4 êpul hriê mơ̆ng čar Daklak; Kon Tum, Bình phước, Sơn La nao hlăm klei bi lông knhal tuič klei bi lông mnuih ngă lŏ hma mbruă thŭn 2025.

Anei jing dŭm êpul kdlưn hĭn, dưi găn leh klei bi lông êlâo, dưi lŏ čhuang nao hlăm klei bi lông knhal tuič, klei bi lông anei mbha nmâo 4 kdrêč: Phung ngă lŏ hma thâo blŭ tlao, phung ngă lŏ hma thâo mĭn; phung ngă lŏ hma thâo bi mguôp, lehanăn phung ngă lŏ hma găn klei lông dlăng. Mơ̆ng jih klei bi lông anăn bi êdah klei thâo săng pô, klei mbruă, klei mưng mjuăt, lehanăn klei thâo ba yua kreh knhâo hlăm bruă duh mkra pla mjing kphê thâo mĭn, dưi mdrơ̆ng hŏng klei bi mlih yan adiê, lehanăn dŭm mta bruă djŏ tuôm hlăm klei mkra mjing, čhĭ mnia kphê, pla mjing mâo hră tŭ yap, mkŏ mjing klei bi hgŭm mơ̆ng akŏ hlŏng kơ knhal tuič hlăm bruă kphê Việt Nam.