Aguah mbrue (16/10), Êpul bi ala bruă kƀĭn ala čar Kon Tum ngă klei bi tuôm hŏng mnuih ƀuôn sang jing phung đoàn viên, mnuih mă bruă êlâo kơ mkŏ mjing klei bi kƀĭn tal 8, bruă kƀĭn ala XV čiăng tŭ mă jih klei blŭ, klei akâo mâo klei blŭ kơ 3 mta bruă dôk čih mkra klei bhiăn lŏ mlih mrâo, djŏ tuôm hlăm klei tŭ dưn mnuih ngă bruă.

Kơ klei čih mkra hdră bhiăn Công đoàn (lŏ mlih mrâo) Êpul khua bi ala bruă kƀĭn ala čar Kon Tum mâo leh truh 6 mta bruă mâo klei akâo tui si phung đoàn viên, mnuih mă bruă bi êdah, kơ klei čih mkra hdră bhiăn bruă mă (lŏ mlih mrâo) lehanăn čih mkra klei mlih mrâo, thiăm mbŏ đa đa mta hlăm hdră bhiăn ênua mdrao mgŭn, hlăm grăp klei bhiăn mâo leh 5 klei blŭ akâo bi mlih thiăm mbŏ. Jih jang bruă mâo leh phung đoàn viên, mnuih mă bruă čar Kon Tum bi êdah kơ 3 klei čih mkra hdră bhiăn lŏ mlih mrâo, tui ngă djŏ hŏng knhuah klei bhiăn dôk ngă bruă, hdĭp mda, hriăm mjuăt, kơ klei đru ba kơ hdră êlan lehanăn hmăng hmưi dŭm mta mtrŭn mơ̆ng hdră bhiăn jing djŏ hŏng klei hdĭp sĭt. Bi trông hŏng phung đoàn viên, mnuih mă bruă, snăn Phạm Đình Thanh, K’iăng khua êpul thơ̆ng kơ bruă mơ̆ng êpul bi ala bruă kƀĭn ala čar  Kon Tum čih pioh jih dŭm klei blŭ mơ̆ng phung đoàn viên lehanăn mnuih mă bruă, anăn jing klei năng ngă./.