Blŭ ti knăm anei, Khua Anôk bruă kƀĭn ala Trần Thanh Mẫn brei thâo, mbĭt hŏng bruă bi ênŭm mnuih mă bruă, bi hơĭt anôk bruă leh hdră bhiăn, hdră mtrŭn mâo Anôk bruă kƀĭn ala bi mklă ti Klei bi kƀĭn mjêč tal 9, dŭm anôk bruă mđing pŏk ngă leh bruă hluê si hdră kčah rơ̆ng hdră mă bruă klă mngač, amâo kpăk gun, boh nik mprăp leh ênŭm hră mơar, dŭm mta klei ba mdah kơ Dhar bruă gĭt gai Anôk bruă kƀĭn ala ksiêm dlăng, brei klei blŭ ti anôk bi kƀĭn tal anei.

Ti anôk bi kƀĭn, Dhar bruă gĭt gai anôk bruă kƀĭn ala brei leh klei blŭ kơ bruă hlak mblang, mkra 3 klei čih mkra hdră bhiăn êlâo kơ ba mdah, akâo klei blŭ ti Anôk bi kƀĭn phung bi ala Anôk bruă kƀĭn ala thơ̆ng kơ bruă, tơdah čiăng srăng ba mdah kơ Anôk bruă kƀĭn ala bi mklă ti Klei bi kƀĭn mjêč tal 9 mâo: Klei čih mkra hdră bhiăn Jia blei yua (mkra mlih), ară anei anôk bruă duh mkra dôk mđing kơ bruă anei; Klei čih mkra hdră bhiăn Jia hrui wĭt mơ̆ng anôk bruă duh mkra (mkra mlih), Klei čih mkra hdră bhiăn kriê dlăng lehanăn duh bi liê prăk knŭk kna ti anôk bruă duh mkra…