Hlăm ai êwa hơ̆k mơak hlăm hruê êngiê, drei lŏ hdơr wĭt knhuah gru krŭ kdơ̆ng leh anăn hdơr kơ Khua gĭt gai Hồ Chí Minh. Mnuih ƀuôn sang Lăn Dap Kngư ktưn hưn kơ klei anăn.

Ti alŭ Dor, să Gla, kdriêk Đăk Đoa, anôk hdĭp mda mơ̆ng 256 gŏ êsei mnuih Bahnar, ai êwa hriê mtlaih êngiê jăk mơak, hŏng mtŭ kñĭ hla čhiăm gru hrah. Ƀri gưl anei mnuih ƀuôn sang lŏ mkŏ mjing klei mjuăt asei mlei drông knăm mơak. Sing, khua alŭ Dor, să Gla, kdriêk Đăk Đoa brei thâo:

 “Ƀri gưl 2/9, gŏ sang leh anăn jih ƀuôn yuôl hla čhiăm gru čar kwar, huă mnăm hruê Mkŏ mjing ala čar. Leh anăn bi nao ti Tač mjuăt asei mlei ti kdriêk Đăk Đoa dlăng klei bi lông čưng boh kdriêk mkŏ mjing. Klei hdĭp mnuih ƀuôn sang ăt dĭ kyar hĭn kơ êlâo doh. Anăn grăp blư̆ truh knăm mơak lu gŏ sang ăt brei anak čô nao hlăp lêñ, mjing klei gĭr ktưn kơ phung hđeh hriăm hră mơar”.

Mduôn Y Sênh, mnuih djuê ana M’Nông, 83 thŭn, jing pô mâo kơhưm ti ƀuôn R’Ƀut, să Quảng Sơn, kdriêk Dak Glŏng, čar Dak Nông. Bri wưng hruê mkŏ mjing lăn čar. mduôn Y Sênh lŏ hdơr lŏ hdơr wĭt dŭm thŭn mlan klei krŭ kdơ̆ng. Hluê anăn, thŭn 1961, mduôn y Sênh tuôm nao hgŭm du kích, truh thŭn 1964 nao kahan, nao bi blah truh kơ hruê mâo mă klei êngiê thŭn 1975 wĭt hŏng ƀuôn sang ngă bruă knŭk kna ti alŭ wăl. Kyuanăn, ñu thâo klă boh tŭ mơ̆ng klei êđăp ênang, mơ̆ng klei êngiê:

 “Leh dưi sua wĭt klei êngiê kơh mnuih ƀuôn sang mâo klei hơĭt mă bruă knuă. Ăt kyua mâo Đảng, knŭk kna, bruă sang čư êa alŭ wăl uêñ mĭn hluê ngă dŭm hdră êlan đru kơ mnuih ƀuôn sang mđĭ kyar klei hdĭp mda. Mnuih ƀuôn sang ăt đăo knang hdră dŭm hdră êlan mơ̆ng Đảng, knŭk kna, gĭr čoh bruă ngă hma, ară anei mđĭ kyar klei hdĭp mda lu êdi.