Să knông lăn Ia Nan, kdriêk Đức Cơ, čar Gia Lai, mâo êbeh 8000 čô mnuih, lu jing mnuih djuê ƀiă. Hŏng anôk ala prŏng, mnuih ƀiă, lu mnuih kreh mkra mjing mă pô phao ktuang pioh hiu lua hlô dliê. Trung tá Đỗ Giang Nam – Khua kiă kriê kahan ksiêm să Ia Nan, kdriêk Đức Cơ brei thâo: “Hlăm să Ia Nan mâo 3 boh ƀuôn mnuih djuê ƀiă, digơ̆ hdĭp lu hŏng bruă ngă pưk hma. Hmư̆ hing mâo đa đa mnuih ƀuôn sang bi djă yua phao ktuang čŏng mkra mjing mă pô dôk hlăm pưk hlăm hma, amâo mâo ba wĭt kơ ƀuôn sang ôh. Snăn kahan ksiêm să mâo leh klei bi hgŭm hŏng kahan răng mgang knông lăn, kahan lĭng hlăm alŭ wăl mâo klei hâo hưn mtô mblang kơ phung hđeh êdam hlăm dŭm boh ƀuôn anôk kreh djă yua phao ktuang pioh hiu lua anăn”.

Phung knuă druh kahan ksiêm bi mguôp hleh hŏng phung khua mduôn, mnuih mâo k’hưm čiăng mtrŭt phung mâo phao ktuang čŏng mkra mjing, lehanăn mnơ̆ng mtuh ba jao wĭt hĕ kơ êpul bruă djŏ tuôm. Msĕ si RČom Míu, jing mnuih mâo k’hưm ti ƀuôn Nú, să Ia Nan kreh bi mguôp hŏng dŭm klei bi kƀĭn ƀuôn, čiăng kơ mnuih ƀuôn sang hlue gưt klei bhiăn knŭk kna, hdĭp hlăm klei êđăp ênang, thâo bi khăp, bi đru hdơ̆ng găp hlăm klei duh ƀơ̆ng, amâo mâo djă yua phao ktuang čŏng mkra mjing ôh.  “Klei djă yua phao ktuang mrâo anei kâo ăt mtă mtăn leh brei ba wĭt kơ să, kyuadah leh bi mnăm kpiê êsei, amâo lŏ thâo răng duah yua hĕ phao ktuang mnah hdơ̆ng găp, snăn kahan ksiêm bi mguôp mbĭt hŏng êpul kahan răng mgang knông lăn hâo hưn mtô mblang hŏng mnuih ƀuôn sang amâo mâo djă yua phao ktuang ôh, knŏng ba klei jhat kơ asei mlei pô lehanăn găp djuê”.

Thiếu tá Nguyễn Thành Duy – K’iăng khua kahan ksiêm să Ia Dom, kdriêk Đức Cơ brei thâo, mbĭt hŏng bruă mđĭ hĭn klei hâo hưn, kahan răng mgang knông lăn păn kjăp boh klei hlăm ƀuôn sang, dưn yua ai ktang mơ̆ng mnuih ƀuôn sang đru bi răng mgang klei êđăp ênang: “Kahan ksiêm să mbĭt hŏng dŭm êpul bruă djŏ tuôm mâo leh klei mtrŭt mjhar, mtô mblang čiăng kơ mnuih ƀuôn sang djăp boh ƀuôn thâo săng lehanăn ba wĭt jih phao ktuang, mnơ̆ng mtuh. Tơdah tăm mâo hĕ đa đa hđeh êdam duah blei mnơ̆ng mtuh bi čhĭ hlăm hla pŏk yang ƀuôn čŏng mkŏ mkra mă pô phao ktuang. Snăn kahan ksiêm să mâo hrui mă leh 2 kdrăp mkra mjing, lehanăn ba jao kơ kahan ksiêm kdriêk mghaih msir djŏ hŏng mta mtrŭn”.

Mơ̆ng akŏ thŭn truh kơ ară anei, mnuih ƀuôn sang mâo ba jao leh kơ kahan ksiêm kdriêk Đức Cơ giăm 70 ƀĕ phao ktuang mnơ̆ng mtuh, lehanăn kdrăp mkŏ mkra phao ktuang./.