Ti dŭm anôk bi kƀĭn, phung mgơ̆ng ruah bi êdah leh hdră pô mă bruă hŏng klei đua klam prŏng, mđing kơ bruă mđĭ kyar bruă lŏ hma mguôp hŏng bruă duh mkra mtah doh, kiă kriê lăn ala hŏng klei kjăp, duh bi liê bruă nah gŭ êlan klông, pui kmlă, êa jua hlăm krĭng ƀuôn sang, mđĭ bi kjăp hnơ̆ng mjuăt bi hriăm, bruă dlăng kriê klei suaih pral mnuih ƀuôn sang, mđĭ mlih hdră mă bruă, klei bi mlih mrô. Lu phung mgơ̆ng ruahbi mklă srăng mâo klei bi mguôp kjăp hŏng mnuih ƀuôn sang, kăp mđing hmư̆ ai tiê klei mĭn mơ̆ng mnuih ƀuôn sang. Dŭm klei bi kƀĭn mâo mkŏ mjing hŏng klei hnŭk êngiê, kla mngač, mâo leh mnuih nao bi mguôp. lu mnuih ƀuôn sang bi myuôm klei prăp êmiêt prŏng mơ̆ng phung mgơ̆ng ruah.

Võ Tấn Bằng, knuă druh leh wĭt mdei ti ƀuôn hgŭm Sông Cầu lač kơ bruă dăp pô mgơ̆ng ruah jing djŏ, mâo klei bi mguôp plah wah mnuih mâo klei thâo hŏng phung knuă druh mda asei mâo mjuăt bi hriăm kjăp:

“Kơ klei dăp gưl thŭn, pô mgơ̆ng ruah khua thŭn hĭn jing 53 thŭn, mnuih mda asei hĭn jing 43 thŭn. Hlăm 5 čô pô mgơ̆ng ruah ti alŭ wăl, mâo 3 hriăm truh ti hnơ̆ng nai prĭn, mâo klei thâo lu hlăm bruă knuă, mơng kjăp leh hlăm djăp mta. Kơ klei mă bruă knuă, mâo leh hdră êlan klă mngač kơ wưng 5 thŭn tinăp. Boh phŭn jing kơ klei duh mkra ala ƀuôn hŏng klei kjăp, bi hrŏ êwang bi kpleh plah wah krĭng dôk mâo klei găl hŏng krĭng dleh dlan, mđing lu hĭn truh kơ klei hdĭp mnuih ƀuôn sang”.

Mbĭt hŏng bruă mđing hmư̆, lu mnuih ƀuôn sang bi čih pioh dŭm hdră mă bruă mơ̆ng phung mgơ̆ng ruah ƀuăn, čiăng mâo anôk kăp ktuê dlăng pioh kơ klei ruah khua.    Phạm Thị Hạnh, ti ƀuôn hgŭm Ea Khăl, čar Daklak brei thâo:

“Čang hmăng leh klei ruah khua, phung bi ala siă suôr hĭn hŏng mnuih ƀuôn sang, mđing hmư̆ klei blŭ mơ̆ng mnuih ƀuôn sang, ba klei tŭ dưn truh kơ mnuih ƀuôn sang, boh nik mđing kơ alŭ wăl anôk pô mgơ̆ng ruah.”

Čar Daklak mâo leh 2.118 êpul ruah khua hlăm 2.119 alŭ wăl mplĕ hră dôk hlăm  102 boh ƀuôn hgŭm. Klei prăp êmiêt jăk mơ̆ng phung mgơ̆ng ruah, mbĭt hŏng klei hnŭk êngiê, bruă klam mơ̆ng mnuih ƀuôn sang hlăk mjing leh klei mtluk mtlak ti anăp klei mơak prŏng, bi êdah klei đăo knang lehanăn klei čang hmăng kơ phung bi ala mâo djăp klei thâo, knhuah dôk dơ̆ng ƀơ̆ng huă jăk đru bi rŭ mdơ̆ng čar Daklak đĭ kyar kjăp hlăm wưng păn bruă mrâo./.