Ti alŭ wăl mnuih ƀuôn sang djuê ana Châu Ro ti ƀuôn Tân Thuận, să Long Tân, kdrtiêk Long Đất, lu mnuih ƀuôn sang thâo sơăi kơ aduôn Nguyễn Thị Xuân (lŏ iêo Bảy Xuân)- jing khua ƀuôn lehanăn jing mnuih mâo kơhưm êdi, sĭt suôr hŏng mnuih ƀuôn sang djuê ana Châu Ro. Ñu lač, ñu amĭ kkiêng lehanăn đĭ hriê kơ prŏng hlăm krĭng Tân Thuận kyuanăn mơ̆ng điêt ñu ƀuh leh klei mnuih ƀuôn sang găn lu klei dleh dlan. Leh truh prŏng ñu mâo klei hmăng hmưi dưi đru kơ mnuih ƀuôn sang bi mlih klei hdĭp mda, boh nik hŏng phung hđeh êdam êra, ñu nao mŭt hlăm êpul bruă êdam êra, leh kơ anăn ƀrư̆ ƀrư̆ ñu djŏ ruah jing khua bruă êdam êra ƀuôn Tân Thuận. Leh mơ̆ng anăn ñu lŏ ngă bruă êpul mniê, bruă mặt trận, kiă kriê ƀuôn, lehanăn thŭn 2022 ñu jing khua ƀuôn, lehanăn jing mnuih mâo kơhưm edi hŏng ƀuôn sang. Hŏng ai tiê hur har, mâo klei thâo săng lu lehanăn pral, ñu mbĭt hŏng bruă sang čư̆ êa să mkŏ mjing leh lu hdră đru kơ mnuih ƀuôn sang duah ƀơ̆ng, đru mnuih ƀuôn sang bi mlih klei mĭn, kreh kruiñ hlăm klei duah ƀơ̆ng, lăm lui jih klei bhiăn hđăp amâo mâo lŏ djŏ…

Kyua mnuih ƀuôn sang kƀah lu klei thâo săng. Êlâo dih dah tuôm hŏng klei ruă duam amâo mâo nao băng kơ sang êa drao ôh, knŏng nao mbăng kơ ƀuê mjâo, leh truh wưng thŭn 2017-2018 ăt adôk lu mơh klei bhiăn amâo mâo djŏ. Ƀiădah, mơ̆ng thŭn 2021 truh kơ ară anei, snăn mnuih ƀuôn sang hlue ngă hdră êlan mơ̆ng knŭk kna jăk leh, lăm lui jih klei bhiăn amâo lŏ djŏ. Ară anei kkiêng anak nao băng kơ sang êa drao, lui jih klei bhiăn băng kơ ƀuê mjâo”.

Amâo mâo djŏ knŏng bi lar pral hdră êlan mơ̆ng Đảng, mơ̆ng knŭk kna, mnuih mâo kơhưm lŏ bi mlih jih knhuah bhiăn buh pla hđăp, ba yua klei kreh knhâo hlăm bruă knuă. Đào Văn Tâm, 50 thŭn, ti ƀuôn Lồ Ồ, să Đá Bạc, kdriêk  Châu Đức brei thâo, êlâo dih mnuih ƀuôn sang hlăm krĭng lăn Lồ Ồ knŏng pla mdiê sa yan. Čiăng lŏ mâo ba wĭt boh mnga mâo, lehanăn čiăng kơ mdiê mboh, bruă sang čư̆ êa, lehanăn phung mâo kơhưm hlăm ƀuôn sang mtrŭt mjhar leh mnuih ƀuôn sang duh bi liê blei mprăp êdeh êdâo mă bruă, hrô kơ êmô kbao kai lŏ lăn, mđoh ba êa  hlăm lŏ pla mdiê mâo dua yan. Kyuanăn mnuih ƀuôn sang lŏ mâo lu hĭn mdiê kuê, mđĭ kyar klei hdĭp mda:

 Thŭn 2000 mnuih ƀuôn sang tinei knŏng pla mjing sa yan mdiê, amâo mâo djăp huă ƀơ̆ng. Mrâo anei, jhŏng čan prăk knơ̆ng prăk blei masin prah mdiê, blei êdeh kai pioh mă bruă. Pô ƀuh jing mâo klei tŭ dưn êdi, snăn mtă kơ mnuih ƀuôn sang tui ngă msĕ, truh ară anei mnuih ƀuôn sang bi ngă lŏ dua yan leh sơăi mâo 25 thŭn hŏng anei leh”.

Bà Rịa-Vũng Tàu ară anei mâo 46 čô jing mnuih mâo kơhưm hlăm ƀuôn sang. Čar ăt mâo giăm 3% ênoh mnuih djuê ƀiă (31.722 người). Tui si dŭm alŭ wăl mâo lu mnuih djuê ƀiăhdĭp mda, snăn mnuih mâo kơhưm hlăm ƀuôn sang jih ai tiê đru mguôp hlăm bruă mơ̆ng alŭ wăl mâo đru mđĭ kyar klei hdĭp mda, rŭ mjing bruă nah gŭ. Aduôn Đào Thị Dương, 63 thŭn, pô mâo kơhưm hlăm mnuih djuê ana Châu Ro ti ƀuôn Lồ Ồ, să Đá Bạc, kdriêk Châu Đức brei thâo, leh knŭk kna pŏk êlan mơ̆ng wăl krah Ngãi Giao nao truh kơ să Đá Bạc, êlan găn ƀuôn Lồ Ồ lehanăn gŏ sang ñu jing gŏ sang tal êlâo myơr lăn pioh kơ bruă mkra êlan. Ƀuh ñu ngă leh klei bi hmô êlâo, lu gŏ sang mnuih ƀuôn sang Châu Ro hlăm krĭng ăt bi tui ngă msĕ, koh druôm hĕ ana boh kroh pô myơr lăn pioh kơ bruă mkra êlan. Aduôn Dương brei thâo, mâo êlan mrâo kjăp siam, mnuih ƀuôn sang mâo klei mơak, mđing mĭn kơ bruă mđĭ kyar klei hdĭp mda, amâo lŏ čang guôn klei knŭk kna đru ba ôh.

 Hlăm krĭng mâo lu snăk mnuih amâo mâo čiăng myơr ôh lăn pô pioh mkra êlan, kyuanăn kâo lehanăn lu mnuih mkăn ti anei mtrŭt mjhar diñu, leh mơ̆ng anăn êlan dưi mkra jăk. Leh mâo êlan siam, mnuih ƀuôn sang mâo mbha mnơ̆ng rông, dưi brei čan prăk pioh duh bi liê kơ bruă knuă, rŭ mdơ̆ng pưk sang. Ară anei klei hdĭp mda mnuih ƀuôn sang mâo leh lu klei bi mlih, amâo lŏ mâo klei jưh knang kơ knŭk kna đru ôh, ară anei ƀuôn sang ƀuôn  Lồ Ồ bi mlih leh.

Đỗ Chí Khởi, K’iăng khua knơ̆ng bruă sang čư̆ êa kdriêk Châu Đức brei thâo, mnuih mâo kơhưm mâo leh bruă klam hŏng klei blŭ, bruă ngă mơ̆ng pô mjing leh kdrông yuôm bhăn dja ba hdră êlan mơ̆ng Đảng, mơ̆ng knŭk kna truh hŏng mnuih ƀuôn sang hŏng klei tŭ dưn:

 Mbĭt hŏng bruă mkŏ mjign bruă sang čư̆ êa, ară anei mnuih ƀuôn sang djuê ƀiă nao hgŭm leh hlăm bruă kiă kriê, gĭt gai. Boh nik, ti dŭm boh sang hră mâo leh khua sang hră jing mnuih djuê ana Châu Ro, bi kơ bruă yang ƀuôn diñu nao hgŭm hlăm dŭm anôk bruă dhar kreh. Ti gưl kdriêk snăn mnuih ƀuôn sang mâo leh dŭm knuă druh pô ngă bruă anăn, kyuanăn tơdah mâo hdră êlan mơ̆ng dlông pral mtam mtrŭn kơ mnuih ƀuôn sang.

Dưi ƀuh jing, lu thŭn leh êgao mnuih mâo kơhưm hlăm mnuih djuê ƀiă ti   ,Bà Rịa - Vũng Tàu jing leh pô yuôm bhăn kơ bruă mđĭ kyar klei hdĭp mda mnuih djuê ƀiă hlăm alŭ wăl. Mâo bruă klam mơ̆ng diñu sĭt nik srăng đru mguôp kơ klei mđĭ kyar klei hdip mnuih ƀuôn sang, đru mnuih ƀuôn sang kriê pioh knhuah gru dhar kreh djuê ana pô./.