Hlăm klei kƀĭn trông tal anei, gưl dlông bi trông, brei klei blŭ bi klă kơ dŭm boh klei sơnei: Boh sĭt bruă duh mkra ala ƀuôn, ngăn prăk knŭk kna thŭn 2023, hdră êlan thŭn 2024, hdră êlan ngăn prăk knŭk kna 3 thŭn mơ̆ng thŭn 2024 – 2026 leh anăn hdră êlan hluê ngă bruă tĭng tla prăk mlan mrâo, Ksiêm wĭt 10 thŭn hluê ngă hdră mtrŭn gưl dlông 5 gưl 11 kơ hdră đa đa hdră êlan yang ƀuôn wưng thŭn 2012 – 2020.

Ksiêm wĭt 20 thŭn hluê ngă hdră mtrŭn gưl dlông 7 gưl 10 kơ bruă bi lar klei bi mguôp djuê ana kyua mnuih ƀuôn sang mdrŏng, ala čar ktang, klei mtăp mdơr yang ƀuôn, ngă phŭn mĭl pô, mrâo mrang, Ksiêm wĭt 15 thŭn hluê ngă hdră mtrŭn gưl dlông 7 gưl 10 kơ bruă mkŏ mjing êpul phung thâo lu hlăm wưng mtrŭt mđĭ bruă tuh tia, bi mrâo mrang lăn čar, Ksiêm wĭt 10 thŭn hluê ngă hdră mtrŭn gưl dlông 8 gưl 11 kơ hdră êlan răng mgang lăn čar hlăm wưng mrâo. Čuăl mkă Êpul khua bruă Đảng gưl dlông gưl 14, leh anăn đa đa boh klei yuôm bhăn mkăn. Blŭ pŏk klei bi kƀĭn, Khua gĭt gai Đảng Nguyễn Phú Trọng mñă kơ gưl dlông leh anăn phung khua êmua nao hgŭm hlăm klei kƀĭn bi lar klei thâo, ai tiê bruă klam, kñăm ksiêm duah, bi trông klă nik, brei boh blŭ čiăng bi kluôm dŭm klei hưn mdah, hdră mkăp leh anăn ksiêm dlăng, bi klă ti mmông bi ruê̆ klei kƀĭn. Mĭn tĭng klei kbĭn trông truh kơ hruê 8/10.