Mrâo atăt êpul tuê hiu čhưn ti dŭm anôk hiu čhưn ênguê ti Ƀuôn Trí B, să Krông Ana, kdriêk Ƀuôn Đon, amai Sáo Bun Trâm Adrơ̆ng brei thâo, thŭn anei ñu giăm 30 thŭn, leh anăn sa čô hlăm gŏ sang mâo amĭ jing mnuih Lào, ama jing mnuih Êđê. Ñu ruah bruă atăt tuê hiu čhưn dlăng kyua ñu khăp atăt phung tuê hiu dlăng hlăm dŭm ktuê êlan hlăm ƀuôn sang, kah mbha hŏng digơ̆ kơ klei hdĭp, klei dhar kreh leh anăn klei bhiăn hdĭp mda mnuih ƀuôn sang dôk hdĭp mda ti Ƀuôn Đon anei:

“Hlăm pô mâo dua êrah mnuih Lao leh anăn Êđê, kâo ruah bruă atăt tuê hiu čhưn ênguê hŏng klei čang hmăng hưn mdah dhar kreh djuê ana pô kơ lu mnuih thâo hĭn. Hlăm wưng kơ anăp, kâo čiăng hưn kơ grăp čô mnuih lu hĭn kơ klei bhiăn hdĭp mda mơ̆ng dua djuê ana pô, boh nik djuê ana Lao, mâo lu klei bhiăn, amâo djŏ knŏng hjăn knăm bunpimay leh anăn lŏ jing knăm mlan 6, mlan 12 grăp thŭn.”

Ti Ƀuôn Đon, mâo lu mnuih Lao dôk ung, mô̆ mnuih M’Nông, Ê Đê. Diñu mjĕ giăm klei dhar kreh, klei blŭ anăn dleh snăk čiăng thâo kral mnuih Lao amâodah mnuih ti alŭ wăl. Ayŏng Khăm Phon Lào, Khua adŭ bruă lŏ hma kdriêk Ƀuôn Đon, sa čô hlăm Êpul hgŭm Việt- Lào, kdriêk Ƀuôn Đon brei thâo:

“Hlăm gŏ sang ară anei dôk mô̆, dôk ung jing 7 djuê ana. Mnuih Êđê mâo, Jrai mâo mơh, Hrê, Yuăn ăt mâo snăn wĭt hdĭp mda jăk mơak. Mơ̆ng klei čŭt hơô truh kơ klei blŭ mâo klei bi tui hriăm hlăm dhar kreh djăp djuê ana. Yap mơ̆ng hđeh mrâo kkiêng leh anăn hriê kơ prŏng hlăm êpul êya Ƀuôn Trí snăn thâo 2-3 klei blŭ, mâo phung raih snăn blŭ mơ̆ng 5-6 klei blŭ dŭm djuê ana.”

Bun Mi Lào, thŭn anei giăm 70 thŭn, hdĭp mda ti Ƀuôn Trí B, să Krông Ana, kdriêk Ƀuôn Đon kah mbha, wăt tơdah mnuih Lào ênuk tal êlâo nao ti hdĭp mda ti Ƀuôn Đon wĭt leh hŏng aduôn aê atâo atiêt, ƀiădah ênuk êdei djuê ana Lào ti să knông lăn Krông Ana ăt mkŏ, tŭ mă, djă pioh knhuah gru jăk siam mơ̆ng mnuih Lào leh anăn hdĭp jĕ giăm hŏng dŭm djuê ana ti alŭ wăl anăn klei khăp ƀrư̆ kjăp hĭn:

“Tinei ăt ênưih, leh anăn ayŏng adei bi đru, mâo ya bruă dleh dlan ăt bi đru mơh, lăn jăk snăk čĭm gam. Mnuih Lào, Êđê, Mnông, Yuăn msĕ si ayŏng adei sa boh sang”

Hlue si Phạm Trung Nghĩa, Khua Knơ̆ng bruă sang čư̆ êa kdriêk Ƀuôn Đon, ară anei ti kdriêk mâo 29 djuê ana hdĭp mda hŏng hlăm brô 70 êbâo čô, hlăm anăn mnuih Việt Nam phŭn agha Lào mâo hlăm brô 300 čô. Mnuih Việt Nam phŭn agha Lào hdĭp mda tinei mâo bruă sang čư̆ êa alŭ wăl mđing dlăng mjing klei găl hlăm djăp mta bruă čiăng kơ mnuih ƀuôn sang hơĭt ai tiê hriăm, mă bruă leh anăn mkra mjing mđĭ kyar bruă duh mkra. Grăp thŭn, hlăm gưl knăm djuê ana mnuih Lào, kdriêk mkŏ mjing kdrưh kơăm leh anăn djŏ klei bhiăn.

“Mnuih Lào hdĭp mda ti kdriêk êbeh 300 thŭn anei. Êngao kơ dŭm hdră êlan mơ̆ng Đảng leh anăn Knŭk kna snăn kdriêk ăt mâo dŭm klei mđing dlăng boh nik hŏng mnuih Lào ti alŭ wăl, si bĕ ngă čiăng mjing klei duh ƀơ̆ng kơ mnuih ƀuôn sang dưi mđĭ kyar ti ƀuôn sang pô. Hmei ăt mđing dlăng kơ dŭm mta hiu čhưn ênguê, boh nik hŏng hdră hiu čhưn ênguê dhar kreh dŭm djuê ana, snăn mnuih Lào ti kdriêk Ƀuôn Đon ăt jing sa hlăm dŭm djuê ana mâo knhuah hjăn, hmei ăt dôk gĭr ba yua dŭm klei jăk siam anăn čiăng mjing klei mdê hĭn hlăm hdră mđĭ kyar hiu čhưn ênguê ti alŭ wăl.”

 Mnuih Việt Nam phŭn agha Lao dôk hdĭp êđăp ênang, bi hgŭm hŏng dŭm djuê ana mkăn ti ƀuôn sang Ƀuôn Đon, mjing klei bi hgŭm kjăp hlăm klei hdĭp mda, dhar kreh đru bi hơĭt klei êđăp ênang kđi čar, mđĭ kyar bruă duh mkra ti alŭ wăl./.