Knhal jih mlan 3/1975, êjai klei bi blah kwar Dhŭng mâo klei mlih pral, Đại tướng Võ Nguyên Giáp gĭt gai leh knơ̆ng Kahan alŭ wăl 5 leh anăn knơ̆ng gĭt gai kahan êa mjêč mtlaih êngiê plao ksĭ Trường Sa. Leh kơnăn mtam, sa anok bruă ngă bruă klam dưi mkŏ mjing, mâo Lữ Đoàn 126 kahan knhăk kahan êa bi mguôp hŏng kahan hang, hâo hưn, mâo dŭm anôk bruă đru hlăm Kahan alŭ wăl 5.

Čiăng rơ̆ng kơ klei hgăm, dŭm kŭm păn mdiăng kahan dưi ngă mgưt jing kŭm păn trah mă kan ala tač êngao. Lĭng kahan đuê̆ dăp hlăm kŭm păn, anôk dưm mnơ̆ng đuê̆ kahan hlăm êa ksĭ hŭi hyưt. Tlam hruê 13/4/1975, dŭm kŭm păn drei nao jĕ plao ksĭ Song Tử Tây. Čang rang aguah hruê êdei, êpul kahan êa, kahan hang mnah phao, pŏk klei ksŭng mblah pral ti plao ksĭ. Khădah tuôm hŏng klei bi kdơ̆ng ktang phĭt ƀiădah kyua klei kjăt, knŏng 30 mnĭt bi blah, lĭng kahan dưi kiă kriê plao ksĭ Song Tử Tây. Anăn jing klei mnah phao pŏk kơ hdră mblah mtlaih êngiê plao ksĭ Trường Sa.

Trần Đăng Ninh, 70 thŭn, ti Hải Hậu, Nam Định, lĭng kahan hđăp nao hlăm hdră mblah mgei ai tiê lŏ bi hdơr:

 “Gưl mblah anei jing hgăm, kjăt, kahan Sài Gòng amâo mâo thâo ôh pô truh pral sơnăk. Êjai anăn, ti lăn hang ăt mâo lu klei amâo mâo hơĭt, ti êa ksĭ kŭm păn rih, đa đa  mâo wăt êpul ala tač êngao. Leh hruê 14/4, mbha êpul hmei dôk kiă kriê plao ksĭ. Bi êpul mdiăng kahan êa, phung mnă wĭt toi Đà Nẵng”.

Lŏ čuê kơ klei dưi, hruê 21/4/1975. Êpul kŭm păn tal dua lŏ dơ̆ng nao ti êa ksĭ, nao jĕ leh anăn mtlaih êngiê dŭm plao ksĭ Sinh Tồn, Nam Yết, Trường Sa, Sơn Ca…Hruê 29/4/1975, dŭm plao ksĭ ti Trường Sa dưi mtlaih êngiê. Trung úy Nguyễn Văn Mỹ, sa čô suang dlăng hđăp hlăm Sư Đoàn mrô 2 hlăm lữ đoàn 126 yăl dliê. Tlam hruê 30/4, grăp čô hmư̆ mtlaih êngiê Sài Gòn hlăm klei mrâo mơ̆ng Sang mđung asăp blŭ Việt Nam, ƀuh klei hơ̆k mơak êdi:

 “Mông anăn hmei dôk ti plao ksĭ Song Tử Tây, blŭ hrăm dleh dlan. Êjai Sang mđung asăp blŭ Việt Nam hưn mtlaih êngiê kwar Dhŭng, kă hlă čhiăm gru dinh Độc Lập, ayŏng adei hơ̆k mơak êdi, pah kngan, hơ̆k mơak. Êjai thâo leh mtlaih êngiê, hmei dôk hdĭp ênguôt hnĭng kơ dĭng kna djiê leh êlâo kơ mmông êđăp ênang”.

Leh 50 thŭn mtlaih êngiê, kdriêk plao ksĭ Trường Sa ară anei dôk kpưn đĭ ktang hlăm ala čar kơ bruă duh mkra êa ksĭ, bih kboh ti krah ksĭ Ngŏ, đru mđĭ kơhưm lăn čar hlăk hră kak plao ksĭ tar rŏng lăn. Nguyễn Tấn Tuân, khua bruă sang čư̆ êa čar Khánh Hoà brei thâo, hlăm wưng kơ anăp, čar lŏ dơ̆ng bi kluôm bruă kđi čar, mđĭ hnơ̆ng klei hdĭp mnuih ƀuôn sang lĭng kahana dŭm plao ksĭ, mtrŭt mđĭ bruă hâo hưn, mđĭ klei thâo săng kơ Trường Sa hlăm yang ƀuôn. Nguyễn Tấn Tuân, mñă klă, mta kñăm jing ba Trường Sa jing anôk bruă duh mkra – yang ƀuôn mrâo mrang ti krah ksĭ Ngŏ, mbĭt anăn jing kđông kjăp răng mgang klei kiă kriê lăn čar.

 “Rơ̆ng ngă jăk, sa nah dŭm hdră êlan, nah mkăn srăng mkŏ mjing hnư hrui wĭt kơ mnuih ƀuôn sang. Dŭm gŏ sang nao hgŭm mă bruă knuă leh anăn răng mgang klei dưi kiă kriê êa ksĭ, plao ksĭ. Kahan êa, čar Khánh Hoà hrăm mbĭt kriê dlăng kdriêk plao ksĭ. Anăn jing klei mđĭ ai prŏng, čiăng kơ grăp čô mnuih ƀuôn sang ti lăn hang leh anăn ti plao ksĭ ƀuh yuôm bhăn hĭn jing klei dưi kiă kriê, klei êngiê lăn čar.”