blei lehanăn anăn knăl mnơ̆ng dhơ̆ng. Boh tŭ, mâo 12.700 klei kuôl kă blei mnơ̆ng hŏng ênoh mâo truh 1,8 êklai prăk. Khă snăn, hluê si Phạm Văn Binh, Khua knơ̆ng bruă tuh tia mnia mblei čar Gia Lai, mnia mblei điện tử ti čar ăt dôk hlăm wưng mphŭn čô̆. Ară anei, knŏng mâo 40% hlăm ênoh 5.000 anôk bruă duh mkra ti čar mâo website mnia mblei điện tử. Ƀiădah boh tŭ hdră čhĭ mnơ̆ng online mrâo êgao brei ƀuh, mnơ̆ng lŏ hma Gia Lai mâo klei găl ba wĭt hnư hrui wĭt lu êdi hlăm wăl anôk mnia mblei điện tử:

 “Dua gưl livestream mrâo êgao brei ƀuh leh klei mđing lu êdi mơ̆ng phung blei yua. Klei anei bi mklă leh bruă mnia mblei điện tử khădah dôk mrâo, ƀiădah klei găl ăt prŏng snăk ti Gia Lai. Hmei srăng bi hgŭm hŏng TikTok lehanăn Shopee čiăng mkŏ mjing hruê čhĭ mnơ̆ng, hruê kăm čhĭ mnơ̆ng megalive hluê mta phŭn hưn kơ mnơ̆ng jăk mơ̆ng Gia Lai. Ară anei, Knơ̆ng bruă tuh tia mnia mblei hŏng ba mdah hŏng Phŭn bruă tuh tia mnia mblei mkra anôk bruă đru kơ hdră mnia mblei điện tử, jing anôk bi mguôp anôk bruă duh mkra mnia mblei ti Gia Lai.

Mnia mblei điện tử hlăk jing kdrông mkŏ yuôm bhăn, ba mnơ̆ng lŏ hma Gia Lai kpưn đĭ mơ̆ng wăl anôk mnia mblei hlăm ala čar truh kơ hdră ba čhĭ hlăm tar rŏng lăn. Kyua pral kdal lehanăn ba yua klei jăk găl mơ̆ng wăl anôk mnia blei điện tử, dŭm klei blŭ wĭt mơ̆ng mnuih blei ăt đru kơ anôk bruă duh mkra lehanăn ƀĭng ngă lŏ hma ƀrư̆ hruê ƀrư̆ mđing hĭn kơ mnơ̆ng dhơ̆ng pô. Anei jing sa hdră mphŭn kčưm bŏ hŏng klei čang hmăng kơ sa hdră ngă lŏ hma mrâo mrang lehanăn hơĭt kjăp ti alŭ wăl./.