Blŭ mphŭn pŏk Klei bi kƀĭn, Khua Dhar bruă măt trận čar kwar Việt Nam Đỗ Văn Chiến mñă: Boh klei mrâo, Dhar bruă măt trận čar kwar Việt Nam srăng ksiêk kjăp hĭn hdră êlan mtrŭn mơ̆ng Đảng, hdră bhiăn mơ̆ng Knŭk kna, gĭr mlih mrâo mta phŭn, hdră mă bruă, bi hgŭm mguôp jih jang mnuih ƀuôn sang, ba yua jih klei găl mâo, hŏng klei gĭt gai mơ̆ng Đảng, klei sa ai, hgŭm kngan răng mgang lehanăn mkŏ mkra ala čar sah mdrŏng, đĭ kyar.

Klei kƀĭn mđing bi trông, brei klei blŭ kơ mta phŭn mơ̆ng Klei bhiăn mkra mlih dŭm mta kñăm rơ̆ng klei gĭt gai mơ̆ng Đảng hŏng bruă Mặt trận; mđĭ lar klei đua klam mơ̆ng mnuih ƀuôn sang hlăm hdră mkŏ mkra klei bi hgŭm mguôp jih jang djuê ana. Dŭm klei blŭ brei ksiêm dlăng bi mklă dŭm mta ti dŭm anôk bi kƀĭn thơ̆ng kơ bruă, đru mguôp klei blŭ hlăm hdră mđĭ kyar ala čar, boh nik dŭm bruă djŏ tuôm kơ hdră mđĭ kyar ala čar hlăm ênuk gưl mrâo mơ̆ng djuê ana, bruă bi khuăt anôk bruă ƀiădah ăt rơ̆ng hdră mă bruă tŭ dưn./.